౫. పదుమకూటాగారియత్థేరఅపదానం

౩౫౩. ‘‘పియదస్సీ నామ భగవా, సయమ్భూ లోకనాయకో;

వివేకకామో సమ్బుద్ధో, సమాధికుసలో ముని.

౩౫౪. ‘‘వనసణ్డం సమోగయ్హ, పియదస్సీ మహాముని;

పంసుకూలం పత్థరిత్వా, నిసీది పురిసుత్తమో.

౩౫౫. ‘‘మిగలుద్దో పురే ఆసిం, అరఞ్ఞే [విపినే (సీ.), ఇరినే (స్యా. క.)] కాననే అహం;

పసదం మిగమేసన్తో, ఆహిణ్డామి అహం తదా.

౩౫౬. ‘‘తత్థద్దసాసిం సమ్బుద్ధం, ఓఘతిణ్ణమనాసవం;

పుప్ఫితం సాలరాజంవ, సతరంసింవ ఉగ్గతం.

౩౫౭. ‘‘దిస్వానహం దేవదేవం, పియదస్సిం మహాయసం;

జాతస్సరం సమోగయ్హ, పదుమం ఆహరిం తదా.

౩౫౮. ‘‘ఆహరిత్వాన పదుమం, సతపత్తం మనోరమం;

కూటాగారం కరిత్వాన, ఛాదయిం పదుమేనహం.

౩౫౯. ‘‘అనుకమ్పకో కారుణికో, పియదస్సీ మహాముని;

సత్తరత్తిన్దివం బుద్ధో, కూటాగారే వసీ జినో.

౩౬౦. ‘‘పురాణం ఛడ్డయిత్వాన, నవేన ఛాదయిం అహం;

అఞ్జలిం పగ్గహేత్వాన, అట్ఠాసిం తావదే అహం.

౩౬౧. ‘‘వుట్ఠహిత్వా సమాధిమ్హా, పియదస్సీ మహాముని;

దిసం అనువిలోకేన్తో, నిసీది లోకనాయకో.

౩౬౨. ‘‘తదా సుదస్సనో నామ, ఉపట్ఠాకో మహిద్ధికో;

చిత్తమఞ్ఞాయ బుద్ధస్స, పియదస్సిస్స సత్థునో.

౩౬౩. ‘‘అసీతియా సహస్సేహి, భిక్ఖూహి పరివారితో;

వనన్తే సుఖమాసీనం, ఉపేసి లోకనాయకం.

౩౬౪. ‘‘యావతా వనసణ్డమ్హి, అధివత్థా చ దేవతా;

బుద్ధస్స చిత్తమఞ్ఞాయ, సబ్బే సన్నిపతుం తదా.

౩౬౫. ‘‘సమాగతేసు యక్ఖేసు, కుమ్భణ్డే సహరక్ఖసే;

భిక్ఖుసఙ్ఘే చ సమ్పత్తే, గాథా పబ్యాహరీ [సబ్యాహరీ (స్యా.), మాబ్యాహరీ (సీ.)] జినో.

౩౬౬. ‘‘‘యో మం సత్తాహం పూజేసి, ఆవాసఞ్చ అకాసి మే;

తమహం కిత్తయిస్సామి, సుణాథ మమ భాసతో.

౩౬౭. ‘‘‘సుదుద్దసం సునిపుణం, గమ్భీరం సుప్పకాసితం;

ఞాణేన కిత్తయిస్సామి, సుణాథ మమ భాసతో.

౩౬౮. ‘‘‘చతుద్దసాని కప్పాని, దేవరజ్జం కరిస్సతి;

కూటాగారం మహన్తస్స [బ్రహం తస్స (సీ. స్యా.)], పద్మపుప్ఫేహి ఛాదితం.

