౫౦. కిఙ్కణిపుప్ఫవగ్గో

౧. తికిఙ్కణిపుప్ఫియత్థేరఅపదానం

౧. ‘‘కణికారంవ జోతన్తం, నిసిన్నం పబ్బతన్తరే;

అద్దసం విరజం బుద్ధం, విపస్సిం లోకనాయకం.

౨. ‘‘తీణి కిఙ్కణిపుప్ఫాని, పగ్గయ్హ అభిరోపయిం;

సమ్బుద్ధమభిపూజేత్వా, గచ్ఛామి దక్ఖిణాముఖో.

౩. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౪. ‘‘ఏకనవుతితో కప్పే, యం బుద్ధమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౫. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౬. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౭. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తికిఙ్కణిపుప్ఫియో థేరో ఇమా

గాథాయో అభాసిత్థాతి.

తికిఙ్కణిపుప్ఫియత్థేరస్సాపదానం పఠమం.

౨. పంసుకూలపూజకత్థేరఅపదానం

౮. ‘‘హిమవన్తస్సావిదూరే, ఉదఙ్గణో నామ పబ్బతో;

తత్థద్దసం పంసుకూలం, దుమగ్గమ్హి విలమ్బితం.

౯. ‘‘తీణి కిఙ్కణిపుప్ఫాని, ఓచినిత్వానహం తదా;

హట్ఠో హట్ఠేన చిత్తేన, పంసుకూలమపూజయిం.

౧౦. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౧. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, పూజిత్వా అరహద్ధజం.

౧౨. ‘‘కిలేసా ఝాపితా మయ్హం…పే… విహరామి అనాసవో.

౧౩. ‘‘స్వాగతం వత మే ఆసి…పే… కతం బుద్ధస్స సాసనం.

౧౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పంసుకూలపూజకో థేరో ఇమా గాథాయో

అభాసిత్థాతి.

పంసుకూలపూజకత్థేరస్సాపదానం దుతియం.

౩. కోరణ్డపుప్ఫియత్థేరఅపదానం

౧౫. ‘‘వనకమ్మికో పురే ఆసిం, పితుమాతుమతేనహం [పితుపేతామహేనహం (సీ. స్యా. పీ.)];

పసుమారేన జీవామి, కుసలం మే న విజ్జతి.

౧౬. ‘‘మమ ఆసయసామన్తా, తిస్సో లోకగ్గనాయకో;

పదాని తీణి దస్సేసి, అనుకమ్పాయ చక్ఖుమా.

౧౭. ‘‘అక్కన్తే చ పదే దిస్వా, తిస్సనామస్స సత్థునో;

హట్ఠో హట్ఠేన చిత్తేన, పదే చిత్తం పసాదయిం.

౧౮. ‘‘కోరణ్డం పుప్ఫితం దిస్వా, పాదపం ధరణీరుహం;

సకోసకం గహేత్వాన, పదసేట్ఠమపూజయిం [పదసేట్ఠే అపూజయిం (సీ. పీ.)].

౧౯. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౦. ‘‘యం యం యోనుపపజ్జామి, దేవత్తం అథ మానుసం;

కోరణ్డకఛవి హోమి, సుప్పభాసో [సపభాసో (సీ. స్యా. పీ. క.)] భవామహం.

౨౧. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, పదపూజాయిదం ఫలం.

౨౨. ‘‘కిలేసా ఝాపితా మయ్హం…పే… విహరామి అనాసవో.

౨౩. ‘‘స్వాగతం వత మే ఆసి…పే… కతం బుద్ధస్స సాసనం.

౨౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కోరణ్డపుప్ఫియో థేరో ఇమా గాథాయో

అభాసిత్థాతి.

కోరణ్డపుప్ఫియత్థేరస్సాపదానం తతియం.

౪. కింసుకపుప్ఫియత్థేరఅపదానం

౨౫. ‘‘కింసుకం పుప్ఫితం దిస్వా, పగ్గహేత్వాన అఞ్జలిం;

బుద్ధసేట్ఠం సరిత్వాన, ఆకాసే అభిపూజయిం.

