౪. మధుదాయకత్థేరఅపదానం

౩౩౩. ‘‘సిన్ధుయా నదియా తీరే, సుకతో అస్సమో మమ;

తత్థ వాచేమహం సిస్సే, ఇతిహాసం సలక్ఖణం.

౩౩౪. ‘‘ధమ్మకామా వినీతా తే, సోతుకామా సుసాసనం;

ఛళఙ్గే పారమిప్పత్తా, సిన్ధుకూలే వసన్తి తే.

౩౩౫. ‘‘ఉప్పాతగమనే చేవ, లక్ఖణేసు చ కోవిదా;

ఉత్తమత్థం గవేసన్తా, వసన్తి విపినే తదా.

౩౩౬. ‘‘సుమేధో నామ సమ్బుద్ధో, లోకే ఉప్పజ్జి తావదే;

అమ్హాకం అనుకమ్పన్తో, ఉపాగచ్ఛి వినాయకో.

౩౩౭. ‘‘ఉపాగతం మహావీరం, సుమేధం లోకనాయకం;

తిణసన్థారకం కత్వా, లోకజేట్ఠస్సదాసహం.

౩౩౮. ‘‘విపినాతో మధుం గయ్హ, బుద్ధసేట్ఠస్సదాసహం;

సమ్బుద్ధో పరిభుఞ్జిత్వా, ఇదం వచనమబ్రవి.

౩౩౯. ‘‘‘యో తం అదాసి మధుం మే, పసన్నో సేహి పాణిభి;

తమహం కిత్తయిస్సామి, సుణాథ మమ భాసతో.

౩౪౦. ‘‘‘ఇమినా మధుదానేన, తిణసన్థారకేన చ;

తింస కప్పసహస్సాని, దేవలోకే రమిస్సతి.

౩౪౧. ‘‘‘తింస కప్పసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౩౪౨. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, నిబ్బాయిస్సతినాసవో.

౩౪౩. ‘‘‘దేవలోకా ఇధాగన్త్వా, మాతుకుచ్ఛిం ఉపాగతే;

మధువస్సం పవస్సిత్థ, ఛాదయం మధునా మహిం’.

౩౪౪. ‘‘మయి నిక్ఖన్తమత్తమ్హి, కుచ్ఛియా చ సుదుత్తరా;

తత్రాపి మధువస్సం మే, వస్సతే నిచ్చకాలికం.

౩౪౫. ‘‘అగారా అభినిక్ఖమ్మ, పబ్బజిం అనగారియం;

లాభీ అన్నస్స పానస్స, మధుదానస్సిదం ఫలం.

౩౪౬. ‘‘సబ్బకామసమిద్ధోహం, భవిత్వా దేవమానుసే;

తేనేవ మధుదానేన, పత్తోమ్హి ఆసవక్ఖయం.

౩౪౭. ‘‘వుట్ఠమ్హి దేవే చతురఙ్గులే తిణే, సమ్పుప్ఫితే [సుపుప్ఫితే (స్యా.)] ధరణీరుహే సఞ్ఛన్నే [వప్పదేసే (స్యా.)];

సుఞ్ఞే ఘరే మణ్డపరుక్ఖమూలకే, వసామి నిచ్చం సుఖితో అనాసవో.

౩౪౮. ‘‘మజ్ఝే మహన్తే హీనే చ [మజ్ఝే మయ్హం భవా అస్సు (స్యా. పీ. క.)], భవే సబ్బే అతిక్కమిం [యే భవే సమతిక్కమిం (స్యా. క.), యో భవేసు పకిత్తయి (క.)];

అజ్జ మే ఆసవా ఖీణా, నత్థి దాని పునబ్భవో.

౩౪౯. ‘‘తింసకప్పసహస్సమ్హి, యం దానమదదిం తదా;

దుగ్గతిం నాభిజానామి, మధుదానస్సిదం ఫలం.

౩౫౦. ‘‘కిలేసా ఝాపితా మయ్హం, భవా సబ్బే సమూహతా;

సబ్బాసవా పరిక్ఖీణా, నత్థి దాని పునబ్భవో.

౩౫౧. ‘‘స్వాగతం వత మే ఆసి…పే… కతం బుద్ధస్స సాసనం.

౩౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మధుదాయకో థేరో ఇమా గాథాయో అభాసిత్థాతి.

మధుదాయకత్థేరస్సాపదానం చతుత్థం.