౧౦. మఞ్చదాయకత్థేరఅపదానం

౧౮౪. ‘‘పరినిబ్బుతే కారుణికే, సిద్ధత్థే లోకనాయకే;

విత్థారికే పావచనే, దేవమానుససక్కతే.

౧౮౫. ‘‘చణ్డాలో ఆసహం తత్థ, ఆసన్దిపీఠకారకో;

తేన కమ్మేన జీవామి, తేన పోసేమి దారకే.

౧౮౬. ‘‘ఆసన్దిం సుకతం కత్వా, పసన్నో సేహి పాణిభి;

సయమేవుపగన్త్వాన, భిక్ఖుసఙ్ఘస్సదాసహం.

౧౮౭. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౮౮. ‘‘దేవలోకగతో సన్తో, మోదామి తిదసే గణే;

సయనాని మహగ్ఘాని, నిబ్బత్తన్తి యదిచ్ఛకం.

౧౮౯. ‘‘పఞ్ఞాసక్ఖత్తుం దేవిన్దో, దేవరజ్జమకారయిం;

అసీతిక్ఖత్తుం రాజా చ, చక్కవత్తీ అహోసహం.

౧౯౦. ‘‘పదేసరజ్జం విపులం, గణనాతో అసఙ్ఖియం;

సుఖితో యసవా హోమి, మఞ్చదానస్సిదం ఫలం.

౧౯౧. ‘‘దేవలోకా చవిత్వాన, ఏమి చే మానుసం భవం;

మహారహా సుసయనా, సయమేవ భవన్తి మే.

౧౯౨. ‘‘అయం పచ్ఛిమకో మయ్హం, చరిమో వత్తతే భవో;

అజ్జాపి సయనే కాలే [సయనకాలే (స్యా.)], సయనం ఉపతిట్ఠతి.

౧౯౩. ‘‘చతున్నవుతితో కప్పే, యం దానమదదిం తదా;

దుగ్గతిం నాభిజానామి, మఞ్చదానస్సిదం ఫలం.

౧౯౪. ‘‘కిలేసా ఝాపితా మయ్హం…పే… విహరామి అనాసవో.

౧౯౫. ‘‘స్వాగతం వత మే ఆసి…పే… కతం బుద్ధస్స సాసనం.

౧౯౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మఞ్చదాయకో థేరో ఇమా గాథాయో

అభాసిత్థాతి.

మఞ్చదాయకత్థేరస్సాపదానం దసమం.

భద్దాలివగ్గో బాచత్తాలీసమో.