౬. బాకులత్థేరఅపదానం

౩౮౬. ‘‘హిమవన్తస్సావిదూరే, సోభితో నామ పబ్బతో;

అస్సమో సుకతో మయ్హం, సకసిస్సేహి మాపితో.

౩౮౭. ‘‘మణ్డపా చ బహూ తత్థ, పుప్ఫితా సిన్దువారకా;

కపిత్థా చ బహూ తత్థ, పుప్ఫితా జీవజీవకా [చమ్పకా నాగకేతకా (స్యా.)].

౩౮౮. ‘‘నిగ్గుణ్డియో బహూ తత్థ, బదరామలకాని చ;

ఫారుసకా అలాబూ చ, పుణ్డరీకా చ పుప్ఫితా.

౩౮౯. ‘‘ఆళకా [అళక్కా (స్యా.)] బేలువా తత్థ, కదలీ మాతులుఙ్గకా;

మహానామా బహూ తత్థ, అజ్జునా చ పియఙ్గుకా.

౩౯౦. ‘‘కోసమ్బా సళలా నిమ్బా [నీపా (సీ.)], నిగ్రోధా చ కపిత్థనా;

ఏదిసో అస్సమో మయ్హం, ససిస్సోహం తహిం వసిం.

౩౯౧. ‘‘అనోమదస్సీ భగవా, సయమ్భూ లోకనాయకో;

గవేసం పటిసల్లానం, మమస్సమముపాగమి.

౩౯౨. ‘‘ఉపేతమ్హి మహావీరే, అనోమదస్సిమహాయసే;

ఖణేన లోకనాథస్స, వాతాబాధో సముట్ఠహి.

౩౯౩. ‘‘విచరన్తో అరఞ్ఞమ్హి, అద్దసం లోకనాయకం;

ఉపగన్త్వాన సమ్బుద్ధం, చక్ఖుమన్తం మహాయసం.

౩౯౪. ‘‘ఇరియఞ్చాపి దిస్వాన, ఉపలక్ఖేసహం తదా;

అసంసయఞ్హి బుద్ధస్స, బ్యాధి నో ఉదపజ్జథ.

౩౯౫. ‘‘ఖిప్పం అస్సమమాగఞ్ఛిం, మమ సిస్సాన సన్తికే;

భేసజ్జం కత్తుకామోహం, సిస్సే ఆమన్తయిం తదా.

౩౯౬. ‘‘పటిస్సుణిత్వాన మే వాక్యం, సిస్సా సబ్బే సగారవా;

ఏకజ్ఝం సన్నిపతింసు, సత్థుగారవతా మమ.

౩౯౭. ‘‘ఖిప్పం పబ్బతమారుయ్హ, సబ్బోసధమహాసహం [మకాసహం (స్యా. క.)];

పానీయయోగం [పానీయయోగ్గం (సీ.)] కత్వాన, బుద్ధసేట్ఠస్సదాసహం.

౩౯౮. ‘‘పరిభుత్తే మహావీరే, సబ్బఞ్ఞులోకనాయకే;

ఖిప్పం వాతో వూపసమి, సుగతస్స మహేసినో.

౩౯౯. ‘‘పస్సద్ధం దరథం దిస్వా, అనోమదస్సీ మహాయసో;

సకాసనే నిసీదిత్వా, ఇమా గాథా అభాసథ.

౪౦౦. ‘‘‘యో మే పాదాసి భేసజ్జం, బ్యాధిఞ్చ సమయీ మమ;

తమహం కిత్తయిస్సామి, సుణాథ మమ భాసతో.

౪౦౧. ‘‘‘కప్పసతసహస్సాని, దేవలోకే రమిస్సతి;

వాదితే తూరియే తత్థ, మోదిస్సతి సదా అయం.

౪౦౨. ‘‘‘మనుస్సలోకమాగన్త్వా, సుక్కమూలేన చోదితో;

సహస్సక్ఖత్తుం రాజా చ, చక్కవత్తీ భవిస్సతి.

౪౦౩. ‘‘‘పఞ్చపఞ్ఞాసకప్పమ్హి, అనోమో నామ ఖత్తియో;

చాతురన్తో విజితావీ, జమ్బుమణ్డస్స [జమ్బుదీపస్స (స్యా.)] ఇస్సరో.

౪౦౪. ‘‘‘సత్తరతనసమ్పన్నో, చక్కవత్తీ మహబ్బలో;

తావతింసేపి ఖోభేత్వా, ఇస్సరం కారయిస్సతి.

౪౦౫. ‘‘‘దేవభూతో మనుస్సో వా, అప్పాబాధో భవిస్సతి;

పరిగ్గహం వివజ్జేత్వా, బ్యాధిం లోకే తరిస్సతి.

౪౦౬. ‘‘‘అప్పరిమేయ్యే ఇతో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౪౦౭. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, నిబ్బాయిస్సతినాసవో.

౪౦౮. ‘‘‘కిలేసే ఝాపయిత్వాన, తణ్హాసోతం తరిస్సతి;

బాకులో [బక్కులో (సీ. స్యా.)] నామ నామేన, హేస్సతి సత్థు సావకో.

౪౦౯. ‘‘‘ఇదం సబ్బం అభిఞ్ఞాయ, గోతమో సక్యపుఙ్గవో;

భిక్ఖుసఙ్ఘే నిసీదిత్వా, ఏతదగ్గే ఠపేస్సతి’.

౪౧౦. ‘‘అనోమదస్సీ భగవా, సయమ్భూ లోకనాయకో;

వివేకానువిలోకేన్తో, మమస్సమముపాగమి.

౪౧౧. ‘‘ఉపాగతం మహావీరం, సబ్బఞ్ఞుం లోకనాయకం;

సబ్బోసధేన తప్పేసిం, పసన్నో సేహి పాణిభి.

౪౧౨. ‘‘తస్స మే సుకతం కమ్మం, సుఖేత్తే బీజసమ్పదా;

ఖేపేతుం నేవ సక్కోమి, తదా హి సుకతం మమ.

౪౧౩. ‘‘లాభా మమ సులద్ధం మే, యోహం అద్దక్ఖి నాయకం;

తేన కమ్మావసేసేన, పత్తోమ్హి అచలం పదం.

౪౧౪. ‘‘సబ్బమేతం అభిఞ్ఞాయ, గోతమో సక్యపుఙ్గవో;

భిక్ఖుసఙ్ఘే నిసీదిత్వా, ఏతదగ్గే ఠపేసి మం.

౪౧౫. ‘‘అపరిమేయ్యే ఇతో కప్పే, యం కమ్మమకరిం తదా;

దుగ్గతిం నాభిజానామి, భేసజ్జస్స ఇదం ఫలం.

౪౧౬. ‘‘కిలేసా ఝాపితా మయ్హం, భవా సబ్బే సమూహతా;

సబ్బాసవా పరిక్ఖీణా, నత్థి దాని పునబ్భవో.

౪౧౭. ‘‘స్వాగతం వత మే ఆసి…పే… కతం బుద్ధస్స సాసనం.

౪౧౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బాకులో [బక్కులో (సీ. స్యా.)] థేరో ఇమా గాథాయో అభాసిత్థాతి;

బాకులత్థేరస్సాపదానం ఛట్ఠం.