౮. పులినథూపియత్థేరఅపదానం

౫౭. ‘‘హిమవన్తస్సావిదూరే, యమకో నామ పబ్బతో;

అస్సమో సుకతో మయ్హం, పణ్ణసాలా సుమాపితా.

౫౮. ‘‘నారదో నామ నామేన, జటిలో ఉగ్గతాపనో;

చతుద్దససహస్సాని, సిస్సా పరిచరన్తి మం.

౫౯. ‘‘పటిసల్లీనకో సన్తో, ఏవం చిన్తేసహం తదా;

‘సబ్బో జనో మం పూజేతి, నాహం పూజేమి కిఞ్చనం.

౬౦. ‘‘‘న మే ఓవాదకో అత్థి, వత్తా కోచి న విజ్జతి;

అనాచరియుపజ్ఝాయో, వనే వాసం ఉపేమహం.

౬౧. ‘‘‘ఉపాసమానో యమహం, గరుచిత్తం ఉపట్ఠహే;

సో మే ఆచరియో నత్థి, వనవాసో నిరత్థకో.

౬౨. ‘‘‘ఆయాగం మే గవేసిస్సం, గరుం భావనియం తథా;

సావస్సయో వసిస్సామి, న కోచి గరహిస్సతి’.

౬౩. ‘‘ఉత్తానకూలా నదికా, సుపతిత్థా మనోరమా;

సంసుద్ధపులినాకిణ్ణా, అవిదూరే మమస్సమం.

౬౪. ‘‘నదిం అమరికం నామ, ఉపగన్త్వానహం తదా;

సంవడ్ఢయిత్వా పులినం, అకం పులినచేతియం.

౬౫. ‘‘యే తే అహేసుం సమ్బుద్ధా, భవన్తకరణా మునీ;

తేసం ఏతాదిసో థూపో, తం నిమిత్తం కరోమహం.

౬౬. ‘‘కరిత్వా పులినం [పుళినే (సీ. స్యా. పీ.)] థూపం, సోవణ్ణం మాపయిం అహం;

సోణ్ణకిఙ్కణిపుప్ఫాని, సహస్సే తీణి పూజయిం.

౬౭. ‘‘సాయపాతం నమస్సామి, వేదజాతో కతఞ్జలీ;

సమ్ముఖా వియ సమ్బుద్ధం, వన్దిం పులినచేతియం.

౬౮. ‘‘యదా కిలేసా జాయన్తి, వితక్కా గేహనిస్సితా;

సరామి సుకతం థూపం, పచ్చవేక్ఖామి తావదే.

౬౯. ‘‘ఉపనిస్సాయ విహరం, సత్థవాహం వినాయకం;

కిలేసే సంవసేయ్యాసి, న యుత్తం తవ మారిస.

౭౦. ‘‘సహ ఆవజ్జితే థూపే, గారవం హోతి మే తదా;

కువితక్కే వినోదేసిం, నాగో తుత్తట్టితో యథా.

౭౧. ‘‘ఏవం విహరమానం మం, మచ్చురాజాభిమద్దథ;

తత్థ కాలఙ్కతో సన్తో, బ్రహ్మలోకమగచ్ఛహం.

౭౨. ‘‘యావతాయుం వసిత్వాన, తిదివే [తిదసే (సీ. పీ.)] ఉపపజ్జహం;

అసీతిక్ఖత్తుం దేవిన్దో, దేవరజ్జమకారయిం.

౭౩. ‘‘సతానం తీణిక్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౭౪. ‘‘సోణ్ణకిఙ్కణిపుప్ఫానం [తేసం కిఙ్కణిపుప్ఫానం (సీ.)], విపాకం అనుభోమహం;

ధాతీసతసహస్సాని, పరివారేన్తి మం [మే (క.)] భవే.

౭౫. ‘‘థూపస్స పరిచిణ్ణత్తా, రజోజల్లం న లిమ్పతి;

గత్తే సేదా న ముచ్చన్తి, సుప్పభాసో భవామహం.

౭౬. ‘‘అహో మే సుకతో థూపో, సుదిట్ఠామరికా నదీ;

థూపం కత్వాన పులినం, పత్తోమ్హి అచలం పదం.

౭౭. ‘‘కుసలం కత్తుకామేన, జన్తునా సారగాహినా;

నత్థి ఖేత్తం అఖేత్తం వా, పటిపత్తీవ సాధకా [సారికా (పీ.), సారకా (స్యా.), సారతా (క.)].

౭౮. ‘‘యథాపి బలవా పోసో, అణ్ణవం తరితుస్సహే;

పరిత్తం కట్ఠమాదాయ, పక్ఖన్దేయ్య మహాసరం.

౭౯. ‘‘ఇమాహం కట్ఠం నిస్సాయ, తరిస్సామి మహోదధిం;

ఉస్సాహేన వీరియేన, తరేయ్య ఉదధిం నరో.

౮౦. ‘‘తథేవ మే కతం కమ్మం, పరిత్తం థోకకఞ్చ యం;

తం కమ్మం ఉపనిస్సాయ, సంసారం సమతిక్కమిం.

౮౧. ‘‘పచ్ఛిమే భవే సమ్పత్తే, సుక్కమూలేన చోదితో;

సావత్థియం పురే జాతో, మహాసాలే సుఅడ్ఢకే.

౮౨. ‘‘సద్ధా మాతా పితా మయ్హం, బుద్ధస్స సరణం గతా;

ఉభో దిట్ఠపదా ఏతే, అనువత్తన్తి సాసనం.

౮౩. ‘‘బోధిపపటికం గయ్హ, సోణ్ణథూపమకారయుం;

సాయపాతం [సాయం పాతం (స్యా. క.)] నమస్సన్తి, సక్యపుత్తస్స సమ్ముఖా.

౮౪. ‘‘ఉపోసథమ్హి దివసే, సోణ్ణథూపం వినీహరుం;

బుద్ధస్స వణ్ణం కిత్తేన్తా, తియామం వీతినామయుం.

౮౫. ‘‘సహ దిస్వానహం [పసాదేత్వానహం (క.)] థూపం, సరిం పులినచేతియం;

ఏకాసనే నిసీదిత్వా, అరహత్తమపాపుణిం.

ద్వావీసతిమం భాణవారం.

౮౬. ‘‘గవేసమానో తం వీరం, ధమ్మసేనాపతిద్దసం;

అగారా నిక్ఖమిత్వాన, పబ్బజిం తస్స సన్తికే.

౮౭. ‘‘జాతియా సత్తవస్సేన, అరహత్తమపాపుణిం;

ఉపసమ్పాదయీ బుద్ధో, గుణమఞ్ఞాయ చక్ఖుమా.

౮౮. ‘‘దారకేనేవ సన్తేన, కిరియం నిట్ఠితం మయా;

కతం మే కరణీయజ్జ, సక్యపుత్తస్స సాసనే.

౮౯. ‘‘సబ్బవేరభయాతీతో, సబ్బసఙ్గాతిగో [సబ్బసఙ్కాతితో (క.)] ఇసి;

సావకో తే మహావీర, సోణ్ణథూపస్సిదం ఫలం.

౯౦. ‘‘కిలేసా ఝాపితా మయ్హం…పే… విహరామి అనాసవో.

౯౧. ‘‘స్వాగతం వత మే ఆసి…పే… కతం బుద్ధస్స సాసనం.

౯౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పులినథూపియో థేరో ఇమా గాథాయో

అభాసిత్థాతి.

పులినథూపియత్థేరస్సాపదానం అట్ఠమం.