౧౧. పరోసతవగ్గో

౧౦౧. పరోసతం చేపి సమాగతానం, ఝాయేయ్యుం తే వస్ససతం అపఞ్ఞా;

ఏకోవ సేయ్యో పురిసో సపఞ్ఞో, యో భాసితస్స విజానాతి అత్థన్తి.

పరోసతజాతకం పఠమం.

౧౦౨. యో దుక్ఖఫుట్ఠాయ భవేయ్య తాణం, సో మే పితా దుబ్భి [దూభి (సీ. పీ.)] వనే కరోతి;

సా కస్స కన్దామి వనస్స మజ్ఝే, యో తాయితా సో సహసం [సహసా (సీ. స్యా. పీ.)] కరోతీతి.

పణ్ణికజాతకం దుతియం.

౧౦౩. యత్థ వేరీ నివిసతి [నివసతి (సీ. క.)], న వసే తత్థ పణ్డితో;

ఏకరత్తం దిరత్తం వా, దుక్ఖం వసతి వేరిసూతి.

వేరిజాతకం తతియం.

౧౦౪. చతుబ్భి అట్ఠజ్ఝగమా, అట్ఠాహిపి చ సోళస;

సోళసాహి చ బాత్తింస [బత్తింస (సీ. స్యా. పీ.)], అత్రిచ్ఛం చక్కమాసదో;

ఇచ్ఛాహతస్స పోసస్స, చక్కం భమతి మత్థకేతి.

మిత్తవిన్దకజాతకం చతుత్థం.

౧౦౫. బహుమ్పేతం వనే కట్ఠం, వాతో భఞ్జతి దుబ్బలం;

తస్స చే భాయసీ నాగ, కిసో నూన భవిస్ససీతి.

దుబ్బలకట్ఠజాతకం పఞ్చమం.

౧౦౬. సుఖం వత మం జీవన్తం [సుఖకం వత జీవం (క.)], పచమానా ఉదఞ్చనీ;

చోరీ జాయప్పవాదేన, తేలం లోణఞ్చ యాచతీతి.

ఉదఞ్చనీజాతకం ఛట్ఠం.

౧౦౭. సాధు ఖో సిప్పకం నామ, అపి యాదిస కీదిసం;

పస్స ఖఞ్జప్పహారేన, లద్ధా గామా చతుద్దిసాతి.

సాలిత్తకజాతకం సత్తమం.

౧౦౮. సిక్ఖేయ్య సిక్ఖితబ్బాని, సన్తి తచ్ఛన్దినో [సచ్ఛన్దినో (సీ. పీ.)] జనా;

బాహియా హి [పి (సీ. స్యా. పీ.)] సుహన్నేన, రాజానమభిరాధయీతి.

బాహియజాతకం అట్ఠమం.

౧౦౯. యథన్నో పురిసో హోతి, తథన్నా తస్స దేవతా;

ఆహరేతం కుణ్డపూవం [కణం పూవం (సీ. పీ.)], మా మే భాగం వినాసయాతి.

కుణ్డపూవజాతకం నవమం.

౧౧౦. సబ్బసంహారకో [సబ్బసాహారకో (క.)] నత్థి, సుద్ధం కఙ్గు పవాయతి;

అలికం భాయతియం ధుత్తీ, సచ్చమాహ మహల్లికాతి.

సబ్బసంహారకపఞ్హజాతకం దసమం.

పరోసతవగ్గో ఏకాదసమో.

తస్సుద్దానం –

సపరోసత తాయిత వేరీ పున, భమచక్కథ నాగసిరివ్హయనో;

సుఖకఞ్చ వత సిప్పక బాహియా, కుణ్డపూవ మహల్లికకా చ దసాతి.