౧౪. అసమ్పదానవగ్గో

౧౩౧. అసమ్పదానేనితరీతరస్స, బాలస్స మిత్తాని కలీ భవన్తి;

తస్మా హరామి భుసం అడ్ఢమానం, మా మే మిత్తి జీయిత్థ సస్సతాయన్తి.

అసమ్పదానజాతకం పఠమం.

౧౩౨. కుసలూపదేసే ధితియా దళ్హాయ చ, అనివత్తితత్తాభయభీరుతాయ [అవత్థితత్తాభయభీరుతాయ (సీ. స్యా. పీ.)] చ;

న రక్ఖసీనం వసమాగమిమ్హసే, స సోత్థిభావో మహతా భయేన మేతి.

భీరుక [పఞ్చగరుక (సీ. పీ.), పఞ్చభీరుక (స్యా.), అభయభీరుత§(?)] జాతకం దుతియం.

౧౩౩. ఖేమం యహిం తత్థ అరీ ఉదీరితో [అరి ఉద్ధరితో (క.)], దకస్స మజ్ఝే జలతే ఘతాసనో;

న అజ్జ వాసో మహియా మహీరుహే, దిసా భజవ్హో సరణాజ్జ నో భయన్తి.

ఘతాసనజాతకం తతియం.

౧౩౪. యే సఞ్ఞినో తేపి దుగ్గతా, యేపి అసఞ్ఞినో తేపి దుగ్గతా;

ఏతం ఉభయం వివజ్జయ, తం సమాపత్తిసుఖం అనఙ్గణన్తి.

ఝానసోధనజాతకం చతుత్థం.

౧౩౫. చన్దాభం సూరియాభఞ్చ, యోధ పఞ్ఞాయ గాధతి.

అవితక్కేన ఝానేన, హోతి ఆభస్సరూపగోతి.

చన్దాభజాతకం పఞ్చమం.

౧౩౬. యం లద్ధం తేన తుట్ఠబ్బం, అతిలోభో హి పాపకో;

హంసరాజం గహేత్వాన, సువణ్ణా పరిహాయథాతి.

సువణ్ణహంసజాతకం ఛట్ఠం.

౧౩౭. యత్థేకో లభతే బబ్బు, దుతియో తత్థ జాయతి;

తతియో చ చతుత్థో చ, ఇదం తే బబ్బుకా బిలన్తి.

బబ్బుజాతకం సత్తమం.

౧౩౮. కిం తే జటాహి దుమ్మేధ, కిం తే అజినసాటియా;

అబ్భన్తరం తే గహనం, బాహిరం పరిమజ్జసీతి.

గోధజాతకం అట్ఠమం.

౧౩౯. అక్ఖీ భిన్నా పటో నట్ఠో, సఖిగేహే చ భణ్డనం;

ఉభతో పదుట్ఠా కమ్మన్తా [పదుట్ఠకమ్మన్తో (సీ.), పదుట్ఠో కమ్మన్తో (పీ.)], ఉదకమ్హి థలమ్హి చాతి.

ఉభతోభట్ఠజాతకం నవమం.

౧౪౦. నిచ్చం ఉబ్బిగ్గహదయా, సబ్బలోకవిహేసకా;

తస్మా నేసం వసా నత్థి, కాకానమ్హాక [కాకానస్మాక (సీ. స్యా. పీ.)] ఞాతినన్తి.

కాకజాతకం దసమం.

అసమ్పదానవగ్గో చుద్దసమో.

తస్సుద్దానం –

ఇతరీతర రక్ఖసి ఖేమియో చ, పరోసతపఞ్హేన ఆభస్సరో పున;

అథ హంసవరుత్తమబబ్బుజటం, పటనట్ఠక కాకవరేన దసాతి.