౧౧. కణ్హదీపాయనచరియా

౯౨. ‘‘పునాపరం యదా హోమి, కణ్హదీపాయనో ఇసి;

పరోపఞ్ఞాసవస్సాని, అనభిరతోచరిం అహం.

౯౩. ‘‘న కోచి ఏతం జానాతి, అనభిరతిమనం మమ;

అహఞ్హి కస్సచి నాచిక్ఖిం, అరతి మే చరతి మానసే.

౯౪. ‘‘సబ్రహ్మచారీ మణ్డబ్యో, సహాయో మే మహాఇసి;

పుబ్బకమ్మసమాయుత్తో, సూలమారోపనం లభి.

౯౫. ‘‘తమహం ఉపట్ఠహిత్వాన, ఆరోగ్యమనుపాపయిం;

ఆపుచ్ఛిత్వాన ఆగఞ్ఛిం, యం మయ్హం సకమస్సమం.

౯౬. ‘‘సహాయో బ్రాహ్మణో మయ్హం, భరియం ఆదాయ పుత్తకం;

తయో జనా సమాగన్త్వా, ఆగఞ్ఛుం పాహునాగతం.

౯౭. ‘‘సమ్మోదమానో తేహి సహ, నిసిన్నో సకమస్సమే;

దారకో వట్టమనుక్ఖిపం, ఆసీవిసమకోపయి.

౯౮. ‘‘తతో సో వట్టగతం మగ్గం, అన్వేసన్తో కుమారకో;

ఆసీవిసస్స హత్థేన, ఉత్తమఙ్గం పరామసి.

౯౯. ‘‘తస్స ఆమసనే కుద్ధో, సప్పో విసబలస్సితో;

కుపితో పరమకోపేన, అడంసి దారకం ఖణే.

౧౦౦. ‘‘సహదట్ఠో ఆసీవిసేన [అతివిసేన (పీ. క.)], దారకో పపతి [పతతి (క.)] భూమియం;

తేనాహం దుక్ఖితో ఆసిం, మమ వాహసి తం దుక్ఖం.

౧౦౧. ‘‘త్యాహం అస్సాసయిత్వాన, దుక్ఖితే సోకసల్లితే;

పఠమం అకాసిం కిరియం, అగ్గం సచ్చం వరుత్తమం.

౧౦౨. ‘‘‘సత్తాహమేవాహం పసన్నచిత్తో, పుఞ్ఞత్థికో అచరిం బ్రహ్మచరియం;

అథాపరం యం చరితం మమేదం, వస్సాని పఞ్ఞాససమాధికాని.

౧౦౩. ‘‘‘అకామకో వాహి అహం చరామి, ఏతేన సచ్చేన సువత్థి హోతు;

హతం విసం జీవతు యఞ్ఞదత్తో’.

౧౦౪. ‘‘సహ సచ్చే కతే మయ్హం, విసవేగేన వేధితో;

అబుజ్ఝిత్వాన వుట్ఠాసి, అరోగో చాసి మాణవో;

సచ్చేన మే సమో నత్థి, ఏసా మే సచ్చపారమీ’’తి.

కణ్హదీపాయనచరియం ఏకాదసమం.