౨౬. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౭. ‘‘ఏకతింసే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౨౮. ‘‘కిలేసా ఝాపితా మయ్హం…పే… విహరామి అనాసవో.

౨౯. ‘‘స్వాగతం వత మే ఆసి…పే… కతం బుద్ధస్స సాసనం.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కింసుకపుప్ఫియో థేరో ఇమా గాథాయో

అభాసిత్థాతి.

కింసుకపుప్ఫియత్థేరస్సాపదానం చతుత్థం.

౫. ఉపడ్ఢదుస్సదాయకత్థేరఅపదానం

౩౧. ‘‘పదుముత్తరభగవతో, సుజాతో నామ సావకో;

పంసుకూలం గవేసన్తో, సఙ్కారే చరతే [చరతీ (సీ. క.)] తదా.

౩౨. ‘‘నగరే హంసవతియా, పరేసం భతకో అహం;

ఉపడ్ఢదుస్సం దత్వాన, సిరసా అభివాదయిం.

౩౩. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౩౪. ‘‘తేత్తింసక్ఖత్తుం దేవిన్దో, దేవరజ్జమకారయిం;

సత్తసత్తతిక్ఖత్తుఞ్చ, చక్కవత్తీ అహోసహం.

౩౫. ‘‘పదేసరజ్జం విపులం, గణనాతో అసఙ్ఖియం;

ఉపడ్ఢదుస్సదానేన, మోదామి అకుతోభయో.

౩౬. ‘‘ఇచ్ఛమానో చహం అజ్జ, సకాననం సపబ్బతం;

ఖోమదుస్సేహి ఛాదేయ్యం, అడ్ఢదుస్సస్సిదం ఫలం.

౩౭. ‘‘సతసహస్సితో కప్పే, యం దానమదదిం తదా;

దుగ్గతిం నాభిజానామి, అడ్ఢదుస్సస్సిదం ఫలం.

౩౮. ‘‘కిలేసా ఝాపితా మయ్హం…పే… విహరామి అనాసవో.

౩౯. ‘‘స్వాగతం వత మే ఆసి…పే… కతం బుద్ధస్స సాసనం.

౪౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉపడ్ఢదుస్సదాయకో థేరో ఇమా

గాథాయో అభాసిత్థాతి.

ఉపడ్ఢదుస్సదాయకత్థేరస్సాపదానం పఞ్చమం.

౬. ఘతమణ్డదాయకత్థేరఅపదానం

౪౧. ‘‘సుచిన్తితం భగవన్తం, లోకజేట్ఠం నరాసభం;

ఉపవిట్ఠం మహారఞ్ఞం, వాతాబాధేన పీళితం.

౪౨. ‘‘దిస్వా చిత్తం పసాదేత్వా, ఘతమణ్డముపానయిం;

కతత్తా ఆచితత్తా [ఉపచితత్తా (స్యా. క.)] చ, గఙ్గా భాగీరథీ అయం.

౪౩. ‘‘మహాసముద్దా చత్తారో, ఘతం సమ్పజ్జరే మమ;

అయఞ్చ పథవీ ఘోరా, అప్పమాణా అసఙ్ఖియా.

౪౪. ‘‘మమ సఙ్కప్పమఞ్ఞాయ, భవతే మధుసక్కరా [మధుసక్ఖరా (స్యా. క.)];

చాతుద్దీపా ఇమే రుక్ఖా, పాదపా ధరణీరుహా.

౪౫. ‘‘మమ సఙ్కప్పమఞ్ఞాయ, కప్పరుక్ఖా భవన్తి తే;

పఞ్ఞాసక్ఖత్తుం దేవిన్దో, దేవరజ్జమకారయిం.

౪౬. ‘‘ఏకపఞ్ఞాసక్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౪౭. ‘‘చతున్నవుతితో [ఛనవుతే ఇతో (సీ.)] కప్పే, యం దానమదదిం తదా;

దుగ్గతిం నాభిజానామి, ఘతమణ్డస్సిదం ఫలం.

౪౮. ‘‘కిలేసా ఝాపితా మయ్హం…పే… విహరామి అనాసవో.

