౭. ఏకధమ్మస్సవనియత్థేరఅపదానం

౮౮. ‘‘పదుముత్తరో నామ జినో, సబ్బధమ్మాన పారగూ;

చతుసచ్చం పకాసేన్తో, సన్తారేసి బహుం జనం.

౮౯. ‘‘అహం తేన సమయేన, జటిలో ఉగ్గతాపనో;

ధునన్తో వాకచీరాని, గచ్ఛామి అమ్బరే తదా.

౯౦. ‘‘బుద్ధసేట్ఠస్స ఉపరి, గన్తుం న విసహామహం;

పక్ఖీవ సేలమాసజ్జ, గమనం న లభామహం.

౯౧. ‘‘ఉదకే వోక్కమిత్వాన, ఏవం గచ్ఛామి అమ్బరే;

న మే ఇదం భూతపుబ్బం, ఇరియాపథవికోపనం.

౯౨. ‘‘హన్ద మేతం గవేసిస్సం, అప్పేవత్థం లభేయ్యహం;

ఓరోహన్తో అన్తలిక్ఖా, సద్దమస్సోసి సత్థునో.

౯౩. ‘‘సరేన రజనీయేన, సవనీయేన వగ్గునా;

అనిచ్చతం కథేన్తస్స, తఞ్ఞేవ ఉగ్గహిం తదా;

అనిచ్చసఞ్ఞముగ్గయ్హ, అగమాసిం మమస్సమం.

౯౪. ‘‘యావతాయుం వసిత్వాన, తత్థ కాలఙ్కతో అహం;

చరిమే వత్తమానమ్హి, సద్ధమ్మస్సవనం సరిం.

౯౫. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౯౬. ‘‘తింసకప్పసహస్సాని, దేవలోకే రమిం అహం;

ఏకపఞ్ఞాసక్ఖత్తుఞ్చ, దేవరజ్జమకారయిం.

౯౭. ‘‘ఏకవీసతిక్ఖత్తుఞ్చ [ఏకతింసతి… (స్యా.)], చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౯౮. ‘‘అనుభోమి సకం పుఞ్ఞం, సుఖితోహం భవాభవే;

అనుస్సరామి తం సఞ్ఞం, సంసరన్తో భవాభవే;

న కోటిం పటివిజ్ఝామి, నిబ్బానం అచ్చుతం పదం.

౯౯. ‘‘పితుగేహే నిసీదిత్వా, సమణో భావితిన్ద్రియో;

కథంస [కథయం (సీ. పీ. క.)] పరిదీపేన్తో, అనిచ్చతముదాహరి.

౧౦౦. ‘‘‘అనిచ్చా వత సఙ్ఖారా, ఉప్పాదవయధమ్మినో;

ఉప్పజ్జిత్వా నిరుజ్ఝన్తి, తేసం వూపసమో సుఖో’.

౧౦౧. ‘‘సహ గాథం సుణిత్వాన, పుబ్బసఞ్ఞమనుస్సరిం;

ఏకాసనే నిసీదిత్వా, అరహత్తమపాపుణిం.

౧౦౨. ‘‘జాతియా సత్తవస్సేన, అరహత్తమపాపుణిం;

ఉపసమ్పాదయీ బుద్ధో, ధమ్మస్సవనస్సిదం ఫలం.

౧౦౩. ‘‘సతసహస్సితో కప్పే, యం ధమ్మమసుణిం తదా;

దుగ్గతిం నాభిజానామి, ధమ్మస్సవనస్సిదం ఫలం.

౧౦౪. ‘‘కిలేసా ఝాపితా మయ్హం…పే… విహరామి అనాసవో.

౧౦౫. ‘‘స్వాగతం వత మే ఆసి…పే… కతం బుద్ధస్స సాసనం.

౧౦౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకధమ్మస్సవనియో థేరో ఇమా

గాథాయో అభాసిత్థాతి.

ఏకధమ్మస్సవనియత్థేరస్సాపదానం సత్తమం.