౩౬౯. ‘‘‘ఆకాసే ధారయిస్సతి, పుప్ఫకమ్మస్సిదం [పుబ్బకమ్మస్సిదం (స్యా.)] ఫలం;

చతుబ్బీసే [చతుద్దసే (స్యా.)] కప్పసతే, వోకిణ్ణం సంసరిస్సతి.

౩౭౦. ‘‘‘తత్థ పుప్ఫమయం బ్యమ్హం, ఆకాసే ధారయిస్సతి;

యథా పదుమపత్తమ్హి, తోయం న ఉపలిమ్పతి.

౩౭౧. ‘‘‘తథేవీమస్స ఞాణమ్హి, కిలేసా నోపలిమ్పరే;

మనసా వినివట్టేత్వా, పఞ్చ నీవరణే అయం.

౩౭౨. ‘‘‘చిత్తం జనేత్వా నేక్ఖమ్మే, అగారా పబ్బజిస్సతి;

తతో పుప్ఫమయే బ్యమ్హే, ధారేన్తే [పుప్ఫమయం బ్యమ్హం, ధారేన్తం (స్యా. క.)] నిక్ఖమిస్సతి.

౩౭౩. ‘‘‘రుక్ఖమూలే వసన్తస్స, నిపకస్స సతీమతో;

తత్థ పుప్ఫమయం బ్యమ్హం, మత్థకే ధారయిస్సతి.

౩౭౪. ‘‘‘చీవరం పిణ్డపాతఞ్చ, పచ్చయం సయనాసనం;

దత్వాన భిక్ఖుసఙ్ఘస్స, నిబ్బాయిస్సతినాసవో’.

౩౭౫. ‘‘కూటాగారేన చరతా [చరణా (సీ. పీ. క.), చరితే (స్యా.)], పబ్బజ్జం అభినిక్ఖమిం;

రుక్ఖమూలే వసన్తమ్పి [వసన్తమ్హి (సీ.), వసతోపి (?)], కూటాగారం ధరీయతి.

౩౭౬. ‘‘చీవరే పిణ్డపాతే చ, చేతనా మే న విజ్జతి;

పుఞ్ఞకమ్మేన సంయుత్తో, లభామి పరినిట్ఠితం.

౩౭౭. ‘‘గణనాతో అసఙ్ఖేయ్యా, కప్పకోటీ బహూ మమ;

రిత్తకా తే అతిక్కన్తా, పముత్తా లోకనాయకా.

౩౭౮. ‘‘అట్ఠారసే కప్పసతే, పియదస్సీ వినాయకో;

తమహం పయిరుపాసిత్వా, ఇమం యోనిం ఉపాగతో.

౩౭౯. ‘‘ఇధ పస్సామి [ఇధద్దసాసిం (సీ.)] సమ్బుద్ధం, అనోమం నామ చక్ఖుమం;

తమహం ఉపగన్త్వాన, పబ్బజిం అనగారియం.

౩౮౦. ‘‘దుక్ఖస్సన్తకరో బుద్ధో, మగ్గం మే దేసయీ జినో;

తస్స ధమ్మం సుణిత్వాన, పత్తోమ్హి అచలం పదం.

౩౮౧. ‘‘తోసయిత్వాన సమ్బుద్ధం, గోతమం సక్యపుఙ్గవం;

సబ్బాసవే పరిఞ్ఞాయ, విహరామి అనాసవో.

౩౮౨. ‘‘అట్ఠారసే కప్పసతే, యం బుద్ధమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౩౮౩. ‘‘కిలేసా ఝాపితా మయ్హం, భవా సబ్బే సమూహతా;

సబ్బాసవా పరిక్ఖీణా, నత్థి దాని పునబ్భవో.

౩౮౪. ‘‘స్వాగతం వత మే ఆసి…పే… కతం బుద్ధస్స సాసనం.

౩౮౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదుమకూటాగారియో థేరో ఇమా గాథాయో అభాసిత్థాతి.

పదుమకూటాగారియత్థేరస్సాపదానం పఞ్చమం.