౨. సేలత్థేరఅపదానం
౨౦౮. ‘‘నగరే హంసవతియా, వీథిసామీ అహోసహం;
మమ ఞాతీ సమానేత్వా, ఇదం వచనమబ్రవిం.
౨౦౯. ‘‘‘బుద్ధో లోకే సముప్పన్నో, పుఞ్ఞక్ఖేత్తో అనుత్తరో [పుఞ్ఞక్ఖేత్తం అనుత్తరం (సీ.)];
ఆసి సో [ఆసీసో (సీ.), ఆధారో (పీ.)] సబ్బలోకస్స, ఆహుతీనం పటిగ్గహో.
౨౧౦. ‘‘‘ఖత్తియా నేగమా చేవ, మహాసాలా చ బ్రాహ్మణా;
పసన్నచిత్తా సుమనా, పూగధమ్మం అకంసు తే.
౨౧౧. ‘‘‘హత్థారోహా అనీకట్ఠా, రథికా పత్తికారకా;
పసన్నచిత్తా సుమనా, పూగధమ్మం అకంసు తే.
౨౧౨. ‘‘‘ఉగ్గా చ రాజపుత్తా చ, వేసియానా చ బ్రాహ్మణా;
పసన్నచిత్తా సుమనా, పూగధమ్మం అకంసు తే.
౨౧౩. ‘‘‘ఆళారికా కప్పకా [ఆళారికా చ సూదా (స్యా.)] చ, న్హాపకా మాలకారకా;
పసన్నచిత్తా సుమనా, పూగధమ్మం అకంసు తే.
౨౧౪. ‘‘‘రజకా పేసకారా చ, చమ్మకారా చ న్హాపితా;
పసన్నచిత్తా సుమనా, పూగధమ్మం అకంసు తే.
౨౧౫. ‘‘‘ఉసుకారా భమకారా, చమ్మకారా చ తచ్ఛకా;
పసన్నచిత్తా సుమనా, పూగధమ్మం అకంసు తే.
౨౧౬. ‘‘‘కమ్మారా సోణ్ణకారా చ, తిపులోహకరా తథా;
పసన్నచిత్తా సుమనా, పూగధమ్మం అకంసు తే.
౨౧౭. ‘‘‘భతకా చేటకా చేవ, దాసకమ్మకరా బహూ;
యథాసకేన థామేన, పూగధమ్మం అకంసు తే.
౨౧౮. ‘‘‘ఉదహారా కట్ఠహారా, కస్సకా తిణహారకా;
యథాసకేన థామేన, పూగధమ్మం అకంసు తే.
౨౧౯. ‘‘‘పుప్ఫికా మాలికా చేవ, పణ్ణికా ఫలహారకా;
యథాసకేన థామేన, పూగధమ్మం అకంసు తే.
౨౨౦. ‘‘‘గణికా కుమ్భదాసీ చ, పూవికా [సూపికా (క.)] మచ్ఛికాపి చ;
యథాసకేన థామేన, పూగధమ్మం అకంసు తే.
౨౨౧. ‘‘‘ఏథ సబ్బే సమాగన్త్వా, గణం బన్ధామ ఏకతో;
అధికారం కరిస్సామ, పుఞ్ఞక్ఖేత్తే అనుత్తరే’.
౨౨౨. ‘‘తే మే సుత్వాన వచనం, గణం బన్ధింసు తావదే;
ఉపట్ఠానసాలం సుకతం, భిక్ఖుసఙ్ఘస్స కారయుం.
౨౨౩. ‘‘నిట్ఠాపేత్వాన తం సాలం, ఉదగ్గో తుట్ఠమానసో;
పరేతో తేహి సబ్బేహి, సమ్బుద్ధముపసఙ్కమిం.
౨౨౪. ‘‘ఉపసఙ్కమ్మ సమ్బుద్ధం, లోకనాథం నరాసభం;
వన్దిత్వా సత్థునో పాదే, ఇదం వచనమబ్రవిం.
౨౨౫. ‘‘‘ఇమే తీణి సతా వీర, పురిసా ఏకతో గణా;
ఉపట్ఠానసాలం సుకతం, నియ్యాదేన్తి [నియ్యాతేన్తి (సీ.)] తువం [తవం (సీ.), తవ (స్యా.)] ముని’.
