౪౮౮. భిసజాతకం (౫)

౭౮. అస్సం గవం రజతం జాతరూపం, భరియఞ్చ సో ఇధ లభతం మనాపం;

పుత్తేహి దారేహి సమఙ్గి హోతు, భిసాని తే బ్రాహ్మణ యో అహాసి.

౭౯. మాలఞ్చ సో కాసికచన్దనఞ్చ, ధారేతు పుత్తస్స బహూ భవన్తు;

కామేసు తిబ్బం కురుతం అపేక్ఖం, భిసాని తే బ్రాహ్మణ యో అహాసి.

౮౦. పహూతధఞ్ఞో కసిమా యసస్సీ, పుత్తే గిహీ ధనిమా సబ్బకామే;

వయం అపస్సం ఘరమావసాతు, భిసాని తే బ్రాహ్మణ యో అహాసి.

౮౧. సో ఖత్తియో హోతు పసయ్హకారీ, రాజాభిరాజా [రాజాధిరాజా (స్యా. క.)] బలవా యసస్సీ;

స చాతురన్తం మహిమావసాతు, భిసాని తే బ్రాహ్మణ యో అహాసి.

౮౨. సో బ్రాహ్మణో హోతు అవీతరాగో, ముహుత్తనక్ఖత్తపథేసు యుత్తో;

పూజేతు నం రట్ఠపతీ యసస్సీ, భిసాని తే బ్రాహ్మణ యో అహాసి.

౮౩. అజ్ఝాయకం సబ్బసమన్తవేదం [సబ్బసమత్తవేదం (సీ.), సబ్బసమత్తవేదనం (పీ.)], తపస్సీనం మఞ్ఞతు సబ్బలోకో;

పూజేన్తు నం జానపదా సమేచ్చ, భిసాని తే బ్రాహ్మణ యో అహాసి.

౮౪. చతుస్సదం గామవరం సమిద్ధం, దిన్నఞ్హి సో భుఞ్జతు వాసవేన;

అవీతరాగో మరణం ఉపేతు, భిసాని తే బ్రాహ్మణ యో అహాసి.

౮౫. సో గామణీ హోతు సహాయమజ్ఝే, నచ్చేహి గీతేహి పమోదమానో;

సో రాజతో బ్యసన మాలత్థ [మా రాజతో వ్యసన’మలత్థ (సీ. స్యా. పీ.)] కిఞ్చి, భిసాని తే బ్రాహ్మణ యో అహాసి.

౮౬. యం ఏకరాజా పథవిం విజేత్వా, ఇత్థీసహస్సాన [ఇత్థీసహస్సస్స (సీ. పీ.)] ఠపేతు అగ్గం;

సీమన్తినీనం పవరా భవాతు, భిసాని తే బ్రాహ్మణ యా అహాసి.

౮౭. ఇసీనఞ్హి సా సబ్బసమాగతానం, భుఞ్జేయ్య సాదుం అవికమ్పమానా;

చరాతు లాభేన వికత్థమానా, భిసాని తే బ్రాహ్మణ యా అహాసి.

౮౮. ఆవాసికో హోతు మహావిహారే, నవకమ్మికో హోతు గజఙ్గలాయం [కజఙ్గలాయం (సీ. స్యా. పీ.)];

ఆలోకసన్ధిం దివసం [దివసా (సీ. స్యా. పీ.)] కరోతు, భిసాని తే బ్రాహ్మణ యో అహాసి.

౮౯. సో బజ్ఝతూ పాససతేహి ఛబ్భి [ఛమ్హి (సీ. పీ.), ఛస్సు (?)], రమ్మా వనా నియ్యతు రాజధానిం [రాజఠానిం (క.)];

తుత్తేహి సో హఞ్ఞతు పాచనేహి, భిసాని తే బ్రాహ్మణ యో అహాసి.

౯౦. అలక్కమాలీ తిపుకణ్ణవిద్ధో, లట్ఠీహతో సప్పముఖం ఉపేతు;

సకచ్ఛబన్ధో [సక్కచ్చబద్ధో (సీ. పీ.), సంకచ్చబన్ధో (నియ్య)] విసిఖం చరాతు, భిసాని తే బ్రాహ్మణ యో అహాసి.

౯౧. యో వే అనట్ఠంవ [అనట్ఠం (సీ. స్యా. పీ.)] నట్ఠన్తి చాహ, కామేవ సో లభతం భుఞ్జతఞ్చ [లభతు భుఞ్జతు చ (స్యా.)];

అగారమజ్ఝే మరణం ఉపేతు, యో వా భోన్తో సఙ్కతి కఞ్చిదేవ [కిఞ్చిదేవ (క.)].

౯౨. యదేసమానా విచరన్తి లోకే, ఇట్ఠఞ్చ కన్తఞ్చ బహూనమేతం;

పియం మనుఞ్ఞం చిధ జీవలోకే, కస్మా ఇసయో నప్పసంసన్తి కామే.

౯౩. కామేసు వే హఞ్ఞరే బజ్ఝరే చ, కామేసు దుక్ఖఞ్చ భయఞ్చ జాతం;

కామేసు భూతాధిపతీ పమత్తా, పాపాని కమ్మాని కరోన్తి మోహా.

౯౪. తే పాపధమ్మా పసవేత్వ పాపం, కాయస్స భేదా నిరయం వజన్తి;

ఆదీనవం కామగుణేసు దిస్వా, తస్మా ఇసయో నప్పసంసన్తి కామే.

౯౫. వీమంసమానో ఇసినో భిసాని, తీరే గహేత్వాన థలే నిధేసిం;

సుద్ధా అపాపా ఇసయో వసన్తి, ఏతాని తే బ్రహ్మచారీ భిసాని.

౯౬. న తే నటా నో పన కీళనేయ్యా, న బన్ధవా నో పన తే సహాయా;

కిస్మిం వుపత్థమ్భ సహస్సనేత్త, ఇసీహి త్వం కీళసి దేవరాజ.

౯౭. ఆచరియో మేసి పితా చ మయ్హం, ఏసా పతిట్ఠా ఖలితస్స బ్రహ్మే;

ఏకాపరాధం ఖమ భూరిపఞ్ఞ, న పణ్డితా కోధబలా భవన్తి.

౯౮. సువాసితం ఇసినం ఏకరత్తం, యం వాసవం భూతపతిద్దసామ;

సబ్బేవ భోన్తో సుమనా భవన్తు, యం బ్రాహ్మణో పచ్చుపాదీ భిసాని.

౯౯. అహఞ్చ సారిపుత్తో చ, మోగ్గల్లానో చ కస్సపో;

అనురుద్ధో పుణ్ణో ఆనన్దో, తదాసుం సత్త భాతరో.

౧౦౦. భగినీ ఉప్పలవణ్ణా చ, దాసీ ఖుజ్జుత్తరా తదా;

చిత్తో గహపతి దాసో, యక్ఖో సాతాగిరో తదా.

౧౦౧. పాలిలేయ్యో [పారిలేయ్యో (సీ. పీ.)] తదా నాగో, మధుదో [మధువా (సీ. పీ.)] సేట్ఠవానరో;

కాళుదాయీ తదా సక్కో, ఏవం ధారేథ జాతకన్తి.

భిసజాతకం పఞ్చమం.