౮. భద్దజిత్థేరఅపదానం

౯౮. ‘‘ఓగయ్హ యం పోక్ఖరణిం, నానాకుఞ్జరసేవితం;

ఉద్ధరామి భిసం తత్థ, ఘాసహేతు అహం తదా.

౯౯. ‘‘భగవా తమ్హి సమయే, పదుముత్తరసవ్హయో;

రత్తమ్బరధరో బుద్ధో, గచ్ఛతే అనిలఞ్జసే.

౧౦౦. ‘‘ధునన్తో పంసుకూలాని, సద్దం అస్సోసహం తదా;

ఉద్ధం నిజ్ఝాయమానోహం, అద్దసం లోకనాయకం.

౧౦౧. ‘‘తత్థేవ ఠితకో సన్తో, ఆయాచిం లోకనాయకం;

మధుం భిసేహి సహితం, ఖీరం సప్పిం ముళాలికం [మధుం భిసేహి పచతి, ఖీరసప్పి ములాలిభి (క.) భిసదాయకత్థేరాపదానేపి].

౧౦౨. ‘‘పటిగ్గణ్హాతు మే బుద్ధో, అనుకమ్పాయ చక్ఖుమా;

తతో కారుణికో సత్థా, ఓరోహిత్వా మహాయసో.

౧౦౩. ‘‘పటిగ్గణ్హి మమ భిక్ఖం, అనుకమ్పాయ చక్ఖుమా;

పటిగ్గహేత్వా సమ్బుద్ధో, అకా మే అనుమోదనం.

౧౦౪. ‘‘‘సుఖీ హోతు మహాపుఞ్ఞ, గతి తుయ్హం సమిజ్ఝతు;

ఇమినా భిసదానేన, లభస్సు విపులం సుఖం’.

౧౦౫. ‘‘ఇదం వత్వాన సమ్బుద్ధో, జలజుత్తమనామకో;

భిక్ఖమాదాయ సమ్బుద్ధో, ఆకాసేనాగమా జినో.

౧౦౬. ‘‘తతో భిసం గహేత్వాన, అగచ్ఛిం మమ అస్సమం;

భిసం రుక్ఖే లగ్గేత్వాన, మమ దానం అనుస్సరిం.

౧౦౭. ‘‘మహావాతో ఉట్ఠహిత్వా, సఞ్చాలేసి వనం తదా;

ఆకాసో అభినాదిత్థ, అసనీ చ ఫలీ తదా.

౧౦౮. ‘‘తతో మే అసనీపాతో, మత్థకే నిపతీ తదా;

సోహం నిసిన్నకో సన్తో, తత్థ కాలఙ్కతో అహం.

౧౦౯. ‘‘పుఞ్ఞకమ్మేన సఞ్ఞుత్తో, తుసితం ఉపపజ్జహం;

కళేవరం మే పతితం, దేవలోకే రమామహం.

౧౧౦. ‘‘ఛళసీతిసహస్సాని, నారియో సమలఙ్కతా;

సాయం పాతం ఉపట్ఠన్తి, భిసదానస్సిదం ఫలం.

౧౧౧. ‘‘మనుస్సయోనిమాగన్త్వా, సుఖితో హోమహం తదా;

భోగా మే ఊనతా నత్థి, భిసదానస్సిదం ఫలం.

౧౧౨. ‘‘అనుకమ్పితకో తేన, దేవదేవేన తాదినా;

సబ్బాసవపరిక్ఖీణా, నత్థి దాని పునబ్భవో.

౧౧౩. ‘‘సతసహస్సితో కప్పే, యం భిసం అదదిం తదా;

దుగ్గతిం నాభిజానామి, భిసదానస్సిదం ఫలం.

౧౧౪. ‘‘కిలేసా ఝాపితా మయ్హం…పే… విహరామి అనాసవో.

౧౧౫. ‘‘స్వాగతం వత మే ఆసి…పే… కతం బుద్ధస్స సాసనం.

౧౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా భద్దజిత్థేరో ఇమా గాథాయో

అభాసిత్థాతి.

భద్దజిత్థేరస్సాపదానం అట్ఠమం.