౨౨౬. ‘‘భిక్ఖుసఙ్ఘస్స పురతో, సమ్పటిచ్ఛత్వ చక్ఖుమా;
తిణ్ణం సతానం పురతో, ఇమా గాథా అభాసథ.
౨౨౭. ‘‘‘తిసతాపి చ జేట్ఠో చ, అనువత్తింసు ఏకతో;
సమ్పత్తిఞ్హి [సమ్పత్తీహి (స్యా. క.)] కరిత్వాన, సబ్బే అనుభవిస్సథ.
౨౨౮. ‘‘‘పచ్ఛిమే భవే సమ్పత్తే, సీతిభావమనుత్తరం;
అజరం అమతం సన్తం, నిబ్బానం ఫస్సయిస్సథ’.
౨౨౯. ‘‘ఏవం బుద్ధో వియాకాసి, సబ్బఞ్ఞూ సమణుత్తరో;
బుద్ధస్స వచనం సుత్వా, సోమనస్సం పవేదయిం.
౨౩౦. ‘‘తింస కప్పసహస్సాని, దేవలోకే రమిం అహం;
దేవాధిపో పఞ్చసతం, దేవరజ్జమకారయిం.
౨౩౧. ‘‘సహస్సక్ఖత్తుం రాజా చ, చక్కవత్తీ అహోసహం;
దేవరజ్జం కరోన్తస్స, మహాదేవా అవన్దిసుం.
౨౩౨. ‘‘ఇధ మానుసకే రజ్జం [రజ్జే (సీ.)], పరిసా హోన్తి బన్ధవా;
పచ్ఛిమే భవే సమ్పత్తే, వాసేట్ఠో నామ బ్రాహ్మణో.
౨౩౩. ‘‘అసీతికోటి నిచయో, తస్స పుత్తో అహోసహం;
సేలో ఇతి మమ నామం, ఛళఙ్గే పారమిం గతో.
౨౩౪. ‘‘జఙ్ఘావిహారం విచరం, ససిస్సేహి పురక్ఖతో;
జటాభారికభరితం, కేణియం నామ తాపసం.
౨౩౫. ‘‘పటియత్తాహుతిం దిస్వా, ఇదం వచనమబ్రవిం;
‘ఆవాహో వా వివాహో వా, రాజా వా తే నిమన్తితో’.
౨౩౬. ‘‘ఆహుతిం [నాహుతిం (?)] యిట్ఠుకామోహం, బ్రాహ్మణే దేవసమ్మతే;
న నిమన్తేమి రాజానం, ఆహుతీ మే న విజ్జతి.
౨౩౭. ‘‘న చత్థి మయ్హమావాహో, వివాహో మే న విజ్జతి;
సక్యానం నన్దిజననో, సేట్ఠో లోకే సదేవకే.
౨౩౮. ‘‘సబ్బలోకహితత్థాయ, సబ్బసత్తసుఖావహో;
సో మే నిమన్తితో అజ్జ, తస్సేతం పటియాదనం.
౨౩౯. ‘‘తిమ్బరూసకవణ్ణాభో, అప్పమేయ్యో అనూపమో;
రూపేనాసదిసో బుద్ధో, స్వాతనాయ నిమన్తితో.
౨౪౦. ‘‘ఉక్కాముఖపహట్ఠోవ, ఖదిరఙ్గారసన్నిభో;
విజ్జూపమో మహావీరో, సో మే బుద్ధో నిమన్తితో.
౨౪౧. ‘‘పబ్బతగ్గే యథా అచ్చి, పుణ్ణమాయేవ చన్దిమా;
నళగ్గివణ్ణసఙ్కాసో, సో మే బుద్ధో నిమన్తితో.
౨౪౨. ‘‘అసమ్భీతో భయాతీతో, భవన్తకరణో ముని;
సీహూపమో మహావీరో, సో మే బుద్ధో నిమన్తితో.
౨౪౩. ‘‘కుసలో బుద్ధధమ్మేహి, అపసయ్హో పరేహి సో;
నాగూపమో మహావీరో, సో మే బుద్ధో నిమన్తితో.
౨౪౪. ‘‘సద్ధమ్మాచారకుసలో, బుద్ధనాగో అసాదిసో;
ఉసభూపమో మహావీరో, సో మే బుద్ధో నిమన్తితో.
