౧౦. లిత్తవగ్గో

౯౧. లిత్తం పరమేన తేజసా, గిలమక్ఖం పురిసో న బుజ్ఝతి;

గిల రే గిల పాపధుత్తక, పచ్ఛా తే కటుకం భవిస్సతీతి.

లిత్తజాతకం పఠమం.

౯౨. ఉక్కట్ఠే సూరమిచ్ఛన్తి, మన్తీసు అకుతూహలం;

పియఞ్చ అన్నపానమ్హి, అత్థే జాతే చ పణ్డితన్తి.

మహాసారజాతకం దుతియం.

౯౩. న విస్ససే అవిస్సత్థే, విస్సత్థేపి న విస్ససే;

విస్సాసా భయమన్వేతి, సీహంవ మిగమాతుకాతి [మిగమాతుయా (క.)].

విసాసభోజనజాతకం తతియం.

౯౪. సోతత్తో సోసిన్దో [సోసీతో (సీ. స్యా. పీ.), సోసినో (క.)] చేవ, ఏకో భింసనకే వనే;

నగ్గో న చగ్గిమాసీనో, ఏసనాపసుతో మునీతి.

లోమహంసజాతకం చతుత్థం.

౯౫. అనిచ్చా వత సఙ్ఖారా, ఉప్పాదవయధమ్మినో;

ఉప్పజ్జిత్వా నిరుజ్ఝన్తి, తేసం వూపసమో సుఖోతి.

మహాసుదస్సనజాతకం పఞ్చమం.

౯౬. సమతిత్తికం అనవసేకం, తేలపత్తం యథా పరిహరేయ్య;

ఏవం సచిత్తమనురక్ఖే, పత్థయానో దిసం అగతపుబ్బన్తి.

తేలపత్తజాతకం ఛట్ఠం.

౯౭. జీవకఞ్చ మతం దిస్వా, ధనపాలిఞ్చ దుగ్గతం;

పన్థకఞ్చ వనే మూళ్హం, పాపకో పునరాగతోతి.

నామసిద్ధిజాతకం సత్తమం.

౯౮. సాధు ఖో పణ్డితో నామ, న త్వేవ అతిపణ్డితో;

అతిపణ్డితేన పుత్తేన, మనమ్హి ఉపకూళితోతి [ఉపకూలితోతి (సీ.), ఉపకుట్ఠితోతి (స్యా.), ఉపకుటితో (క.)].

కూటవాణిజజాతకం అట్ఠమం.

౯౯. పరోసహస్సమ్పి సమాగతానం, కన్దేయ్యుం తే వస్ససతం అపఞ్ఞా;

ఏకోవ సేయ్యో పురిసో సపఞ్ఞో, యో భాసితస్స విజానాతి అత్థన్తి.

పరోసహస్సజాతకం నవమం.

౧౦౦. అసాతం సాతరూపేన, పియరూపేన అప్పియం;

దుక్ఖం సుఖస్స రూపేన, పమత్తమతివత్తతీతి.

అసాతరూపజాతకం దసమం.

లిత్తవగ్గో దసమో.

తస్సుద్దానం –

గిలమక్ఖకుతూహల మాతుకస్సా, మునినా చ అనిచ్చత పత్తవరం;

ధనపాలివరో అతిపణ్డితకో, సపరోసహస్సఅసాతదసాతి.

మజ్ఝిమో పణ్ణాసకో.