౧. సకచిన్తనియత్థేరఅపదానం

౧. ‘‘పవనం కాననం దిస్వా, అప్పసద్దమన్నావిలం;

ఇసీనం అనుచిణ్ణంవ, ఆహుతీనం పటిగ్గహం.

౨. ‘‘థూపం కత్వాన పులినం [వేళునా (అట్ఠ.), వేళినం (స్యా.)], నానాపుప్ఫం సమోకిరిం;

సమ్ముఖా వియ సమ్బుద్ధం, నిమ్మితం అభివన్దహం.

౩. ‘‘సత్తరతనసమ్పన్నో, రాజా రట్ఠమ్హి ఇస్సరో;

సకకమ్మాభిరద్ధోహం, పుప్ఫపూజాయిదం [థూపపూజాయిదం (సీ.)] ఫలం.

౪. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫపూజాయిదం [థూపపూజాయిదం (సీ.)] ఫలం.

౫. ‘‘అసీతికప్పేనన్తయసో, చక్కవత్తీ అహోసహం;

సత్తరతనసమ్పన్నో, చతుదీపమ్హి ఇస్సరో.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సకచిన్తనియో థేరో ఇమా గాథాయో అభాసిత్థాతి.

సకచిన్తనియత్థేరస్సాపదానం పఠమం.