౨౭. గోతమబుద్ధవంసో

౧. అహమేతరహి సమ్బుద్ధో [బుద్ధో (సీ.)], గోతమో సక్యవడ్ఢనో;

పధానం పదహిత్వాన, పత్తో సమ్బోధిముత్తమం.

౨. బ్రహ్మునా యాచితో సన్తో, ధమ్మచక్కం పవత్తయిం;

అట్ఠారసన్నం కోటీనం, పఠమాభిసమయో అహు.

౩. తతో పరఞ్చ దేసేన్తే, నరదేవసమాగమే;

గణనాయ న వత్తబ్బో, దుతియాభిసమయో అహు.

౪. ఇధేవాహం ఏతరహి, ఓవదిం మమ అత్రజం;

గణనాయ న వత్తబ్బో, తతియాభిసమయో అహు.

౫. ఏకోసి సన్నిపాతో మే, సావకానం మహేసినం;

అడ్ఢతేళససతానం, భిక్ఖూనాసి సమాగమో.

౬. విరోచమానో విమలో, భిక్ఖుసఙ్ఘస్స మజ్ఝగో;

దదామి పత్థితం సబ్బం, మణీవ సబ్బకామదో.

౭. ఫలమాకఙ్ఖమానానం, భవచ్ఛన్దజహేసినం;

చతుసచ్చం పకాసేమి, అనుకమ్పాయ పాణినం.

౮. దసవీససహస్సానం, ధమ్మాభిసమయో అహు;

ఏకద్విన్నం అభిసమయో, గణనాతో అసఙ్ఖియో.

౯. విత్థారికం బాహుజఞ్ఞం, ఇద్ధం ఫీతం సుఫుల్లితం;

ఇధ మయ్హం సక్యమునినో, సాసనం సువిసోధితం.

౧౦. అనాసవా వీతరాగా, సన్తచిత్తా సమాహితా;

భిక్ఖూనేకసతా సబ్బే, పరివారేన్తి మం సదా.

౧౧. ఇదాని యే ఏతరహి, జహన్తి మానుసం భవం;

అప్పత్తమానసా సేఖా, తే భిక్ఖూ విఞ్ఞుగరహితా.

౧౨. అరియఞ్చ సంథోమయన్తా, సదా ధమ్మరతా జనా;

బుజ్ఝిస్సన్తి సతిమన్తో, సంసారసరితం గతా.

౧౩. నగరం కపిలవత్థు మే, రాజా సుద్ధోదనో పితా;

మయ్హం జనేత్తికా మాతా, మాయాదేవీతి వుచ్చతి.

౧౪. ఏకూనతింసవస్సాని, అగారం అజ్ఝహం వసిం;

రమ్మో సురమ్మో సుభకో, తయో పాసాదముత్తమా.

౧౫. చత్తారీససహస్సాని, నారియో సమలఙ్కతా;

భద్దకఞ్చనా నామ నారీ, రాహులో నామ అత్రజో.

౧౬. నిమిత్తే చతురో దిస్వా, అస్సయానేన నిక్ఖమిం;

ఛబ్బస్సం పధానచారం, అచరిం దుక్కరం అహం.

౧౭. బారాణసియం ఇసిపతనే, చక్కం పవత్తితం మయా;

అహం గోతమసమ్బుద్ధో, సరణం సబ్బపాణినం.

౧౮. కోలితో ఉపతిస్సో చ, ద్వే భిక్ఖూ అగ్గసావకా;

ఆనన్దో నాముపట్ఠాకో, సన్తికావచరో మమ;

ఖేమా ఉప్పలవణ్ణా చ, భిక్ఖునీ అగ్గసావికా.

౧౯. చిత్తో హత్థాళవకో చ, అగ్గుపట్ఠాకుపాసకా;

నన్దమాతా చ ఉత్తరా, అగ్గుపట్ఠికుపాసికా.

౨౦. అహం అస్సత్థమూలమ్హి, పత్తో సమ్బోధిముత్తమం;

బ్యామప్పభా సదా మయ్హం, సోళసహత్థముగ్గతా.

౨౧. అప్పం వస్ససతం ఆయు, ఇదానేతరహి విజ్జతి;

తావతా తిట్ఠమానోహం, తారేమి జనతం బహుం.

౨౨. ఠపయిత్వాన ధమ్ముక్కం, పచ్ఛిమం జనబోధనం;

అహమ్పి నచిరస్సేవ, సద్ధిం సావకసఙ్ఘతో;

ఇధేవ పరినిబ్బిస్సం, అగ్గీ వాహారసఙ్ఖయా.

౨౩. తాని చ అతులతేజాని, ఇమాని చ దసబలాని [యసబలాని (అట్ఠ.)];

అయఞ్చ గుణధారణో దేహో, ద్వత్తింసవరలక్ఖణవిచిత్తో.

౨౪. దస దిసా పభాసేత్వా, సతరంసీవ ఛప్పభా;

సబ్బం తమన్తరహిస్సన్తి, నను రిత్తా సబ్బసఙ్ఖారాతి.

గోతమస్స భగవతో వంసో పఞ్చవీసతిమో.