౪౮౧. తక్కారియజాతకం (౮)

౧౦౪. అహమేవ దుబ్భాసితం భాసి బాలో, భేకోవరఞ్ఞే అహిమవ్హాయమానో [మవ్హయానో (సీ. పీ.)];

తక్కారియే సోబ్భమిమం [సోబ్భమ్హి అహం (క.)] పతామి, న కిరేవ సాధు అతివేలభాణీ [సాధూత్యతివేలభాణీ (క.)].

౧౦౫. పప్పోతి మచ్చో అతివేలభాణీ, బన్ధం వధం సోకపరిద్దవఞ్చ;

అత్తానమేవ గరహాసి ఏత్థ, ఆచేర యం తం నిఖణన్తి సోబ్భే.

౧౦౬. కిమేవహం తుణ్డిలమనుపుచ్ఛిం, కరేయ్య సం [కరేయ్యాసం (స్యా.), కరేయ్య స (క.), భరేయ్య సం (?)] భాతరం కాళికాయం [కాళికాయ (స్యా. క.)];

నగ్గోవహం [నగ్గోచ’హం (?)] వత్థయుగఞ్చ జీనో, అయమ్పి అత్థో బహుతాదిసోవ.

౧౦౭. యో యుజ్ఝమానానమయుజ్ఝమానో [యుజ్ఝమానేన అయుజ్ఝమానో (క.)], మేణ్డన్తరం అచ్చుపతీ కులిఙ్గో;

సో పింసితో మేణ్డసిరేహి తత్థ, అయమ్పి అత్థో బహుతాదిసోవ.

౧౦౮. చతురో జనా పోత్థకమగ్గహేసుం, ఏకఞ్చ పోసం అనురక్ఖమానా;

సబ్బేవ తే భిన్నసిరా సయింసు, అయమ్పి అత్థో బహుతాదిసోవ.

౧౦౯. అజా యథా వేళుగుమ్బస్మిం బద్ధా [బన్ధం (స్యా. క.)], అవక్ఖిపన్తీ అసిమజ్ఝగచ్ఛి;

తేనేవ తస్సా గలకావకన్తం [గలయా వికన్తుం (క.), గలకం వికన్తా (స్యా.)], అయమ్పి అత్థో బహుతాదిసోవ.

౧౧౦. ఇమే న దేవా న గన్ధబ్బపుత్తా, మిగా ఇమే అత్థవసం గతా మే [అత్థవసాభతా ఇమే (సీ. స్యా. పీ.)];

ఏకఞ్చ నం సాయమాసే పచన్తు, ఏకం పునప్పాతరాసే [ఏకఞ్చ నం పాతరాసే (క. సీ. పీ.)] పచన్తు.

౧౧౧. సతం సహస్సాని దుభాసితాని, కలమ్పి నాగ్ఘన్తి సుభాసితస్స;

దుబ్భాసితం సఙ్కమానో కిలేసో [కిలిస్సతి (?)], తస్మా తుణ్హీ కిమ్పురిసా [కింపురిసో (సీ. స్యా.)] న బాల్యా.

౧౧౨. యా మేసా బ్యాహాసి [బ్యాకాసి (సీ. స్యా. పీ.)] పముఞ్చథేతం, గిరిఞ్చ నం [గిరిం వరం (క.)] హిమవన్తం నయన్తు;

ఇమఞ్చ ఖో దేన్తు మహానసాయ, పాతోవ నం పాతరాసే పచన్తు.

౧౧౩. పజ్జున్ననాథా పసవో, పసునాథా అయం పజా;

త్వం నాథోసి [త్వం-నాథో’స్మి (సీ. స్యా. పీ.)] మహారాజ, నాథోహం భరియాయ మే [అమ్హ-నాథా మమ భరియా (క. సీ. స్యా.)];

ద్విన్నమఞ్ఞతరం ఞత్వా, ముత్తో గచ్ఛేయ్య పబ్బతం.

౧౧౪. న వే నిన్దా సుపరివజ్జయేథ [సుపరివజ్జయాథ (స్యా.)], నానా జనా సేవితబ్బా జనిన్ద;

యేనేవ ఏకో లభతే పసంసం, తేనేవ అఞ్ఞో లభతే నిన్దితారం.

౧౧౫. సబ్బో లోకో పరిచిత్తో అతిచిత్తో [పరచిత్తేన అతిచిత్తో (సీ. స్యా.), పరచిత్తేన అచిత్తో (సీ. అట్ఠ.)], సబ్బో లోకో చిత్తవా సమ్హి చిత్తే;

పచ్చేకచిత్తా పుథు సబ్బసత్తా, కస్సీధ చిత్తస్స వసే న వత్తే.

౧౧౬. తుణ్హీ అహూ కిమ్పురిసో సభరియో [అభాణీ (క.)], యో దాని బ్యాహాసి భయస్స భీతో;

సో దాని ముత్తో సుఖితో అరోగో, వాచాకిరేవత్తవతీ నరానన్తి.

తక్కారియజాతకం అట్ఠమం.