౪౪౬. తక్కలజాతకం (౮)

౮౨. న తక్కలా సన్తి న ఆలువాని [ఆలుపాని (సీ. స్యా. పీ.)], న బిళాలియో న కళమ్బాని తాత;

ఏకో అరఞ్ఞమ్హి సుసానమజ్ఝే, కిమత్థికో తాత ఖణాసి కాసుం.

౮౩. పితామహో తాత సుదుబ్బలో తే, అనేకబ్యాధీహి దుఖేన ఫుట్ఠో;

తమజ్జహం నిఖణిస్సామి సోబ్భే, న హిస్స తం జీవితం రోచయామి.

౮౪. సఙ్కప్పమేతం పటిలద్ధ పాపకం, అచ్చాహితం కమ్మ కరోసి లుద్దం;

మయాపి తాత పటిలచ్ఛసే తువం, ఏతాదిసం కమ్మ జరూపనీతో;

తం కుల్లవత్తం అనువత్తమానో, అహమ్పి తం నిఖణిస్సామి సోబ్భే.

౮౫. ఫరుసాహి వాచాహి పకుబ్బమానో, ఆసజ్జ మం త్వం వదసే కుమార;

పుత్తో మమం ఓరసకో సమానో, అహితానుకమ్పీ మమ త్వంసి పుత్త.

౮౬. న తాహం [త్యాహం (స్యా.)] తాత అహితానుకమ్పీ, హితానుకమ్పీ తే అహమ్పి [అహఞ్హి (స్యా.)] తాత;

పాపఞ్చ తం కమ్మ పకుబ్బమానం, అరహామి నో వారయితుం తతో.

౮౭. యో మాతరం వా పితరం సవిట్ఠ [మాతరం పితరం వా వసిట్ఠ (సీ. పీ.)], అదూసకే హింసతి పాపధమ్మో;

కాయస్స భేదా అభిసమ్పరాయం, అసంసయం సో నిరయం ఉపేతి [పరేతి (సీ. పీ.)].

౮౮. యో మాతరం వా పితరం సవిట్ఠ, అన్నేన పానేన ఉపట్ఠహాతి;

కాయస్స భేదా అభిసమ్పరాయం, అసంసయం సో సుగతిం ఉపేతి.

౮౯. న మే త్వం పుత్త అహితానుకమ్పీ, హితానుకమ్పీ మే [మమ (?)] త్వంసి పుత్త;

అహఞ్చ తం మాతరా వుచ్చమానో, ఏతాదిసం కమ్మ కరోమి లుద్దం.

౯౦. యా తే సా భరియా అనరియరూపా, మాతా మమేసా సకియా జనేత్తి;

నిద్ధాపయే [నిద్ధామసే (పీ.)] తఞ్చ సకా అగారా, అఞ్ఞమ్పి తే సా దుఖమావహేయ్య.

౯౧. యా తే సా భరియా అనరియరూపా, మాతా మమేసా సకియా జనేత్తి;

దన్తా కరేణూవ వసూపనీతా, సా పాపధమ్మా పునరావజాతూతి.

తక్కలజాతకం అట్ఠమం.