౨. మణిపూజకత్థేరఅపదానం

౮. ‘‘పదుముత్తరో నామ జినో, సబ్బధమ్మాన పారగూ;

వివేకకామో సమ్బుద్ధో, గచ్ఛతే అనిలఞ్జసే.

౯. ‘‘అవిదూరే హిమవన్తస్స, మహాజాతస్సరో అహు;

తత్థ మే భవనం ఆసి, పుఞ్ఞకమ్మేన సంయుతం.

౧౦. ‘‘భవనా అభినిక్ఖమ్మ, అద్దసం లోకనాయకం;

ఇన్దీవరంవ జలితం, ఆదిత్తంవ హుతాసనం.

౧౧. ‘‘విచినం నద్దసం పుప్ఫం, పూజయిస్సన్తి నాయకం;

సకం చిత్తం పసాదేత్వా, అవన్దిం సత్థునో అహం.

౧౨. ‘‘మమ సీసే మణిం గయ్హ, పూజయిం లోకనాయకం;

ఇమాయ మణిపూజాయ, విపాకో హోతు భద్దకో.

౧౩. ‘‘పదుముత్తరో లోకవిదూ, ఆహుతీనం పటిగ్గహో;

అన్తలిక్ఖే ఠితో సత్థా, ఇమం గాథం అభాసథ.

౧౪. ‘సో తే ఇజ్ఝతు సఙ్కప్పో, లభస్సు విపులం సుఖం;

ఇమాయ మణిపూజాయ, అనుభోహి మహాయసం’.

౧౫. ‘‘ఇదం వత్వాన భగవా, జలజుత్తమనామకో;

అగమాసి బుద్ధసేట్ఠో, యత్థ చిత్తం పణీహితం.

౧౬. ‘‘సట్ఠికప్పాని దేవిన్దో, దేవరజ్జమకారయిం;

అనేకసతక్ఖత్తుఞ్చ, చక్కవత్తీ అహోసహం.

౧౭. ‘‘పుబ్బకమ్మం సరన్తస్స, దేవభూతస్స మే సతో;

మణి నిబ్బత్తతే మయ్హం, ఆలోకకరణో మమం.

౧౮. ‘‘ఛళసీతిసహస్సాని, నారియో మే పరిగ్గహా;

విచిత్తవత్థాభరణా, ఆముక్కమణికుణ్డలా [ఆముత్తమణికుణ్డలా (సీ. స్యా. పీ.)].

౧౯. ‘‘అళారపమ్హా హసులా, సుసఞ్ఞా తనుమజ్ఝిమా;

పరివారేన్తి మం నిచ్చం, మణిపూజాయిదం ఫలం.

౨౦. ‘‘సోణ్ణమయా మణిమయా, లోహితఙ్గమయా తథా;

భణ్డా మే సుకతా హోన్తి, యదిచ్ఛసి [యదిచ్ఛాయ (సీ. పీ.)] పిళన్ధనా.

౨౧. ‘‘కూటాగారా గహారమ్మా, సయనఞ్చ మహారహం;

మమ సఙ్కప్పమఞ్ఞాయ, నిబ్బత్తన్తి యదిచ్ఛకం.

౨౨. ‘‘లాభా తేసం సులద్ధఞ్చ, యే లభన్తి ఉపస్సుతిం;

పుఞ్ఞక్ఖేత్తం మనుస్సానం, ఓసధం సబ్బపాణినం.

౨౩. ‘‘మయ్హమ్పి సుకతం కమ్మం, యోహం అదక్ఖి నాయకం;

వినిపాతా పముత్తోమ్హి, పత్తోమ్హి అచలం పదం.

౨౪. ‘‘యం యం యోనుపపజ్జామి, దేవత్తం అథ మానుసం;

దివసఞ్చేవ రత్తిఞ్చ [సమన్తా సత్తరతనా (సీ. పీ. క.)], ఆలోకో హోతి మే సదా.

౨౫. ‘‘తాయేవ మణిపూజాయ, అనుభోత్వాన సమ్పదా;

ఞాణాలోకో మయా దిట్ఠో, పత్తోమ్హి అచలం పదం.

౨౬. ‘‘సతసహస్సితో కప్పే, యం మణిం అభిపూజయిం;

దుగ్గతిం నాభిజానామి, మణిపూజాయిదం ఫలం.

౨౭. ‘‘కిలేసా ఝాపితా మయ్హం…పే… విహరామి అనాసవో.

౨౮. ‘‘స్వాగతం వత మే ఆసి…పే… కతం బుద్ధస్స సాసనం.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మణిపూజకో థేరో ఇమా గాథాయో

అభాసిత్థాతి.

మణిపూజకత్థేరస్సాపదానం దుతియం.