౧. నళమాలియత్థేరఅపదానం

౧. ‘‘సువణ్ణవణ్ణం సమ్బుద్ధం, ఆహుతీనం పటిగ్గహం;

విపినగ్గేన గచ్ఛన్తం, అద్దసం లోకనాయకం.

౨. ‘‘నళమాలం గహేత్వాన, నిక్ఖమన్తో చ తావదే;

తత్థద్దసాసిం సమ్బుద్ధం, ఓఘతిణ్ణమనాసవం.

౩. ‘‘పసన్నచిత్తో సుమనో, నళమాలమపూజయిం;

దక్ఖిణేయ్యం మహావీరం, సబ్బలోకానుకమ్పకం.

౪. ‘‘ఏకతింసే ఇతో కప్పే, యం మాలమభిరోపయిం [పుప్ఫమభిరోపయిం (సీ. స్యా. పీ.)];

దుగ్గతిం నాభిజానామి, బుద్ధపూజాయిదం ఫలం.

౫. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౬. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౭. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా నళమాలియో థేరో ఇమా గాథాయో

అభాసిత్థాతి.

నళమాలియత్థేరస్సాపదానం పఠమం.