౯. అపాయిమ్హవగ్గో

౮౧. అపాయిమ్హ అనచ్చిమ్హ, అగాయిమ్హ రుదిమ్హ చ;

విసఞ్ఞికరణిం పిత్వా [పీత్వా (సీ. స్యా. పీ.)], దిట్ఠా నాహుమ్హ వానరాతి.

సురాపానజాతకం పఠమం.

౮౨. అతిక్కమ్మ రమణకం, సదామత్తఞ్చ దూభకం;

స్వాసి పాసాణమాసీనో, యస్మా జీవం న మోక్ఖసీతి.

మిత్తవిన్దకజాతకం దుతియం.

౮౩. మిత్తో హవే సత్తపదేన హోతి, సహాయో పన ద్వాదసకేన హోతి;

మాసడ్ఢమాసేన చ ఞాతి హోతి, తతుత్తరిం అత్తసమోపి హోతి;

సోహం కథం అత్తసుఖస్స హేతు, చిరసన్థుతం [చిరసన్ధవం (క.), చిరసత్థునం (పీ.)] కాళకణ్ణిం జహేయ్యన్తి.

కాలకణ్ణిజాతకం తతియం.

౮౪. ఆరోగ్యమిచ్ఛే పరమఞ్చ లాభం, సీలఞ్చ వుద్ధానుమతం సుతఞ్చ;

ధమ్మానువత్తీ చ అలీనతా చ, అత్థస్స ద్వారా పముఖా ఛళేతేతి.

అత్థస్సద్వారజాతకం చతుత్థం.

౮౫. ఆయతిం దోసం నాఞ్ఞాయ, యో కామే పటిసేవతి;

విపాకన్తే హనన్తి నం, కింపక్కమివ భక్ఖితన్తి.

కింపక్కజాతకం పఞ్చమం.

౮౬. సీలం కిరేవ కల్యాణం, సీలం లోకే అనుత్తరం;

పస్స ఘోరవిసో నాగో, సీలవాతి న హఞ్ఞతీతి.

సీలవీమంసకజాతకం ఛట్ఠం.

౮౭. యస్స మఙ్గలా సమూహతాసే [సమూహతా (సీ. స్యా. పీ. సు. ని. ౩౬౨], ఉప్పాతా [ఉప్పాదా (పీ.)] సుపినా చ లక్ఖణా చ;

సో [స (సీ. పీ. క.)] మఙ్గలదోసవీతివత్తో, యుగయోగాధిగతో న జాతుమేతీతి.

మఙ్గలజాతకం సత్తమం.

౮౮. కల్యాణిమేవ ముఞ్చేయ్య, న హి ముఞ్చేయ్య పాపికం;

మోక్ఖో కల్యాణియా సాధు, ముత్వా తప్పతి పాపికన్తి.

సారమ్భజాతకం అట్ఠమం.

౮౯. వాచావ కిర తే ఆసి, సణ్హా సఖిలభాణినో;

తిణమత్తే అసజ్జిత్థో, నో చ నిక్ఖసతం హరన్తి.

కుహకజాతకం నవమం.

౯౦. యో పుబ్బే కతకల్యాణో, కతత్థో నావబుజ్ఝతి;

పచ్ఛా కిచ్చే సముప్పన్నే, కత్తారం నాధిగచ్ఛతీతి.

అకతఞ్ఞుజాతకం దసమం.

అపాయిమ్హవగ్గో నవమో.

తస్సుద్దానం –

అపాయిమ్హ చ దూభకం సత్తపదం, ఛళద్వర చ ఆయతినా చ పున;

అహిసీలవ మఙ్గలి పాపికస్సా, సతంనిక్ఖ కతత్థవరేన దసాతి.