౬. పఠమసేఖసుత్తం

౧౬. వుత్తఞ్హేతం భగవతా, వుత్తమరహతాతి మే సుతం –

‘‘సేఖస్స, భిక్ఖవే, భిక్ఖునో అప్పత్తమానసస్స అనుత్తరం యోగక్ఖేమం పత్థయమానస్స విహరతో అజ్ఝత్తికం అఙ్గన్తి కరిత్వా నాఞ్ఞం ఏకఙ్గమ్పి సమనుపస్సామి యం ఏవం బహూపకారం యథయిదం, భిక్ఖవే, యోనిసో మనసికారో. యోనిసో, భిక్ఖవే, భిక్ఖు మనసి కరోన్తో అకుసలం పజహతి, కుసలం భావేతీ’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యోనిసో మనసికారో, ధమ్మో సేఖస్స భిక్ఖునో;

నత్థఞ్ఞో ఏవం బహుకారో, ఉత్తమత్థస్స పత్తియా;

యోనిసో పదహం భిక్ఖు, ఖయం దుక్ఖస్స పాపుణే’’తి.

అయమ్పి అత్థో వుత్తో భగవతా, ఇతి మే సుతన్తి. ఛట్ఠం.