౫. వజ్జీపుత్తత్థేరఅపదానం

౪౯. ‘‘సహస్సరంసీ భగవా, సయమ్భూ అపరాజితో;

వివేకా వుట్ఠహిత్వాన, గోచరాయాభినిక్ఖమి.

౫౦. ‘‘ఫలహత్థో అహం దిస్వా, ఉపగచ్ఛిం నరాసభం;

పసన్నచిత్తో సుమనో, సవణ్టం అదదిం ఫలం.

౫౧. ‘‘చతున్నవుతితో కప్పే, యం ఫలం అదదిం తదా;

దుగ్గతిం నాభిజానామి, ఫలదానస్సిదం ఫలం.

౫౨. ‘‘కిలేసా ఝాపితా మయ్హం…పే… విహరామి అనాసవో.

౫౩. ‘‘స్వాగతం వత మే ఆసి…పే… కతం బుద్ధస్స సాసనం.

౫౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వజ్జీపుత్తో థేరో ఇమా గాథాయో

అభాసిత్థాతి.

వజ్జీపుత్తత్థేరస్సాపదానం పఞ్చమం.