౪౮౯. సురుచిజాతకం (౬)
౧౦౨. మహేసీ సురుచినో [రుచినో (సీ. స్యా. పీ.)] భరియా, ఆనీతా పఠమం అహం;
దస వస్ససహస్సాని, యం మం సురుచిమానయి.
౧౦౩. సాహం బ్రాహ్మణ రాజానం, వేదేహం మిథిలగ్గహం;
నాభిజానామి కాయేన, వాచాయ ఉద చేతసా;
సురుచిం అతిమఞ్ఞిత్థ [అతిమఞ్ఞిత్థో (సీ. పీ.), అతిమఞ్ఞితా (?)], ఆవి [ఆవిం (సీ. పీ.)] వా యది వా రహో.
౧౦౪. ఏతేన సచ్చవజ్జేన, పుత్తో ఉప్పజ్జతం ఇసే;
ముసా మే భణమానాయ, ముద్ధా ఫలతు సత్తధా.
౧౦౫. భత్తు మమ సస్సు మాతా, పితా చాపి చ సస్సురో;
తే మం బ్రహ్మే వినేతారో, యావ అట్ఠంసు జీవితం.
౧౦౬. సాహం అహింసారతినీ, కామసా [కామసో (సీ.)] ధమ్మచారినీ [ధమ్మచారిణీ (సీ.)];
సక్కచ్చం తే ఉపట్ఠాసిం, రత్తిన్దివమతన్దితా.
౧౦౭. ఏతేన సచ్చవజ్జేన, పుత్తో ఉప్పజ్జతం ఇసే;
ముసా మే భణమానాయ, ముద్ధా ఫలతు సత్తధా.
౧౦౮. సోళసిత్థిసహస్సాని, సహభరియాని బ్రాహ్మణ;
తాసు ఇస్సా వా కోధో వా, నాహు మయ్హం కుదాచనం.
౧౦౯. హితేన తాసం నన్దామి, న చ మే కాచి అప్పియా;
అత్తానంవానుకమ్పామి, సదా సబ్బా సపత్తియో.
౧౧౦. ఏతేన సచ్చవజ్జేన, పుత్తో ఉప్పజ్జతం ఇసే;
ముసా మే భణమానాయ, ముద్ధా ఫలతు సత్తధా.
౧౧౧. దాసే కమ్మకరే పేస్సే [పోసే (స్యా. క.)], యే చఞ్ఞే అనుజీవినో;
పేసేమి [పోసేమి (సీ. స్యా. పీ.)] సహధమ్మేన, సదా పముదితిన్ద్రియా.
౧౧౨. ఏతేన సచ్చవజ్జేన, పుత్తో ఉప్పజ్జతం ఇసే;
ముసా మే భణమానాయ, ముద్ధా ఫలతు సత్తధా.
౧౧౩. సమణే బ్రాహ్మణే చాపి, అఞ్ఞే చాపి వనిబ్బకే;
తప్పేమి అన్నపానేన, సదా పయతపాణినీ.
౧౧౪. ఏతేన సచ్చవజ్జేన, పుత్తో ఉప్పజ్జతం ఇసే;
ముసా మే భణమానాయ, ముద్ధా ఫలతు సత్తధా.
౧౧౫. చాతుద్దసిం పఞ్చద్దసిం [పన్నరసిం (సీ. పీ.)], యా చ పక్ఖస్స అట్ఠమీ [అట్ఠమిం (సీ. పీ.)];
పాటిహారియపక్ఖఞ్చ, అట్ఠఙ్గసుసమాగతం [అట్ఠఙ్గసుసమాహితం (సబ్బత్థ) వి. వ. ౧౨౯ పాళియా అట్ఠకథా పస్సితబ్బా];
ఉపోసథం ఉపవసామి [ఉపవసిం (క.)], సదా సీలేసు సంవుతా.
౧౧౬. ఏతేన సచ్చవజ్జేన, పుత్తో ఉప్పజ్జతం ఇసే;
ముసా మే భణమానాయ, ముద్ధా ఫలతు సత్తధా.
౧౧౭. సబ్బేవ తే ధమ్మగుణా, రాజపుత్తి యసస్సిని;
సంవిజ్జన్తి తయి భద్దే, యే త్వం కిత్తేసి అత్తని.
౧౧౮. ఖత్తియో జాతిసమ్పన్నో, అభిజాతో యసస్సిమా;
ధమ్మరాజా విదేహానం, పుత్తో ఉప్పజ్జతే తవ [తవం (సీ. పీ.)].
౧౧౯. దుమ్మీ [రుమ్మీ (సీ. పీ.)] రజోజల్లధరో, అఘే వేహాయసం ఠితో;
మనుఞ్ఞం భాససే వాచం, యం మయ్హం హదయఙ్గమం.
౧౨౦. దేవతానుసి సగ్గమ్హా, ఇసి వాసి [చాపి (క.)] మహిద్ధికో;
కో వాసి త్వం అనుప్పత్తో, అత్తానం మే పవేదయ.
౧౨౧. యం దేవసఙ్ఘా వన్దన్తి, సుధమ్మాయం సమాగతా;
సోహం సక్కో సహస్సక్ఖో, ఆగతోస్మి తవన్తికే.
౧౨౨. ఇత్థియో [ఇత్థియా (పీ.)] జీవలోకస్మిం, యా హోతి [హోన్తి (సీ. స్యా.)] సమచారినీ [సమచారిణీ (సీ.)];
మేధావినీ సీలవతీ, సస్సుదేవా పతిబ్బతా.
౧౨౩. తాదిసాయ సుమేధాయ, సుచికమ్మాయ నారియా;
దేవా దస్సనమాయన్తి, మానుసియా అమానుసా.
౧౨౪. త్వఞ్చ భద్దే సుచిణ్ణేన, పుబ్బే సుచరితేన చ;
ఇధ రాజకులే జాతా, సబ్బకామసమిద్ధినీ.
౧౨౫. అయఞ్చ తే రాజపుత్తి, ఉభయత్థ కటగ్గహో;
దేవలోకూపపత్తీ చ, కిత్తీ చ ఇధ జీవితే.
౧౨౬. చిరం సుమేధే సుఖినీ, ధమ్మమత్తని పాలయ;
ఏసాహం తిదివం యామి, పియం మే తవ దస్సనన్తి.
సురుచిజాతకం ఛట్ఠం.