౫. చన్దనమాలియత్థేరఅపదానం

౭౫. ‘‘పఞ్చ కామగుణే హిత్వా, పియరూపే మనోరమే;

అసీతికోటియో హిత్వా, పబ్బజిం అనగారియం.

౭౬. ‘‘పబ్బజిత్వాన కాయేన, పాపకమ్మం వివజ్జయిం;

వచీదుచ్చరితం హిత్వా, నదీకూలే వసామహం.

౭౭. ‘‘ఏకకం మం విహరన్తం, బుద్ధసేట్ఠో ఉపాగమి;

నాహం జానామి బుద్ధోతి, అకాసిం పటిసన్థరం [పటిసన్ధారం (క.)].

౭౮. ‘‘కరిత్వా పటిసన్థారం, నామగోత్తమపుచ్ఛహం;

‘దేవతానుసి గన్ధబ్బో, అదు సక్కో పురిన్దదో.

౭౯. ‘‘‘కో వా త్వం కస్స వా పుత్తో, మహాబ్రహ్మా ఇధాగతో;

విరోచేసి దిసా సబ్బా, ఉదయం సూరియో యథా.

౮౦. ‘‘‘సహస్సారాని చక్కాని, పాదే దిస్సన్తి మారిస;

కో వా త్వం కస్స వా పుత్తో, కథం జానేము తం మయం;

నామగోత్తం పవేదేహి, సంసయం అపనేహి మే’.

౮౧. ‘‘‘నమ్హి దేవో న గన్ధబ్బో, నమ్హి [నాపి (సీ.)] సక్కో పురిన్దదో;

బ్రహ్మభావో చ మే నత్థి, ఏతేసం ఉత్తమో అహం.

౮౨. ‘‘‘అతీతో విసయం తేసం, దాలయిం కామబన్ధనం;

సబ్బే కిలేసే ఝాపేత్వా, పత్తో సమ్బోధిముత్తమం’.

౮౩. ‘‘తస్స వాచం సుణిత్వాహం, ఇదం వచనమబ్రవిం;

‘యది బుద్ధోతి సబ్బఞ్ఞూ, నిసీద త్వం మహామునే.

౮౪. ‘తమహం పూజయిస్సామి, దుక్ఖస్సన్తకరో తువం’;

‘‘పత్థరిత్వా జినచమ్మం, అదాసి సత్థునో అహం.

౮౫. ‘‘నిసీది తత్థ భగవా, సీహోవ గిరిగబ్భరే;

ఖిప్పం పబ్బతమారుయ్హ, అమ్బస్స ఫలమగ్గహిం.

౮౬. ‘‘సాలకల్యాణికం పుప్ఫం, చన్దనఞ్చ మహారహం;

ఖిప్పం పగ్గయ్హ తం సబ్బం, ఉపేత్వా లోకనాయకం.

౮౭. ‘‘ఫలం బుద్ధస్స దత్వాన, సాలపుప్ఫమపూజయిం;

చన్దనం అనులిమ్పిత్వా, అవన్దిం సత్థునో అహం.

౮౮. ‘‘పసన్నచిత్తో సుమనో, విపులాయ చ పీతియా;

అజినమ్హి నిసీదిత్వా, సుమేధో లోకనాయకో.

౮౯. ‘‘మమ కమ్మం పకిత్తేసి, హాసయన్తో మమం తదా;

‘ఇమినా ఫలదానేన, గన్ధమాలేహి చూభయం.

౯౦. ‘‘‘పఞ్చవీసే కప్పసతే, దేవలోకే రమిస్సతి;

అనూనమనసఙ్కప్పో, వసవత్తీ భవిస్సతి.

౯౧. ‘‘‘ఛబ్బీసతికప్పసతే, మనుస్సత్తం గమిస్సతి;

భవిస్సతి చక్కవత్తీ, చాతురన్తో మహిద్ధికో.

౯౨. ‘‘‘వేభారం నామ నగరం, విస్సకమ్మేన మాపితం;

హేస్సతి సబ్బసోవణ్ణం, నానారతనభూసితం.

౯౩. ‘‘‘ఏతేనేవ ఉపాయేన, సంసరిస్సతి సో భవే [యోనిసో (స్యా. పీ.)];

సబ్బత్థ పూజితో హుత్వా, దేవత్తే అథ మానుసే.

౯౪. ‘‘‘పచ్ఛిమే భవే సమ్పత్తే, బ్రహ్మబన్ధు భవిస్సతి;

అగారా అభినిక్ఖమ్మ, అనగారీ భవిస్సతి;

అభిఞ్ఞాపారగూ హుత్వా, నిబ్బాయిస్సతినాసవో’.

౯౫. ‘‘ఇదం వత్వాన సమ్బుద్ధో, సుమేధో లోకనాయకో;

మమ నిజ్ఝాయమానస్స, పక్కామి అనిలఞ్జసే.

౯౬. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౯౭. ‘‘తుసితతో చవిత్వాన, నిబ్బత్తిం మాతుకుచ్ఛియం;

భోగే మే ఊనతా నత్థి, యమ్హి గబ్భే వసామహం.

౯౮. ‘‘మాతుకుచ్ఛిగతే మయి, అన్నపానఞ్చ భోజనం;

మాతుయా మమ ఛన్దేన, నిబ్బత్తతి యదిచ్ఛకం.

౯౯. ‘‘జాతియా పఞ్చవస్సేన, పబ్బజిం అనగారియం;

ఓరోపితమ్హి కేసమ్హి, అరహత్తమపాపుణిం.

౧౦౦. ‘‘పుబ్బకమ్మం గవేసన్తో, ఓరేన నాద్దసం అహం;

తింసకప్పసహస్సమ్హి, మమ కమ్మమనుస్సరిం.

౧౦౧. ‘‘నమో తే పురిసాజఞ్ఞ, నమో తే పురిసుత్తమ;

తవ సాసనమాగమ్మ, పత్తోమ్హి అచలం పదం.

౧౦౨. ‘‘తింసకప్పసహస్సమ్హి, యం బుద్ధమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౧౦౩. ‘‘కిలేసా ఝాపితా మయ్హం…పే… విహరామి అనాసవో.

౧౦౪. ‘‘స్వాగతం వత మే ఆసి…పే… కతం బుద్ధస్స సాసనం.

౧౦౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చన్దనమాలియో థేరో ఇమా గాథాయో

అభాసిత్థాతి.

చన్దనమాలియత్థేరస్సాపదానం పఞ్చమం.