౪. గన్ధోదకియత్థేరఅపదానం

౨౫. ‘‘పదుముత్తరబుద్ధస్స, మహాబోధిమహో అహు;

విచిత్తం ఘటమాదాయ, గన్ధోదకమదాసహం.

౨౬. ‘‘న్హానకాలే చ బోధియా, మహామేఘో పవస్సథ;

నిన్నాదో చ మహా ఆసి, అసనియా ఫలన్తియా.

౨౭. ‘‘తేనేవాసనివేగేన, తత్థ కాలఙ్కతో [కాలకతో (సీ. స్యా.)] అహం [అహుం (సీ.)];

దేవలోకే ఠితో సన్తో, ఇమా గాథా అభాసహం.

౨౮. ‘‘‘అహో బుద్ధో అహో ధమ్మో, అహో నో సత్థుసమ్పదా;

కళేవరం [కలేబరం (సీ.)] మే పతితం, దేవలోకే రమామహం.

౨౯. ‘‘‘ఉబ్బిద్ధం భవనం మయ్హం, సతభూమం సముగ్గతం;

కఞ్ఞాసతసహస్సాని, పరివారేన్తి మం సదా.

౩౦. ‘‘‘ఆబాధా మే న విజ్జన్తి, సోకో మయ్హం న విజ్జతి;

పరిళాహం న పస్సామి, పుఞ్ఞకమ్మస్సిదం ఫలం.

౩౧. ‘‘‘అట్ఠవీసే కప్పసతే, రాజా సంవసితో అహుం;

సత్తరతనసమ్పన్నో, చక్కవత్తీ మహబ్బలో’.

౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గన్ధోదకియో థేరో ఇమా గాథాయో అభాసిత్థాతి.

గన్ధోదకియత్థేరస్సాపదానం చతుత్థం.