౪౫౯. పానీయజాతకం (౫)

౫౯. మిత్తో మిత్తస్స పానీయం, అదిన్నం పరిభుఞ్జిసం;

తేన పచ్ఛా విజిగుచ్ఛిం, తం పాపం పకతం మయా;

మా పున అకరం పాపం, తస్మా పబ్బజితో అహం.

౬౦. పరదారఞ్చ దిస్వాన, ఛన్దో మే ఉదపజ్జథ [ఉపపజ్జథ (స్యా. క.)];

తేన పచ్ఛా విజిగుచ్ఛిం, తం పాపం పకతం మయా;

మా పున అకరం పాపం, తస్మా పబ్బజితో అహం.

౬౧. పితరం మే మహారాజ, చోరా అగణ్హు [అగణ్హుం (సీ. పీ.), అగణ్హి (క.)] కాననే;

తేసాహం పుచ్ఛితో జానం, అఞ్ఞథా నం వియాకరిం.

౬౨. తేన పచ్ఛా విజిగుచ్ఛిం, తం పాపం పకతం మయా;

మా పున అకరం పాపం, తస్మా పబ్బజితో అహం.

౬౩. పాణాతిపాతమకరుం, సోమయాగే ఉపట్ఠితే;

తేసాహం సమనుఞ్ఞాసిం, తేన పచ్ఛా విజిగుచ్ఛిం.

౬౪. తం పాపం పకతం మయా, మా పున అకరం పాపం;

తస్మా పబ్బజితో అహం.

౬౫. సురామేరయమాధుకా [మధుకా (సీ. స్యా. పీ.)], యే జనా పఠమాసు నో;

బహూనం తే అనత్థాయ, మజ్జపానమకప్పయుం.

౬౬. తేసాహం సమనుఞ్ఞాసిం, తేన పచ్ఛా విజిగుచ్ఛిం;

తం పాపం పకతం మయా, మా పున అకరం పాపం;

తస్మా పబ్బజితో అహం.

౬౭. ధిరత్థు సుబహూ కామే, దుగ్గన్ధే బహుకణ్టకే;

యే అహం పటిసేవన్తో, నాలభిం తాదిసం సుఖం.

౬౮. మహస్సాదా సుఖా కామా, నత్థి కామా పరం [కామపరం (సీ. పీ.)] సుఖం;

యే కామే పటిసేవన్తి, సగ్గం తే ఉపపజ్జరే.

౬౯. అప్పస్సాదా దుఖా కామా, నత్థి కామా పరం దుఖం;

యే కామే పటిసేవన్తి, నిరయం తే ఉపపజ్జరే.

౭౦. అసీ యథా సునిసితో, నేత్తింసోవ సుపాయికో [సుపాసితో (క. సీ. నియ్య), సుపాయితో (క. అట్ఠ.)];

సత్తీవ ఉరసి ఖిత్తా, కామా దుక్ఖతరా తతో.

౭౧. అఙ్గారానంవ జలితం, కాసుం సాధికపోరిసం;

ఫాలంవ దివసంతత్తం, కామా దుక్ఖతరా తతో.

౭౨. విసం యథా హలాహలం, తేలం పక్కుథితం [ఉక్కట్ఠితం (సీ. పీ.), పక్కుట్ఠితం (స్యా.)] యథా;

తమ్బలోహ [తమ్పలోహం (స్యా.)] విలీనంవ, కామా దుక్ఖతరా తతోతి.

పానీయజాతకం పఞ్చమం.