౪౬౯. మహాకణ్హజాతకం (౬)

౬౧. కణ్హో కణ్హో చ ఘోరో చ, సుక్కదాఠో పభాసవా [పతాపవా (సీ. స్యా. పీ.)];

బద్ధో పఞ్చహి రజ్జూహి, కిం రవి [ధీర (సీ. పీ.), వీర (స్యా.)] సునఖో తవ.

౬౨. నాయం మిగానమత్థాయ, ఉసీనక [ఉసీనర (సీ. పీ.), ఉసీన్నర (స్యా.)] భవిస్సతి;

మనుస్సానం అనయో హుత్వా, తదా కణ్హో పమోక్ఖతి.

౬౩. పత్తహత్థా సమణకా, ముణ్డా సఙ్ఘాటిపారుతా;

నఙ్గలేహి కసిస్సన్తి, తదా కణ్హో పమోక్ఖతి.

౬౪. తపస్సినియో [తపనీయా (క.) దుతియన్తపదాని హేతాని] పబ్బజితా, ముణ్డా సఙ్ఘాటిపారుతా;

యదా లోకే గమిస్సన్తి, తదా కణ్హో పమోక్ఖతి.

౬౫. దీఘోత్తరోట్ఠా జటిలా, పఙ్కదన్తా రజస్సిరా;

ఇణం చోదాయ [వోదాయ (సీ. పీ.), చోదయ (స్యా.)] గచ్ఛన్తి, తదా కణ్హో పమోక్ఖతి.

౬౬. అధిచ్చ వేదే [వేదం (క.)] సావిత్తిం, యఞ్ఞతన్తఞ్చ [తన్త్రఞ్చ (సీ. స్యా. పీ.)] బ్రాహ్మణా;

భతికాయ యజిస్సన్తి, తదా కణ్హో పమోక్ఖతి.

౬౭. మాతరం పితరఞ్చాపి, జిణ్ణకం గతయోబ్బనం;

పహూ సన్తో [సన్తా (సీ.)] న భరన్తి, తదా కణ్హో పమోక్ఖతి.

౬౮. మాతరం పితరఞ్చాపి, జిణ్ణకం గతయోబ్బనం;

బాలా తుమ్హేతి వక్ఖన్తి, తదా కణ్హో పమోక్ఖతి.

౬౯. ఆచరియభరియం సఖిం [ఆచరియభరియం సఖాభరియం (సీ. పీ.)], మాతులానిం పితుచ్ఛకిం [పితుచ్ఛయం (సీ.), పితుచ్ఛసం (పీ.)];

యదా లోకే గమిస్సన్తి, తదా కణ్హో పమోక్ఖతి.

౭౦. అసిచమ్మం గహేత్వాన, ఖగ్గం పగ్గయ్హ బ్రాహ్మణా;

పన్థఘాతం కరిస్సన్తి, తదా కణ్హో పమోక్ఖతి.

౭౧. సుక్కచ్ఛవీ వేధవేరా, థూలబాహూ అపాతుభా;

మిత్తభేదం కరిస్సన్తి, తదా కణ్హో పమోక్ఖతి.

౭౨. మాయావినో నేకతికా, అసప్పురిసచిన్తకా;

యదా లోకే భవిస్సన్తి, తదా కణ్హో పమోక్ఖతీతి.

మహాకణ్హజాతకం ఛట్ఠం.