౮. వరుణవగ్గో

౭౧. యో పుబ్బే కరణీయాని, పచ్ఛా సో కాతుమిచ్ఛతి;

వరుణకట్ఠ [వరణకట్ఠ (సీ. పీ.)] భఞ్జోవ, స పచ్ఛా మనుతప్పతీతి.

వరుణజాతకం పఠమం.

౭౨. అకతఞ్ఞుస్స పోసస్స, నిచ్చం వివరదస్సినో;

సబ్బం చే పథవిం [పఠవిం (సీ. స్యా. పీ.)] దజ్జా, నేవ నం అభిరాధయేతి.

సీలవహత్థిజాతకం దుతియం.

౭౩. సచ్చం కిరేవమాహంసు, నరా ఏకచ్చియా ఇధ;

కట్ఠం నిప్లవితం [విప్లావితం (సీ. పీ.)] సేయ్యో, న త్వేవేకచ్చియో నరోతి.

సచ్చంకిరజాతకం తతియం.

౭౪. సాధూ సమ్బహులా ఞాతీ, అపి రుక్ఖా అరఞ్ఞజా;

వాతో వహతి ఏకట్ఠం, బ్రహన్తమ్పి వనప్పతిన్తి.

రుక్ఖధమ్మజాతకం చతుత్థం.

౭౫. అభిత్థనయ పజ్జున్న, నిధిం కాకస్స నాసయ;

కాకం సోకాయ రన్ధేహి, మఞ్చ సోకా పమోచయాతి.

మచ్ఛజాతకం పఞ్చమం.

౭౬. అసఙ్కియోమ్హి గామమ్హి, అరఞ్ఞే నత్థి మే భయం;

ఉజుం మగ్గం సమారూళ్హో, మేత్తాయ కరుణాయ చాతి.

అసఙ్కియజాతకం ఛట్ఠం.

౭౭. ఉసభా రుక్ఖా గావియో గవా చ, అస్సో కంసో సిఙ్గాలీ [సిగాసీ (సీ. స్యా. పీ.)] చ కుమ్భో;

పోక్ఖరణీ చ అపాకచన్దనం, లాబూని సీదన్తి సిలా ప్లవన్తి.

మణ్డూకియో కణ్హసప్పే గిలన్తి, కాకం సుపణ్ణా పరివారయన్తి;

తసా వకా ఏళకానం భయాహి, విపరియాసో [విపరియాయో (స్యా. క.)] వత్తతి నయిధ మత్థీతి.

మహాసుపినజాతకం సత్తమం.

౭౮. ఉభో ఖఞ్జా ఉభో కుణీ, ఉభో విసమచక్ఖుకా [చక్ఖులా (సీ. పీ.)];

ఉభిన్నం పిళకా [పీళకా (స్యా.)] జాతా, నాహం పస్సామి ఇల్లిసన్తి.

ఇల్లిసజాతకం అట్ఠమం.

౭౯. యతో విలుత్తా చ హతా చ గావో, దడ్ఢాని గేహాని జనో చ నీతో;

అథాగమా పుత్తహతాయ పుత్తో, ఖరస్సరం డిణ్డిమం [దేణ్డిమం (సీ. స్యా. పీ.), డిన్దిమం (క.)] వాదయన్తోతి.

ఖరస్సరజాతకం నవమం.

౮౦. యం తే పవికత్థితం పురే, అథ తే పూతిసరా సజన్తి పచ్ఛా;

ఉభయం న సమేతి భీమసేన, యుద్ధకథా చ ఇదఞ్చ తే విహఞ్ఞన్తి.

భీమసేనజాతకం దసమం.

వరుణవగ్గో [వరణవగ్గో (సీ. పీ.)] అట్ఠమో.

తస్సుద్దానం –

వరుణా అకతఞ్ఞూవరే తు సచ్చవరం, సవనప్పతినా చ అభిత్థనయ;

కరుణాయ సిలాప్లవ ఇల్లిసతో, పున డిణ్డిమపూతిసరేన దసాతి.