౩. కురురాజచరియా

౨౦. ‘‘పునాపరం యదా హోమి, ఇన్దపత్థే [ఇన్దపత్తే (సీ. క.)] పురుత్తమే;

రాజా ధనఞ్చయో నామ, కుసలే దసహుపాగతో.

౨౧. ‘‘కలిఙ్గరట్ఠవిసయా, బ్రాహ్మణా ఉపగఞ్ఛు మం;

ఆయాచుం మం హత్థినాగం, ధఞ్ఞం మఙ్గలసమ్మతం.

౨౨. ‘‘‘అవుట్ఠికో జనపదో, దుబ్భిక్ఖో ఛాతకో మహా;

దదాహి పవరం నాగం, నీలం అఞ్జనసవ్హయం.

౨౩. ‘‘‘న మే యాచకమనుప్పత్తే, పటిక్ఖేపో అనుచ్ఛవో;

మా మే భిజ్జి సమాదానం, దస్సామి విపులం గజం’.

౨౪. ‘‘నాగం గహేత్వా సోణ్డాయ, భిఙ్గారే [భిఙ్కారే (సీ.)] రతనామయే;

జలం హత్థే ఆకిరిత్వా, బ్రాహ్మణానం అదం గజం.

౨౫. ‘‘తస్స నాగే పదిన్నమ్హి, అమచ్చా ఏతదబ్రవుం;

‘కిం ను తుయ్హం వరం నాగం, యాచకానం పదస్ససి.

౨౬. ‘‘‘ధఞ్ఞం మఙ్గలసమ్పన్నం, సఙ్గామవిజయుత్తమం;

తస్మిం నాగే పదిన్నమ్హి, కిం తే రజ్జం కరిస్సతి.

౨౭. ‘‘‘రజ్జమ్పి మే దదే సబ్బం, సరీరం దజ్జమత్తనో;

సబ్బఞ్ఞుతం పియం మయ్హం, తస్మా నాగం అదాసహ’’’న్తి.

కురురాజచరియం తతియం.