౫. అత్థకామవగ్గో

౪౧. యో అత్థకామస్స హితానుకమ్పినో, ఓవజ్జమానో న కరోతి సాసనం;

అజియా పాదమోలమ్బ [పాదమోలుమ్బ (సీ. స్యా. పీ.)], మిత్తకో వియ సోచతీతి.

లోసకజాతకం పఠమం.

౪౨. యో అత్థకామస్స హితానుకమ్పినో, ఓవజ్జమానో న కరోతి సాసనం;

కపోతకస్స వచనం అకత్వా, అమిత్తహత్థత్థగతోవ సేతీతి.

కపోతజాతకం దుతియం.

౪౩. యో అత్థకామస్స హితానుకమ్పినో, ఓవజ్జమానో న కరోతి సాసనం;

ఏవం సో నిహతో సేతి, వేళుకస్స యథా పితాతి.

వేళుకజాతకం తతియం.

౪౪. సేయ్యో అమిత్తో మతియా ఉపేతో, న త్వేవ మిత్తో మతివిప్పహీనో;

మకసం వధిస్సన్తి హి ఏళమూగో, పుత్తో పితు అబ్భిదా ఉత్తమఙ్గన్తి.

మకసజాతకం చతుత్థం.

౪౫. సేయ్యో అమిత్తో మేధావీ, యఞ్చే బాలానుకమ్పకో;

పస్స రోహిణికం జమ్మిం, మాతరం హన్త్వాన సోచతీతి.

రోహిణిజాతకం పఞ్చమం.

౪౬. న వే అనత్థకుసలేన, అత్థచరియా సుఖావహా;

హాపేతి అత్థం దుమ్మేధో, కపి ఆరామికో యథాతి.

ఆరామదూసకజాతకం ఛట్ఠం.

౪౭. న వే అనత్థకుసలేన, అత్థచరియా సుఖావహా;

హాపేతి అత్థం దుమ్మేధో, కోణ్డఞ్ఞో వారుణిం యథాతి.

వారుణిదూసకజాతకం సత్తమం.

౪౮. అనుపాయేన యో అత్థం, ఇచ్ఛతి సో విహఞ్ఞతి;

చేతా హనింసు వేదబ్బం [వేదబ్భం (సీ. పీ.)], సబ్బే తే బ్యసనమజ్ఝగూతి.

వేదబ్బ [వేదబ్భ (సీ. పీ.)] జాతకం అట్ఠమం.

౪౯. నక్ఖత్తం పటిమానేన్తం, అత్థో బాలం ఉపచ్చగా;

అత్థో అత్థస్స నక్ఖత్తం, కిం కరిస్సన్తి తారకాతి.

నక్ఖత్తజాతకం నవమం.

౫౦. దుమ్మేధానం సహస్సేన, యఞ్ఞో మే ఉపయాచితో;

ఇదాని ఖోహం యజిస్సామి, బహు [బహూ (సీ. పీ.), బహుం (క.)] అధమ్మికో జనోతి.

దుమ్మేధజాతకం దసమం.

అత్థకామవగ్గో పఞ్చమో.

తస్సుద్దానం –

అథ మిత్తక మాతు కపోతవరో, తథా వేళూక ఏళమూగో రోహిణీ;

కపి వారుణి చేతచరా చ పున, తథా తారక యఞ్ఞవరేన దసాతి.

పఠమో పణ్ణాసకో.