౪. కులావకవగ్గో

౩౧. కులావకా మాతలి సిమ్బలిస్మిం, ఈసాముఖేన పరివజ్జయస్సు;

కామం చజామ అసురేసు పాణం, మా మే దిజా విక్కులవా [మాయిమే దిజా వికులావా (సీ. స్యా. పీ.)] అహేసున్తి.

కులావకజాతకం పఠమం.

౩౨. రుదం మనుఞ్ఞం రుచిరా చ పిట్ఠి, వేళురియవణ్ణూపనిభా [వణ్ణూపటిభా (స్యా.), వణ్ణసన్నిభా (క.)] చ గీవా;

బ్యామమత్తాని చ పేఖుణాని, నచ్చేన తే ధీతరం నో దదామీతి.

నచ్చజాతకం దుతియం.

౩౩. సమ్మోదమానా గచ్ఛన్తి, జాలమాదాయ పక్ఖినో;

యదా తే వివదిస్సన్తి, తదా ఏహిన్తి మే వసన్తి.

సమ్మోదమానజాతకం తతియం.

౩౪. న మం సీతం న మం ఉణ్హం, న మం జాలస్మి బాధనం;

యఞ్చ మం మఞ్ఞతే మచ్ఛీ, అఞ్ఞం సో రతియా గతోతి.

మచ్ఛజాతకం చతుత్థం.

౩౫. సన్తి పక్ఖా అపతనా, సన్తి పాదా అవఞ్చనా;

మాతాపితా చ నిక్ఖన్తా, జాతవేద పటిక్కమాతి.

వట్టకజాతకం పఞ్చమం.

౩౬. యం నిస్సితా జగతిరుహం విహఙ్గమా, స్వాయం అగ్గిం పముఞ్చతి;

దిసా భజథ వక్కఙ్గా [వఙ్కఙ్గా (స్యా.)], జాతం సరణతో భయన్తి.

సకుణజాతకం ఛట్ఠం.

౩౭. యే వుడ్ఢ [వద్ధ (సీ. పీ.)] మపచాయన్తి, నరా ధమ్మస్స కోవిదా;

దిట్ఠేవ ధమ్మే పాసంసా, సమ్పరాయే చ సుగ్గతీతి.

తిత్తిరజాతకం సత్తమం.

౩౮. నాచ్చన్తం నికతిప్పఞ్ఞో, నికత్యా సుఖమేధతి;

ఆరాధేతి నికతిప్పఞ్ఞో [ఆరాధే నికతిప్పఞ్ఞో (పీ.)], బకో కక్కటకామివాతి.

బకజాతకం అట్ఠమం.

౩౯. మఞ్ఞే సోవణ్ణయో రాసి, సోణ్ణమాలా చ నన్దకో;

యత్థ దాసో ఆమజాతో, ఠితో థుల్లాని [థూలాని (క.)] గజ్జతీతి.

నన్దజాతకం నవమం.

౪౦. కామం పతామి నిరయం, ఉద్ధంపాదో అవంసిరో;

నానరియం కరిస్సామి, హన్ద పిణ్డం పటిగ్గహాతి.

ఖదిరఙ్గారజాతకం దసమం.

కులావకవగ్గో చతుత్థో.

తస్సుద్దానం –

సిరిమాతలి ధీతర పక్ఖివరో, రతియాగతో మాతాపితా చ పున;

జగతీరుహ వుడ్ఢ సుకక్కటకో, తథా నన్దకపిణ్డవరేన దసాతి.