౬. ఆసీసవగ్గో

౫౧. ఆసీసేథేవ [ఆసింసేథేవ (సీ. స్యా. పీ.)] పురిసో, న నిబ్బిన్దేయ్య పణ్డితో;

పస్సామి వోహం అత్తానం, యథా ఇచ్ఛిం తథా అహూతి.

మహాసీలవజాతకం పఠమం.

౫౨. వాయమేథేవ పురిసో, న నిబ్బిన్దేయ్య పణ్డితో;

పస్సామి వోహం అత్తానం, ఉదకా థలముబ్భతన్తి.

చూళజనకజాతకం దుతియం.

౫౩. తథేవ పుణ్ణా పాతియో, అఞ్ఞాయం వత్తతే కథా;

ఆకారణేన [ఆకారకేన (సీ. స్యా. పీ.)] జానామి, న చాయం భద్దికా సురాతి.

పుణ్ణపాతిజాతకం తతియం.

౫౪. నాయం రుక్ఖో దురారుహో, నపి గామతో ఆరకా;

ఆకారణేన జానామి, నాయం సాదుఫలో దుమోతి.

కింఫలజాతకం చతుత్థం.

౫౫. యో అలీనేన చిత్తేన, అలీనమనసో నరో;

భావేతి కుసలం ధమ్మం, యోగక్ఖేమస్స పత్తియా;

పాపుణే అనుపుబ్బేన, సబ్బసంయోజనక్ఖయన్తి.

పఞ్చావుధజాతకం పఞ్చమం.

౫౬. యో పహట్ఠేన చిత్తేన, పహట్ఠమనసో నరో;

భావేతి కుసలం ధమ్మం, యోగక్ఖేమస్స పత్తియా;

పాపుణే అనుపుబ్బేన, సబ్బసంయోజనక్ఖయన్తి.

కఞ్చనక్ఖన్ధజాతకం ఛట్ఠం.

౫౭. యస్సేతే చతురో ధమ్మా, వానరిన్ద యథా తవ;

సచ్చం ధమ్మో ధితి [ధితీ (సీ. పీ.)] చాగో, దిట్ఠం సో అతివత్తతీతి.

వానరిన్దజాతకం సత్తమం.

౫౮. యస్సేతే చ [యస్స ఏతే (సీ. పీ.)] తయో ధమ్మా, వానరిన్ద యథా తవ;

దక్ఖియం సూరియం పఞ్ఞా, దిట్ఠం సో అతివత్తతీతి.

తయోధమ్మజాతకం అట్ఠమం.

౫౯. ధమే ధమే నాతిధమే, అతిధన్తఞ్హి పాపకం;

ధన్తేన హి సతం లద్ధం, అతిధన్తేన నాసితన్తి.

భేరివాదకజాతకం నవమం.

౬౦. ధమే ధమే నాతిధమే, అతిధన్తఞ్హి పాపకం;

ధన్తేనాధిగతా భోగా, తే తాతో విధమీ ధమన్తి.

సఙ్ఖధమజాతకం దసమం.

ఆసీసవగ్గో ఛట్ఠో.

తస్సుద్దానం –

యథా ఇచ్ఛిం తథాహుదకా థలా, సుర సాదుఫలో చ అలీనమనో;

సమ్పహట్ఠమనో చతురో చ తయో, సతలద్ధక భోగధనేన దసాతి.