౪౭౬. జవనహంసజాతకం (౩)

౨౭. ఇధేవ హంస నిపత, పియం మే తవ దస్సనం;

ఇస్సరోసి అనుప్పత్తో, యమిధత్థి పవేదయ.

౨౮. సవనేన ఏకస్స పియా భవన్తి, దిస్వా పనేకస్స వియేతి [వినేతి (స్యా.), విహేతి (పీ.), విగేతి (క. అట్ఠ.)] ఛన్దో;

దిస్వా చ సుత్వా చ పియా భవన్తి, కచ్చిన్ను మే పీయసి [పియ్యసి (సీ. పీ.)] దస్సనేన.

౨౯. సవనేన పియో మేసి, భియ్యో చాగమ్మ దస్సనం;

ఏవం పియదస్సనో మే [ఏవం పియదస్సనో సమానో (సీ. స్యా. పీ.)], వస హంస మమన్తికే [మమ సన్తికే (సీ. స్యా. పీ.)].

౩౦. వసేయ్యామ తవాగారే, నిచ్చం సక్కతపూజితా;

మత్తో చ ఏకదా వజ్జే [వజ్జా (సీ. పీ.)], ‘‘హంసరాజం పచన్తు మే’’.

౩౧. ధిరత్థు తం మజ్జపానం, యం మే పియతరం తయా;

న చాపి మజ్జం పిస్సామి [పివిస్సామి (స్యా.), పాయామి (సీ. పీ.)], యావ మే వచ్ఛసీ ఘరే.

౩౨. సువిజానం సిఙ్గాలానం, సకుణానఞ్చ [సకున్తానఞ్చ (సీ. స్యా. పీ.)] వస్సితం;

మనుస్సవస్సితం రాజ, దుబ్బిజానతరం తతో.

౩౩. అపి చే మఞ్ఞతీ పోసో, ఞాతి మిత్తో సఖాతి వా;

యో పుబ్బే సుమనో హుత్వా, పచ్ఛా సమ్పజ్జతే దిసో.

౩౪. యస్మిం మనో నివిసతి, అవిదూరే సహాపి సో;

సన్తికేపి హి సో దూరే, యస్మిం నావిసతే [యస్మా వివసతే (సీ. స్యా. పీ.)] మనో.

౩౫. అన్తోపి సో హోతి పసన్నచిత్తో, పారం సముద్దస్స పసన్నచిత్తో;

అన్తోపి సో హోతి పదుట్ఠచిత్తో, పారం సముద్దస్స పదుట్ఠచిత్తో.

౩౬. సంవసన్తా వివసన్తి, యే దిసా తే రథేసభ;

ఆరా సన్తో సంవసన్తి, మనసా రట్ఠవడ్ఢన.

౩౭. అతిచిరం నివాసేన, పియో భవతి అప్పియో;

ఆమన్త ఖో తం గచ్ఛామ [గచ్ఛామి (స్యా.)], పురా తే హోమ అప్పియా [హోమి అప్పియో (స్యా.)].

౩౮. ఏవం చే యాచమానానం, అఞ్జలిం నావబుజ్ఝసి;

పరిచారకానం సతం [సన్తానం (సీ. స్యా.), సత్తానం (పీ.)], వచనం న కరోసి నో;

ఏవం తం అభియాచామ, పున కయిరాసి పరియాయం.

౩౯. ఏవం చే నో విహరతం, అన్తరాయో న హేస్సతి;

తుయ్హఞ్చాపి [వాపి (స్యా. పీ. క.)] మహారాజ, మయ్హఞ్చ [వా (బహూసు)] రట్ఠవడ్ఢన;

అప్పేవ నామ పస్సేము [పస్సేమ (సీ. స్యా. పీ.)], అహోరతానమచ్చయేతి.

జవనహంసజాతకం తతియం.