౪౭౮. దూతజాతకం (౫)

౫౪. దూతే తే బ్రహ్మే [దూతే బ్రాహ్మణ (క.)] పాహేసిం, గఙ్గాతీరస్మి ఝాయతో;

తేసం పుట్ఠో న బ్యాకాసి, దుక్ఖం గుయ్హమతం [గుయ్హం మతం (సీ.), తుయ్హం మతం (స్యా. క.)] ను తే.

౫౫. సచే తే దుక్ఖముప్పజ్జే, కాసీనం రట్ఠవడ్ఢన;

మా ఖో నం తస్స అక్ఖాహి, యో తం దుక్ఖా న మోచయే.

౫౬. యో తస్స [యో చ తథా (పీ.)] దుక్ఖజాతస్స, ఏకఙ్గమపి భాగసో [ఏకన్తమపి భాసతో (సీ. పీ.)];

విప్పమోచేయ్య ధమ్మేన, కామం తస్స పవేదయ [పవేదయే (సీ.)].

౫౭. సువిజానం సిఙ్గాలానం, సకుణానఞ్చ వస్సితం;

మనుస్సవస్సితం రాజ, దుబ్బిజానతరం తతో.

౫౮. అపి చే మఞ్ఞతీ పోసో, ఞాతి మిత్తో సఖాతి వా;

యో పుబ్బే సుమనో హుత్వా, పచ్ఛా సమ్పజ్జతే దిసో.

౫౯. యో అత్తనో దుక్ఖమనానుపుట్ఠో, పవేదయే జన్తు అకాలరూపే;

ఆనన్దినో తస్స భవన్తిమిత్తా [భవన్త’మిత్తా (సీ. పీ.)], హితేసినో తస్స దుఖీ భవన్తి.

౬౦. కాలఞ్చ ఞత్వాన తథావిధస్స, మేధావీనం ఏకమనం విదిత్వా;

అక్ఖేయ్య తిబ్బాని [తిప్పాని (సీ. స్యా. పీ.)] పరస్స ధీరో, సణ్హం గిరం అత్థవతిం పముఞ్చే.

౬౧. సచే చ జఞ్ఞా అవిసయ్హమత్తనో, న తే హి మయ్హం [నాయం నీతి మయ్హ (సీ. పీ.)] సుఖాగమాయ;

ఏకోవ తిబ్బాని సహేయ్య ధీరో, సచ్చం హిరోత్తప్పమపేక్ఖమానో.

౬౨. అహం రట్ఠాని విచరన్తో, నిగమే రాజధానియో;

భిక్ఖమానో మహారాజ, ఆచరియస్స ధనత్థికో.

౬౩. గహపతీ రాజపురిసే, మహాసాలే చ బ్రాహ్మణే;

అలత్థం సత్త నిక్ఖాని, సువణ్ణస్స జనాధిప;

తే మే నట్ఠా మహారాజ, తస్మా సోచామహం భుసం.

౬౪. పురిసా తే మహారాజ, మనసానువిచిన్తితా;

నాలం దుక్ఖా పమోచేతుం, తస్మా తేసం న బ్యాహరిం.

౬౫. త్వఞ్చ ఖో మే మహారాజ, మనసానువిచిన్తితో;

అలం దుక్ఖా పమోచేతుం, తస్మా తుయ్హం పవేదయిం.

౬౬. తస్సాదాసి పసన్నత్తో, కాసీనం రట్ఠవడ్ఢనో;

జాతరూపమయే నిక్ఖే, సువణ్ణస్స చతుద్దసాతి.

దూతజాతకం పఞ్చమం.