౯. వట్టపోతకచరియా

౭౨. ‘‘పునాపరం యదా హోమి, మగధే వట్టపోతకో;

అజాతపక్ఖో తరుణో, మంసపేసి కులావకే.

౭౩. ‘‘ముఖతుణ్డకేనాహరిత్వా [ముఖతుణ్డేనాహరిత్వా (సీ.)], మాతా పోసయతీ మమం;

తస్సా ఫస్సేన జీవామి, నత్థి మే కాయికం బలం.

౭౪. ‘‘సంవచ్ఛరే గిమ్హసమయే, దవడాహో [వనదాహో (క.)] పదిప్పతి;

ఉపగచ్ఛతి అమ్హాకం, పావకో కణ్హవత్తనీ.

౭౫. ‘‘ధమధమా ఇతిఏవం, సద్దాయన్తో మహాసిఖీ;

అనుపుబ్బేన ఝాపేన్తో, అగ్గి మమముపాగమి.

౭౬. ‘‘అగ్గివేగభయాతీతా, తసితా మాతాపితా మమ;

కులావకే మం ఛడ్డేత్వా, అత్తానం పరిమోచయుం.

౭౭. ‘‘పాదే పక్ఖే పజహామి, నత్థి మే కాయికం బలం;

సోహం అగతికో తత్థ, ఏవం చిన్తేసహం తదా.

౭౮. ‘‘‘యేసాహం ఉపధావేయ్యం, భీతో తసితవేధితో;

తే మం ఓహాయ పక్కన్తా, కథం మే అజ్జ కాతవే.

౭౯. ‘‘‘అత్థి లోకే సీలగుణో, సచ్చం సోచేయ్యనుద్దయా;

తేన సచ్చేన కాహామి, సచ్చకిరియముత్తమం.

౮౦. ‘‘‘ఆవేజ్జేత్వా ధమ్మబలం, సరిత్వా పుబ్బకే జినే;

సచ్చబలమవస్సాయ, సచ్చకిరియమకాసహం.

౮౧. ‘‘‘సన్తి పక్ఖా అపతనా, సన్తి పాదా అవఞ్చనా;

మాతాపితా చ నిక్ఖన్తా, జాతవేద పటిక్కమ’.

౮౨. ‘‘సహసచ్చే కతే మయ్హం, మహాపజ్జలితో సిఖీ;

వజ్జేసి సోళసకరీసాని, ఉదకం పత్వా యథా సిఖీ;

సచ్చేన మే సమో నత్థి, ఏసా మే సచ్చపారమీ’’తి.

వట్టపోతకచరియం నవమం.