౯. సోవణ్ణకిఙ్కణియత్థేరఅపదానం

౧౪౦. ‘‘సద్ధాయ అభినిక్ఖమ్మ, పబ్బజిం అనగారియం;

వాకచీరధరో ఆసిం, తపోకమ్మమపస్సితో.

౧౪౧. ‘‘అత్థదస్సీ తు భగవా, లోకజేట్ఠో నరాసభో;

ఉప్పజ్జి తమ్హి సమయే, తారయన్తో మహాజనం.

౧౪౨. ‘‘బలఞ్చ వత మే ఖీణం, బ్యాధినా పరమేన తం;

బుద్ధసేట్ఠం సరిత్వాన, పులినే థూపముత్తమం.

౧౪౩. ‘‘కరిత్వా హట్ఠచిత్తోహం, సహత్థేన [పసాదేన (క.)] సమోకిరిం;

సోణ్ణకిఙ్కణిపుప్ఫాని, ఉదగ్గమనసో అహం.

౧౪౪. ‘‘సమ్ముఖా వియ సమ్బుద్ధం, థూపం పరిచరిం అహం;

తేన చేతోపసాదేన, అత్థదస్సిస్స తాదినో.

౧౪౫. ‘‘దేవలోకం గతో సన్తో, లభామి విపులం సుఖం;

సువణ్ణవణ్ణో తత్థాసిం, బుద్ధపూజాయిదం ఫలం.

౧౪౬. ‘‘అసీతికోటియో మయ్హం, నారియో సమలఙ్కతా;

సదా మయ్హం ఉపట్ఠన్తి, బుద్ధపూజాయిదం ఫలం.

౧౪౭. ‘‘సట్ఠితురియసహస్సాని [సట్ఠితూరియ… (క.)], భేరియో పణవాని చ;

సఙ్ఖా చ డిణ్డిమా తత్థ, వగ్గూ వజ్జన్తి [నదన్తి (సీ.), వదన్తి (పీ.)] దున్దుభీ.

౧౪౮. ‘‘చుల్లాసీతిసహస్సాని, హత్థినో సమలఙ్కతా;

తిధాపభిన్నమాతఙ్గా, కుఞ్జరా సట్ఠిహాయనా.

౧౪౯. ‘‘హేమజాలాభిసఞ్ఛన్నా, ఉపట్ఠానం కరోన్తి మే;

బలకాయే గజే చేవ, ఊనతా మే న విజ్జతి.

౧౫౦. ‘‘సోణ్ణకిఙ్కణిపుప్ఫానం, విపాకం అనుభోమహం;

అట్ఠపఞ్ఞాసక్ఖత్తుఞ్చ, దేవరజ్జమకారయిం.

౧౫౧. ‘‘ఏకసత్తతిక్ఖత్తుఞ్చ, చక్కవత్తీ అహోసహం;

పథబ్యా రజ్జం ఏకసతం, మహియా కారయిం అహం.

౧౫౨. ‘‘సో దాని అమతం పత్తో, అసఙ్ఖతం సుదుద్దసం [గమ్భీరం దుద్దసం పదం (స్యా.)];

సంయోజనపరిక్ఖీణో, నత్థి దాని పునబ్భవో.

౧౫౩. ‘‘అట్ఠారసే కప్పసతే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౫౪. ‘‘కిలేసా ఝాపితా మయ్హం…పే… విహరామి అనాసవో.

౧౫౫. ‘‘స్వాగతం వత మే ఆసి…పే… కతం బుద్ధస్స సాసనం.

౧౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సోవణ్ణకిఙ్కణియో థేరో ఇమా

గాథాయో అభాసిత్థాతి.

సోవణ్ణకిఙ్కణియత్థేరస్సాపదానం నవమం.