౭. గిరిమానన్దత్థేరఅపదానం
౪౧౯. ‘‘భరియా మే కాలఙ్కతా, పుత్తో సీవథికం గతో;
మాతా పితా మతా భాతా, ఏకచితమ్హి [మాతా పితా చ భాతా చ, ఏకచితకమ్హి (సీ. స్యా.)] డయ్హరే.
౪౨౦. ‘‘తేన సోకేన సన్తత్తో, కిసో పణ్డు అహోసహం;
చిత్తక్ఖేపో చ మే ఆసి, తేన సోకేన అట్టితో.
౪౨౧. ‘‘సోకసల్లపరేతోహం, వనన్తముపసఙ్కమిం;
పవత్తఫలం భుఞ్జిత్వా, రుక్ఖమూలే వసామహం.
౪౨౨. ‘‘సుమేధో నామ సమ్బుద్ధో, దుక్ఖస్సన్తకరో జినో;
మముద్ధరితుకామో సో, ఆగఞ్ఛి మమ సన్తికం.
౪౨౩. ‘‘పదసద్దం సుణిత్వాన, సుమేధస్స మహేసినో;
పగ్గహేత్వానహం సీసం, ఉల్లోకేసిం మహామునిం.
౪౨౪. ‘‘ఉపాగతే మహావీరే, పీతి మే ఉదపజ్జథ;
తదాసిమేకగ్గమనో, దిస్వా తం లోకనాయకం.
౪౨౫. ‘‘సతిం పటిలభిత్వాన, పణ్ణముట్ఠిమదాసహం;
నిసీది భగవా తత్థ, అనుకమ్పాయ చక్ఖుమా.
౪౨౬. ‘‘నిసజ్జ తత్థ భగవా, సుమేధో లోకనాయకో;
ధమ్మం మే కథయీ బుద్ధో, సోకసల్లవినోదనం.
౪౨౭. ‘‘‘అనవ్హితా తతో ఆగుం, అననుఞ్ఞాతా ఇతో గతా;
యథాగతా తథా గతా, తత్థ కా పరిదేవనా.
౪౨౮. ‘‘‘యథాపి పథికా సత్తా, వస్సమానాయ వుట్ఠియా;
సభణ్డా ఉపగచ్ఛన్తి, వస్సస్సాపతనాయ తే.
౪౨౯. ‘‘‘వస్సే చ తే ఓరమితే, సమ్పయన్తి యదిచ్ఛకం;
ఏవం మాతా పితా తుయ్హం, తత్థ కా పరిదేవనా.
౪౩౦. ‘‘‘ఆగన్తుకా పాహునకా, చలితేరితకమ్పితా;
ఏవం మాతా పితా తుయ్హం, తత్థ కా పరిదేవనా.
౪౩౧. ‘‘‘యథాపి ఉరగో జిణ్ణం, హిత్వా గచ్ఛతి సం తచం [సంతనుం (స్యా. క.)];
ఏవం మాతా పితా తుయ్హం, సం తనుం ఇధ హీయరే’.
౪౩౨. ‘‘బుద్ధస్స గిరమఞ్ఞాయ, సోకసల్లం వివజ్జయిం;
పామోజ్జం జనయిత్వాన, బుద్ధసేట్ఠం అవన్దహం.
౪౩౩. ‘‘వన్దిత్వాన మహానాగం, పూజయిం గిరిమఞ్జరిం [గిరిమఞ్జరిమపూజయిం (సీ. స్యా.)];
దిబ్బగన్ధం సమ్పవన్తం [దిబ్బగన్ధేన సమ్పన్నం (సీ. స్యా.)], సుమేధం లోకనాయకం.
౪౩౪. ‘‘పూజయిత్వాన సమ్బుద్ధం, సిరే కత్వాన అఞ్జలిం;
అనుస్సరం గుణగ్గాని, సన్థవిం లోకనాయకం.
౪౩౫. ‘‘నిత్తిణ్ణోసి [నిత్తణ్హోసి (సీ.), వితిణ్ణోసి (స్యా.)] మహావీర, సబ్బఞ్ఞు లోకనాయక;
సబ్బే సత్తే ఉద్ధరసి, ఞాణేన త్వం మహామునే.
౪౩౬. ‘‘విమతిం ద్వేళ్హకం వాపి, సఞ్ఛిన్దసి మహామునే;
పటిపాదేసి మే మగ్గం, తవ ఞాణేన చక్ఖుమ.
౪౩౭. ‘‘అరహా వసిపత్తా [సిద్ధిపత్తా (సీ. స్యా.)] చ, ఛళభిఞ్ఞా మహిద్ధికా;
అన్తలిక్ఖచరా ధీరా, పరివారేన్తి తావదే.
౪౩౮. ‘‘పటిపన్నా చ సేఖా చ, ఫలట్ఠా సన్తి సావకా;
సూరోదయేవ పదుమా, పుప్ఫన్తి తవ సావకా.
౪౩౯. ‘‘మహాసముద్దోవక్ఖోభో, అతులోపి [యథా సముద్దో అక్ఖోభో, అతులో చ (సీ.)] దురుత్తరో;
ఏవం ఞాణేన సమ్పన్నో, అప్పమేయ్యోసి చక్ఖుమ.
౪౪౦. ‘‘వన్దిత్వాహం లోకజినం, చక్ఖుమన్తం మహాయసం;
పుథు దిసా నమస్సన్తో, పటికుటికో అగఞ్ఛహం.
౪౪౧. ‘‘దేవలోకా చవిత్వాన, సమ్పజానో పతిస్సతో;
ఓక్కమిం మాతుయా కుచ్ఛిం, సన్ధావన్తో భవాభవే.
౪౪౨. ‘‘అగారా అభినిక్ఖమ్మ, పబ్బజిం అనగారియం;
ఆతాపీ నిపకో ఝాయీ, పటిసల్లానగోచరో.
౪౪౩. ‘‘పధానం పదహిత్వాన, తోసయిత్వా మహామునిం;
చన్దోవబ్భఘనా ముత్తో, విచరామి అహం సదా.
౪౪౪. ‘‘వివేకమనుయుత్తోమ్హి, ఉపసన్తో నిరూపధి;
సబ్బాసవే పరిఞ్ఞాయ, విహరామి అనాసవో.
౪౪౫. ‘‘తింసకప్పసహస్సమ్హి, యం బుద్ధమభిపూజయిం;
దుగ్గతిం నాభిజానామి, బుద్ధపూజాయిదం ఫలం.
౪౪౬. ‘‘కిలేసా ఝాపితా మయ్హం, భవా సబ్బే సమూహతా;
సబ్బాసవా పరిక్ఖీణా, నత్థి దాని పునబ్భవో.
౪౪౭. ‘‘స్వాగతం వత మే ఆసి…పే… కతం బుద్ధస్స సాసనం.
౪౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా గిరిమానన్దో థేరో ఇమా గాథాయో అభాసిత్థాతి.
గిరిమానన్దత్థేరస్సాపదానం సత్తమం.