౪౯. ‘‘స్వాగతం వత మే ఆసి…పే… కతం బుద్ధస్స సాసనం.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఘతమణ్డదాయకో థేరో ఇమా గాథాయో

అభాసిత్థాతి.

ఘతమణ్డదాయకత్థేరస్సాపదానం ఛట్ఠం.

౭. ఉదకదాయకత్థేరఅపదానం

౫౧. ‘‘పదుముత్తరబుద్ధస్స, భిక్ఖుసఙ్ఘే అనుత్తరే;

పసన్నచిత్తో సుమనో, పానీఘటమపూరయిం.

౫౨. ‘‘పబ్బతగ్గే దుమగ్గే వా, ఆకాసే వాథ భూమియం;

యదా పానీయమిచ్ఛామి, ఖిప్పం నిబ్బత్తతే మమ.

౫౩. ‘‘సతసహస్సితో కప్పే, యం దానమదదిం తదా;

దుగ్గతిం నాభిజానామి, దకదానస్సిదం ఫలం.

౫౪. ‘‘కిలేసా ఝాపితా మయ్హం…పే… విహరామి అనాసవో.

౫౫. ‘‘స్వాగతం వత మే ఆసి…పే… కతం బుద్ధస్స సాసనం.

౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉదకదాయకో థేరో ఇమా గాథాయో

అభాసిత్థాతి.

ఉదకదాయకత్థేరస్సాపదానం సత్తమం.

౮. పులినథూపియత్థేరఅపదానం

౫౭. ‘‘హిమవన్తస్సావిదూరే, యమకో నామ పబ్బతో;

అస్సమో సుకతో మయ్హం, పణ్ణసాలా సుమాపితా.

౫౮. ‘‘నారదో నామ నామేన, జటిలో ఉగ్గతాపనో;

చతుద్దససహస్సాని, సిస్సా పరిచరన్తి మం.

౫౯. ‘‘పటిసల్లీనకో సన్తో, ఏవం చిన్తేసహం తదా;

‘సబ్బో జనో మం పూజేతి, నాహం పూజేమి కిఞ్చనం.

౬౦. ‘‘‘న మే ఓవాదకో అత్థి, వత్తా కోచి న విజ్జతి;

అనాచరియుపజ్ఝాయో, వనే వాసం ఉపేమహం.

౬౧. ‘‘‘ఉపాసమానో యమహం, గరుచిత్తం ఉపట్ఠహే;

సో మే ఆచరియో నత్థి, వనవాసో నిరత్థకో.

౬౨. ‘‘‘ఆయాగం మే గవేసిస్సం, గరుం భావనియం తథా;

సావస్సయో వసిస్సామి, న కోచి గరహిస్సతి’.

౬౩. ‘‘ఉత్తానకూలా నదికా, సుపతిత్థా మనోరమా;

సంసుద్ధపులినాకిణ్ణా, అవిదూరే మమస్సమం.

౬౪. ‘‘నదిం అమరికం నామ, ఉపగన్త్వానహం తదా;

సంవడ్ఢయిత్వా పులినం, అకం పులినచేతియం.

౬౫. ‘‘యే తే అహేసుం సమ్బుద్ధా, భవన్తకరణా మునీ;

తేసం ఏతాదిసో థూపో, తం నిమిత్తం కరోమహం.

౬౬. ‘‘కరిత్వా పులినం [పుళినే (సీ. స్యా. పీ.)] థూపం, సోవణ్ణం మాపయిం అహం;

సోణ్ణకిఙ్కణిపుప్ఫాని, సహస్సే తీణి పూజయిం.

౬౭. ‘‘సాయపాతం నమస్సామి, వేదజాతో కతఞ్జలీ;

సమ్ముఖా వియ సమ్బుద్ధం, వన్దిం పులినచేతియం.

౬౮. ‘‘యదా కిలేసా జాయన్తి, వితక్కా గేహనిస్సితా;

సరామి సుకతం థూపం, పచ్చవేక్ఖామి తావదే.

౬౯. ‘‘ఉపనిస్సాయ విహరం, సత్థవాహం వినాయకం;

కిలేసే సంవసేయ్యాసి, న యుత్తం తవ మారిస.