౩. సబ్బకిత్తికత్థేరఅపదానం

౩౦౪. ‘‘కణికారంవ జలితం [జోతన్తం (సీ.)], దీపరుక్ఖంవ ఉజ్జలం [జోతితం (స్యా.)];

ఓసధింవ విరోచన్తం, విజ్జుతం గగనే యథా.

౩౦౫. ‘‘అసమ్భీతం అనుత్తాసిం, మిగరాజంవ కేసరిం;

ఞాణాలోకం పకాసేన్తం, మద్దన్తం తిత్థియే గణే.

౩౦౬. ‘‘ఉద్ధరన్తం ఇమం లోకం, ఛిద్దన్తం సబ్బసంసయం;

గజ్జన్తం [అసమ్భీతం (స్యా.), గచ్ఛన్తం (క.)] మిగరాజంవ, అద్దసం లోకనాయకం.

౩౦౭. ‘‘జటాజినధరో ఆసిం, బ్రహా ఉజు పతాపవా;

వాకచీరం గహేత్వాన, పాదమూలే అపత్థరిం.

౩౦౮. ‘‘కాళానుసారియం గయ్హ, అనులిమ్పిం తథాగతం;

సమ్బుద్ధమనులిమ్పేత్వా, సన్థవిం లోకనాయకం.

౩౦౯. ‘‘సముద్ధరసిమం లోకం, ఓఘతిణ్ణ [ఓఘతిణ్ణో (స్యా. క.)] మహాముని;

ఞాణాలోకేన జోతేసి, నావటం [పవరం (స్యా.), వజిర (పీ.)] ఞాణముత్తమం.

౩౧౦. ‘‘ధమ్మచక్కం [తువం చక్కం (క.)] పవత్తేసి, మద్దసే పరతిత్థియే;

ఉసభో జితసఙ్గామో, సమ్పకమ్పేసి మేదనిం.

౩౧౧. ‘‘మహాసముద్దే ఊమియో, వేలన్తమ్హి పభిజ్జరే;

తథేవ తవ ఞాణమ్హి, సబ్బదిట్ఠీ పభిజ్జరే.

౩౧౨. ‘‘సుఖుమచ్ఛికజాలేన, సరమ్హి సమ్పతానితే;

అన్తోజాలికతా [జాలగతా (సీ.)] పాణా, పీళితా హోన్తి తావదే.

౩౧౩. ‘‘తథేవ తిత్థియా లోకే, పుథుపాసణ్డనిస్సితా [మూళ్హా సచ్చవినిస్సటా (స్యా.), ముట్ఠసచ్చవినిస్సటా (క.)];

అన్తోఞాణవరే తుయ్హం, పరివత్తన్తి మారిస.

౩౧౪. ‘‘పతిట్ఠా వుయ్హతం ఓఘే, త్వఞ్హి నాథో అబన్ధునం;

భయట్టితానం సరణం, ముత్తిత్థీనం పరాయణం.

౩౧౫. ‘‘ఏకవీరో అసదిసో, మేత్తాకరుణసఞ్చయో [సఞ్ఞుతో (స్యా.)];

అసమో సుసమో సన్తో [సుసీలో అసమో సన్తో (సీ.), పఞ్ఞవా యుత్తచాగో చ (స్యా.)], వసీ తాదీ జితఞ్జయో.

౩౧౬. ‘‘ధీరో విగతసమ్మోహో, అనేజో అకథంకథీ;

తుసితో [వుసితో (సీ.)] వన్తదోసోసి, నిమ్మలో సంయతో సుచి.

౩౧౭. ‘‘సఙ్గాతిగో హతమదో [గతమదో (స్యా.), తమనుదో (క.)], తేవిజ్జో తిభవన్తగో;

సీమాతిగో ధమ్మగరు, గతత్థో హితవబ్భుతో [హితవప్పథో (సీ. స్యా.)].

౩౧౮. ‘‘తారకో త్వం యథా నావా, నిధీవస్సాసకారకో;

అసమ్భీతో యథా సీహో, గజరాజావ దప్పితో.

౩౧౯. ‘‘థోమేత్వా దసగాథాహి, పదుముత్తరం మహాయసం;

వన్దిత్వా సత్థునో పాదే, తుణ్హీ అట్ఠాసహం తదా.

౩౨౦. ‘‘పదుముత్తరో లోకవిదూ, ఆహుతీనం పటిగ్గహో;

భిక్ఖుసఙ్ఘే ఠితో సత్థా, ఇమా గాథా అభాసథ.

౩౨౧. ‘‘‘యో మే సీలఞ్చ ఞాణఞ్చ, సద్ధమ్మఞ్చాపి వణ్ణయి [ధమ్మఞ్చాపి పకిత్తయి (సీ. స్యా.)];

తమహం కిత్తయిస్సామి, సుణాథ మమ భాసతో.

౩౨౨. ‘‘‘సట్ఠి కప్పసహస్సాని, దేవలోకే రమిస్సతి;

అఞ్ఞే దేవేభిభవిత్వా, ఇస్సరం కారయిస్సతి.

౩౨౩. ‘‘‘సో పచ్ఛా పబ్బజిత్వాన, సుక్కమూలేన చోదితో;

గోతమస్స భగవతో, సాసనే పబ్బజిస్సతి.

౩౨౪. ‘‘‘పబ్బజిత్వాన కాయేన, పాపకమ్మం వివజ్జియ;

సబ్బాసవే పరిఞ్ఞాయ, నిబ్బాయిస్సతినాసవో’.

౩౨౫. ‘‘యథాపి మేఘో థనయం, తప్పేతి మేదినిం ఇమం;

తథేవ త్వం మహావీర, ధమ్మేన తప్పయీ మమం.

౩౨౬. ‘‘సీలం పఞ్ఞఞ్చ ధమ్మఞ్చ, థవిత్వా లోకనాయకం;

పత్తోమ్హి పరమం సన్తిం, నిబ్బానం పదమచ్చుతం.

౩౨౭. ‘‘అహో నూన స భగవా, చిరం తిట్ఠేయ్య చక్ఖుమా;

అఞ్ఞాతఞ్చ విజానేయ్యుం, ఫుసేయ్యుం [అఞ్ఞాతఞ్చాపి జానేయ్య, పస్సేయ్య (క.)] అమతం పదం.

౩౨౮. ‘‘అయం మే పచ్ఛిమా జాతి, భవా సబ్బే సమూహతా;

సబ్బాసవే పరిఞ్ఞాయ, విహరామి అనాసవో.

౩౨౯. ‘‘సతసహస్సితో కప్పే, యం బుద్ధమభిథోమయిం

దుగ్గతిం నాభిజానామి, కిత్తనాయ ఇదం ఫలం.

౩౩౦. ‘‘కిలేసా ఝాపితా మయ్హం, భవా సబ్బే సమూహతా;

సబ్బాసవా పరిక్ఖీణా, నత్థి దాని పునబ్భవో.

౩౩౧. ‘‘స్వాగతం వత మే ఆసి…పే… కతం బుద్ధస్స సాసనం.

౩౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సబ్బకిత్తికో థేరో ఇమా గాథాయో అభాసిత్థాతి.

సబ్బకిత్తికత్థేరస్సాపదానం తతియం.