౧౩. కుసనాళివగ్గో

౧౨౧. కరే సరిక్ఖో అథ వాపి సేట్ఠో, నిహీనకో వాపి కరేయ్య ఏకో;

కరేయ్యుమేతే [కరేయ్యుం తే (సీ. పీ.)] బ్యసనే ఉత్తమత్థం, యథా అహం కుసనాళి రుచాయన్తి.

కుసనాళిజాతకం పఠమం.

౧౨౨. యసం లద్ధాన దుమ్మేధో, అనత్థం చరతి అత్తనో;

అత్తనో చ పరేసఞ్చ, హింసాయ పటిపజ్జతీతి.

దుమ్మేధజాతకం దుతియం.

౧౨౩. అసబ్బత్థగామిం వాచం, బాలో సబ్బత్థ భాసతి;

నాయం దధిం వేది న [న వేది (క.)] నఙ్గలీసం, దధిప్పయం [దధిమ్పయం (సీ. పీ.)] మఞ్ఞతి నఙ్గలీసన్తి.

నఙ్గలీసజాతకం తతియం.

౧౨౪. వాయమేథేవ పురిసో, న నిబ్బిన్దేయ్య పణ్డితో;

వాయామస్స ఫలం పస్స, భుత్తా అమ్బా అనీతిహన్తి.

అమ్బజాతకం చతుత్థం.

౧౨౫. బహుమ్పి సో వికత్థేయ్య, అఞ్ఞం జనపదం గతో;

అన్వాగన్త్వాన దూసేయ్య, భుఞ్జ భోగే కటాహకాతి.

కటాహకజాతకం పఞ్చమం.

౧౨౬. తదేవేకస్స [తథేవేకస్స (సీ. స్యా. పీ. అట్ఠ. మూలపాఠో)] కల్యాణం, తదేవేకస్స పాపకం;

తస్మా సబ్బం న కల్యాణం, సబ్బం వాపి న పాపకన్తి.

అసిలక్ఖణజాతకం ఛట్ఠం.

౧౨౭. తే దేసా తాని వత్థూని, అహఞ్చ వనగోచరో;

అనువిచ్చ ఖో తం గణ్హేయ్యుం, పివ [పిప (సీ. పీ.)] ఖీరం కలణ్డుకాతి.

కలణ్డుకజాతకం సత్తమం.

౧౨౮. యో వే ధమ్మం ధజం [ధమ్మధజం (స్యా. పీ. క.)] కత్వా, నిగూళ్హో పాపమాచరే;

విస్సాసయిత్వా భూతాని, బిళారం నామ తం వతన్తి.

బిళారవతజాతకం అట్ఠమం.

౧౨౯. నాయం సిఖా పుఞ్ఞహేతు, ఘాసహేతు అయం సిఖా;

నాఙ్గుట్ఠగణనం యాతి, అలం తే హోతు అగ్గికాతి.

అగ్గికభారద్వాజజాతకం నవమం.

౧౩౦. యథా వాచా చ భుఞ్జస్సు, యథా భుత్తఞ్చ బ్యాహర;

ఉభయం తే న సమేతి, వాచా భుత్తఞ్చ కోసియేతి.

కోసియజాతకం దసమం.

కుసనాళివగ్గో [సరిక్ఖవగ్గో (క.)] తేరసమో.

తస్సుద్దానం –

కుసనాళిసిరివ్హయనో చ యసం, దధి మమ్బ కటాహకపఞ్చమకో;

అథ పాపక ఖీర బిళారవతం, సిఖి కోసియసవ్హయనేన దసాతి.