౪౯౩. మహావాణిజజాతకం (౧౦)

౧౮౦. వాణిజా సమితిం కత్వా, నానారట్ఠతో ఆగతా;

ధనాహరా పక్కమింసు, ఏకం కత్వాన గామణిం.

౧౮౧. తే తం కన్తారమాగమ్మ, అప్పభక్ఖం అనోదకం;

మహానిగ్రోధమద్దక్ఖుం, సీతచ్ఛాయం మనోరమం.

౧౮౨. తే చ తత్థ నిసీదిత్వా, తస్స రుక్ఖస్స ఛాయయా [ఛాదియా (సీ. స్యా. పీ.)];

వాణిజా సమచిన్తేసుం, బాలా మోహేన పారుతా.

౧౮౩. అల్లాయతే [అద్దాయతే (సీ. పీ.)] అయం రుక్ఖో, అపి వారీవ [వారి చ (సీ. పీ.)] సన్దతి;

ఇఙ్ఘస్స పురిమం సాఖం, మయం ఛిన్దామ వాణిజా.

౧౮౪. సా చ ఛిన్నావ పగ్ఘరి, అచ్ఛం వారిం అనావిలం;

తే తత్థ న్హత్వా పివిత్వా, యావతిచ్ఛింసు వాణిజా.

౧౮౫. దుతియం సమచిన్తేసుం, బాలా మోహేన పారుతా;

ఇఙ్ఘస్స దక్ఖిణం సాఖం, మయం ఛిన్దామ వాణిజా.

౧౮౬. సా చ ఛిన్నావ పగ్ఘరి, సాలిమంసోదనం బహుం;

అప్పోదవణ్ణే కుమ్మాసే, సిఙ్గిం విదలసూపియో [సిఙ్గిం బిదలసూపియో (సీ. పీ.), సిఙ్గీవేరం లసూపియో (క.) సిఙ్గీన్తి సిఙ్గీవేరాదికం ఉత్తరిభఙ్గం; విదలసూపియోతి ముగ్గసూపాదయో (అట్ఠ.) విదలం కలాయాదిమ్హి వత్తతీతి సక్కతాభిధానే].

౧౮౭. తే తత్థ భుత్వా ఖాదిత్వా [భుత్వా చ పివిత్వా చ (పీ.)], యావతిచ్ఛింసు వాణిజా;

తతియం సమచిన్తేసుం, బాలా మోహేన పారుతా;

ఇఙ్ఘస్స పచ్ఛిమం సాఖం, మయం ఛిన్దామ వాణిజా.

౧౮౮. సా చ ఛిన్నావ పగ్ఘరి, నారియో సమలఙ్కతా;

విచిత్రవత్థాభరణా, ఆముత్తమణికుణ్డలా.

౧౮౯. అపి సు వాణిజా ఏకా, నారియో పణ్ణవీసతి;

సమన్తా పరివారింసు [పరికరింసు (సీ. స్యా. పీ.)], తస్స రుక్ఖస్స ఛాయయా [ఛాదియా (సీ. స్యా. పీ.)].

౧౯౦. తే తాహి పరిచారేత్వా [పరివారేత్వా (సీ. స్యా. పీ.)], యావతిచ్ఛింసు వాణిజా;

చతుత్థం సమచిన్తేసుం, బాలా మోహేన పారుతా;

ఇఙ్ఘస్స ఉత్తరం సాఖం, మయం ఛిన్దామ వాణిజా.

౧౯౧. సా చ ఛిన్నావ పగ్ఘరి, ముత్తా వేళురియా బహూ;

రజతం జాతరూపఞ్చ, కుత్తియో పటియాని చ.

౧౯౨. కాసికాని చ వత్థాని, ఉద్దియాని చ కమ్బలా [ఉద్దియానే చ కమ్బలే (సీ. పీ.)];

తే తత్థ భారే బన్ధిత్వా, యావతిచ్ఛింసు వాణిజా.

౧౯౩. పఞ్చమం సమచిన్తేసుం, బాలా మోహేన పారుతా;

ఇఙ్ఘస్స మూలే [మూలం (సీ. పీ. క.)] ఛిన్దామ, అపి భియ్యో లభామసే.

౧౯౪. అథుట్ఠహి సత్థవాహో, యాచమానో కతఞ్జలీ;

నిగ్రోధో కిం పరజ్ఝతి [అపరజ్ఝథ (సీ.), అపరజ్ఝతి (స్యా. పీ.)], వాణిజా భద్దమత్థు తే.

౧౯౫. వారిదా పురిమా సాఖా, అన్నపానఞ్చ దక్ఖిణా;

నారిదా పచ్ఛిమా సాఖా, సబ్బకామే చ ఉత్తరా;

నిగ్రోధో కిం పరజ్ఝతి, వాణిజా భద్దమత్థు తే.

౧౯౬. యస్స రుక్ఖస్స ఛాయాయ, నిసీదేయ్య సయేయ్య వా;

న తస్స సాఖం భఞ్జేయ్య, మిత్తదుబ్భో హి పాపకో.

౧౯౭. తే చ తస్సానాదియిత్వా [తస్స అనాదిత్వా (సీ. స్యా.)], ఏకస్స వచనం బహూ;

నిసితాహి కుఠారీహి [కుధారీహి (క.)], మూలతో నం ఉపక్కముం.

౧౯౮. తతో నాగా నిక్ఖమింసు, సన్నద్ధా పణ్ణవీసతి;

ధనుగ్గహానం తిసతా, ఛసహస్సా చ వమ్మినో.

౧౯౯. ఏతే హనథ బన్ధథ, మా వో ముఞ్చిత్థ [ముచ్చిత్థ (పీ.)] జీవితం;

ఠపేత్వా సత్థవాహంవ, సబ్బే భస్మం [భస్మీ (సీ.)] కరోథ నే.

౨౦౦. తస్మా హి పణ్డితో పోసో, సమ్పస్సం అత్థమత్తనో;

లోభస్స న వసం గచ్ఛే, హనేయ్యారిసకం [హనేయ్య దిసతం (సీ.), హనేయ్య దిసకం (స్యా.)] మనం.

౨౦౧. ఏవ [ఏత (సీ. పీ.)] మాదీనవం ఞత్వా, తణ్హా దుక్ఖస్స సమ్భవం;

వీతతణ్హో అనాదానో, సతో భిక్ఖు పరిబ్బజేతి.

మహావాణిజజాతకం దసమం.