౧౬. పియవగ్గో

౨౦౯. అయోగే యుఞ్జమత్తానం, యోగస్మిఞ్చ అయోజయం;

అత్థం హిత్వా పియగ్గాహీ, పిహేతత్తానుయోగినం.

౨౧౦. మా పియేహి సమాగఞ్ఛి, అప్పియేహి కుదాచనం;

పియానం అదస్సనం దుక్ఖం, అప్పియానఞ్చ దస్సనం.

౨౧౧. తస్మా పియం న కయిరాథ, పియాపాయో హి పాపకో;

గన్థా తేసం న విజ్జన్తి, యేసం నత్థి పియాప్పియం.

౨౧౨. పియతో జాయతీ సోకో, పియతో జాయతీ [జాయతే (క.)] భయం;

పియతో విప్పముత్తస్స, నత్థి సోకో కుతో భయం.

౨౧౩. పేమతో జాయతీ సోకో, పేమతో జాయతీ భయం;

పేమతో విప్పముత్తస్స, నత్థి సోకో కుతో భయం.

౨౧౪. రతియా జాయతీ సోకో, రతియా జాయతీ భయం;

రతియా విప్పముత్తస్స, నత్థి సోకో కుతో భయం.

౨౧౫. కామతో జాయతీ సోకో, కామతో జాయతీ భయం;

కామతో విప్పముత్తస్స, నత్థి సోకో కుతో భయం.

౨౧౬. తణ్హాయ జాయతీ [జాయతే (క.)] సోకో, తణ్హాయ జాయతీ భయం;

తణ్హాయ విప్పముత్తస్స, నత్థి సోకో కుతో భయం.

౨౧౭. సీలదస్సనసమ్పన్నం, ధమ్మట్ఠం సచ్చవేదినం;

అత్తనో కమ్మ కుబ్బానం, తం జనో కురుతే పియం.

౨౧౮. ఛన్దజాతో అనక్ఖాతే, మనసా చ ఫుటో సియా;

కామేసు చ అప్పటిబద్ధచిత్తో [అప్పటిబన్ధచిత్తో (క.)], ఉద్ధంసోతోతి వుచ్చతి.

౨౧౯. చిరప్పవాసిం పురిసం, దూరతో సోత్థిమాగతం;

ఞాతిమిత్తా సుహజ్జా చ, అభినన్దన్తి ఆగతం.

౨౨౦. తథేవ కతపుఞ్ఞమ్పి, అస్మా లోకా పరం గతం;

పుఞ్ఞాని పటిగణ్హన్తి, పియం ఞాతీవ ఆగతం.

పియవగ్గో సోళసమో నిట్ఠితో.