౪౫౨. భూరిపఞ్ఞజాతకం (౧౪)

౧౪౫. సచ్చం కిర త్వం అపి [త్వమ్పి (సీ.), తువమ్పి (స్యా.), త్వం అసి (క.)] భూరిపఞ్ఞ, యా తాదిసీ సీరి ధితీ మతీ చ;

న తాయతేభావవసూపనితం, యో యవకం భుఞ్జసి అప్పసూపం.

౧౪౬. సుఖం దుక్ఖేన పరిపాచయన్తో, కాలా కాలం విచినం ఛన్దఛన్నో;

అత్థస్స ద్వారాని అవాపురన్తో, తేనాహం తుస్సామి యవోదనేన.

౧౪౭. కాలఞ్చ ఞత్వా అభిజీహనాయ, మన్తేహి అత్థం పరిపాచయిత్వా;

విజమ్భిస్సం సీహవిజమ్భితాని, తాయిద్ధియా దక్ఖసి మం పునాపి.

౧౪౮. సుఖీపి హేకే [సుఖీ హి ఏకే (సీ.), సుఖీతి హేకే (?)] న కరోన్తి పాపం, అవణ్ణసంసగ్గభయా పునేకే;

పహూ సమానో విపులత్థచిన్తీ, కింకారణా మే న కరోసి దుక్ఖం.

౧౪౯. న పణ్డితా అత్తసుఖస్స హేతు, పాపాని కమ్మాని సమాచరన్తి;

దుక్ఖేన ఫుట్ఠా ఖలితాపి సన్తా, ఛన్దా చ దోసా న జహన్తి ధమ్మం.

౧౫౦. యేన కేనచి వణ్ణేన, ముదునా దారుణేన వా;

ఉద్ధరే దీనమత్తానం, పచ్ఛా ధమ్మం సమాచరే.

౧౫౧. యస్స రుక్ఖస్స ఛాయాయ, నిసీదేయ్య సయేయ్య వా;

న తస్స సాఖం భఞ్జేయ్య, మిత్తదుబ్భో హి పాపకో.

౧౫౨. యస్సాపి [యస్స హి (సీ. క.)] ధమ్మం పురిసో [మనుజో (సీ.)] విజఞ్ఞా, యే చస్స కఙ్ఖం వినయన్తి సన్తో;

తం హిస్స దీపఞ్చ పరాయనఞ్చ, న తేన మేత్తిం జరయేథ పఞ్ఞో.

౧౫౩. అలసో గిహీ కామభోగీ న సాధు, అసఞ్ఞతో పబ్బజితో న సాధు;

రాజా న సాధు అనిసమ్మకారీ, యో పణ్డితో కోధనో తం న సాధు.

౧౫౪. నిసమ్మ ఖత్తియో కయిరా, నానిసమ్మ దిసమ్పతి;

నిసమ్మకారినో రాజ, యసో కిత్తి చ వడ్ఢతీతి.

భూరిపఞ్ఞజాతకం చుద్దసమం.