౮. సుచిన్తితత్థేరఅపదానం

౧౦౭. ‘‘నగరే హంసవతియా, అహోసిం కస్సకో తదా;

కసికమ్మేన జీవామి, తేన పోసేమి దారకే.

౧౦౮. ‘‘సుసమ్పన్నం తదా ఖేత్తం, ధఞ్ఞం మే ఫలినం [ఫలితం (సీ. పీ.)] అహు;

పాకకాలే చ సమ్పత్తే, ఏవం చిన్తేసహం తదా.

౧౦౯. ‘‘నచ్ఛన్నం నప్పతిరూపం, జానన్తస్స గుణాగుణం;

యోహం సఙ్ఘే అదత్వాన, అగ్గం భుఞ్జేయ్య చే తదా [మత్తనా (స్యా.)].

౧౧౦. ‘‘అయం బుద్ధో అసమసమో, ద్వత్తింసవరలక్ఖణో;

తతో పభావితో సఙ్ఘో, పుఞ్ఞక్ఖేత్తో అనుత్తరో.

౧౧౧. ‘‘తత్థ దస్సామహం దానం, నవసస్సం పురే పురే;

ఏవాహం చిన్తయిత్వాన, హట్ఠో పీణితమానసో [పీతిక… (స్యా.)].

౧౧౨. ‘‘ఖేత్తతో ధఞ్ఞమాహత్వా, సమ్బుద్ధం ఉపసఙ్కమిం;

ఉపసఙ్కమ్మ సమ్బుద్ధం, లోకజేట్ఠం నరాసభం;

వన్దిత్వా సత్థునో పాదే, ఇదం వచనమబ్రవిం.

౧౧౩. ‘‘‘నవసస్సఞ్చ సమ్పన్నం, ఆయాగోసి [ఇధ హోసి (స్యా.)] చ త్వం మునే;

అనుకమ్పముపాదాయ, అధివాసేహి చక్ఖుమ’.

౧౧౪. ‘‘పదుముత్తరో లోకవిదూ, ఆహుతీనం పటిగ్గహో;

మమ సఙ్కప్పమఞ్ఞాయ, ఇదం వచనమబ్రవి.

౧౧౫. ‘‘‘చత్తారో చ పటిపన్నా, చత్తారో చ ఫలే ఠితా;

ఏస సఙ్ఘో ఉజుభూతో, పఞ్ఞాసీలసమాహితో;

యజన్తానం మనుస్సానం, పుఞ్ఞపేక్ఖాన పాణినం.

౧౧౬. ‘‘‘కరోతోపధికం పుఞ్ఞం, సఙ్ఘే దిన్నం మహప్ఫలం;

తస్మిం సఙ్ఘేవ [సంఘే చ (స్యా. పీ.)] దాతబ్బం, తవ సస్సం తథేతరం.

౧౧౭. ‘‘‘సఙ్ఘతో ఉద్దిసిత్వాన, భిక్ఖూ నేత్వాన సంఘరం;

పటియత్తం ఘరే సన్తం, భిక్ఖుసఙ్ఘస్స దేహి త్వం’.

౧౧౮. ‘‘సఙ్ఘతో ఉద్దిసిత్వాన, భిక్ఖూ నేత్వాన సంఘరం;

యం ఘరే పటియత్తం మే, భిక్ఖుసఙ్ఘస్సదాసహం.

౧౧౯. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౨౦. ‘‘తత్థ మే సుకతం బ్యమ్హం, సోవణ్ణం సప్పభస్సరం;

సట్ఠియోజనముబ్బేధం, తింసయోజనవిత్థతం.

ఏకూనవీసతిమం భాణవారం.

౧౨౧. ‘‘ఆకిణ్ణం భవనం మయ్హం, నారీగణసమాకులం;

తత్థ భుత్వా పివిత్వా చ, వసామి తిదసే అహం.

౧౨౨. ‘‘సతానం తీణిక్ఖత్తుఞ్చ, దేవరజ్జమకారయిం;

సతానం పఞ్చక్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౧౨౩. ‘‘భవాభవే సంసరన్తో, లభామి అమితం ధనం;

భోగే మే ఊనతా నత్థి, నవసస్సస్సిదం ఫలం.

౧౨౪. ‘‘హత్థియానం అస్సయానం, సివికం సన్దమానికం;

లభామి సబ్బమేవేతం [సబ్బమేతమ్పి (క.)], నవసస్సస్సిదం ఫలం.

౧౨౫. ‘‘నవవత్థం నవఫలం, నవగ్గరసభోజనం;

లభామి సబ్బమేవేతం, నవసస్సస్సిదం ఫలం.

౧౨౬. ‘‘కోసేయ్యకమ్బలియాని, ఖోమకప్పాసికాని చ;

లభామి సబ్బమేవేతం, నవసస్సస్సిదం ఫలం.

౧౨౭. ‘‘దాసీగణం దాసగణం, నారియో చ అలఙ్కతా;

లభామి సబ్బమేవేతం, నవసస్సస్సిదం ఫలం.

౧౨౮. ‘‘న మం సీతం వా ఉణ్హం వా, పరిళాహో న విజ్జతి;

అథో చేతసికం దుక్ఖం, హదయే మే న విజ్జతి.

౧౨౯. ‘‘ఇదం ఖాద ఇదం భుఞ్జ, ఇమమ్హి సయనే సయ;

లభామి సబ్బమేవేతం, నవసస్సస్సిదం ఫలం.

౧౩౦. ‘‘అయం పచ్ఛిమకో దాని, చరిమో వత్తతే భవో;

అజ్జాపి దేయ్యధమ్మో మే, ఫలం తోసేసి సబ్బదా.

౧౩౧. ‘‘నవసస్సం దదిత్వాన, సఙ్ఘే గణవరుత్తమే;

అట్ఠానిసంసే అనుభోమి, కమ్మానుచ్ఛవికే మమ.

౧౩౨. ‘‘వణ్ణవా యసవా హోమి, మహాభోగో అనీతికో;

మహాపక్ఖో [మహాభక్ఖో (స్యా. క.)] సదా హోమి, అభేజ్జపరిసో సదా.

౧౩౩. ‘‘సబ్బే మం అపచాయన్తి, యే కేచి పథవిస్సితా;

దేయ్యధమ్మా చ యే కేచి, పురే పురే లభామహం.

౧౩౪. ‘‘భిక్ఖుసఙ్ఘస్స వా మజ్ఝే, బుద్ధసేట్ఠస్స సమ్ముఖా;

సబ్బేపి సమతిక్కమ్మ, దేన్తి మమేవ దాయకా.

౧౩౫. ‘‘పఠమం నవసస్సఞ్హి, దత్వా సఙ్ఘే గణుత్తమే;

ఇమానిసంసే అనుభోమి, నవసస్సస్సిదం ఫలం.

౧౩౬. ‘‘సతసహస్సితో కప్పే, యం దానమదదిం తదా;

దుగ్గతిం నాభిజానామి, నవసస్సస్సిదం ఫలం.

౧౩౭. ‘‘కిలేసా ఝాపితా మయ్హం…పే… విహరామి అనాసవో;

౧౩౮. ‘‘స్వాగతం వత మే ఆసి…పే… కతం బుద్ధస్స సాసనం.

౧౩౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుచిన్తితో థేరో ఇమా గాథాయో

అభాసిత్థాతి.

సుచిన్తితత్థేరస్సాపదానం అట్ఠమం.