౨౪౫. ‘‘అనన్తవణ్ణో అమితయసో, విచిత్తసబ్బలక్ఖణో;
సక్కూపమో మహావీరో, సో మే బుద్ధో నిమన్తితో.
౨౪౬. ‘‘వసీ గణీ పతాపీ చ, తేజస్సీ చ దురాసదో;
బ్రహ్మూపమో మహావీరో, సో మే బుద్ధో నిమన్తితో.
౨౪౭. ‘‘పత్తధమ్మో దసబలో, బలాతిబలపారగో;
ధరణూపమో మహావీరో, సో మే బుద్ధో నిమన్తితో.
౨౪౮. ‘‘సీలవీచిసమాకిణ్ణో, ధమ్మవిఞ్ఞాణఖోభితో;
ఉదధూపమో మహావీరో, సో మే బుద్ధో నిమన్తితో.
౨౪౯. ‘‘దురాసదో దుప్పసహో, అచలో ఉగ్గతో బ్రహా;
నేరూపమో మహావీరో, సో మే బుద్ధో నిమన్తితో.
౨౫౦. ‘‘అనన్తఞాణో అసమసమో, అతులో అగ్గతం గతో;
గగనూపమో మహావీరో, సో మే బుద్ధో నిమన్తితో.
పన్నరసమం భాణవారం.
౨౫౧. ‘‘పతిట్ఠా భయభీతానం, తాణో సరణగామినం;
అస్సాసకో మహావీరో, సో మే బుద్ధో నిమన్తితో.
౨౫౨. ‘‘ఆసయో బుద్ధిమన్తానం, పుఞ్ఞక్ఖేత్తం సుఖేసినం;
రతనాకరో మహావీరో, సో మే బుద్ధో నిమన్తితో.
౨౫౩. ‘‘అస్సాసకో వేదకరో, సామఞ్ఞఫలదాయకో;
మేఘూపమో మహావీరో, సో మే బుద్ధో నిమన్తితో.
౨౫౪. ‘‘లోకచక్ఖు మహాతేజో, సబ్బతమవినోదనో;
సూరియూపమో మహావీరో, సో మే బుద్ధో నిమన్తితో.
౨౫౫. ‘‘ఆరమ్మణవిముత్తీసు, సభావదస్సనో ముని;
చన్దూపమో మహావీరో, సో మే బుద్ధో నిమన్తితో.
౨౫౬. ‘‘బుద్ధో సముస్సితో లోకే, లక్ఖణేహి అలఙ్కతో;
అప్పమేయ్యో మహావీరో, సో మే బుద్ధో నిమన్తితో.
౨౫౭. ‘‘యస్స ఞాణం అప్పమేయ్యం, సీలం యస్స అనూపమం;
విముత్తి అసదిసా యస్స, సో మే బుద్ధో నిమన్తితో.
౨౫౮. ‘‘యస్స ధీతి అసదిసా, థామో యస్స అచిన్తియో;
యస్స పరక్కమో జేట్ఠో, సో మే బుద్ధో నిమన్తితో.
౨౫౯. ‘‘రాగో దోసో చ మోహో చ, విసా సబ్బే సమూహతా;
అగదూపమో మహావీరో, సో మే బుద్ధో నిమన్తితో.
౨౬౦. ‘‘క్లేసబ్యాధిబహుదుక్ఖ సబ్బతమవినోదనో [వినోదకో (సీ. స్యా.)];
వేజ్జూపమో మహావీరో, సో మే బుద్ధో నిమన్తితో.
౨౬౧. ‘‘బుద్ధోతి భో యం వదేసి, ఘోసోపేసో సుదుల్లభో;
బుద్ధో బుద్ధోతి సుత్వాన, పీతి మే ఉదపజ్జథ.
౨౬౨. ‘‘అబ్భన్తరం అగణ్హన్తం, పీతి మే బహి నిచ్ఛరే;
సోహం పీతిమనో సన్తో, ఇదం వచనమబ్రవిం.
౨౬౩. ‘‘‘కహం ను ఖో సో భగవా, లోకజేట్ఠో నరాసభో;
తత్థ గన్త్వా నమస్సిస్సం, సామఞ్ఞఫలదాయకం’.
౨౬౪. ‘‘‘పగ్గయ్హ దక్ఖిణం బాహుం, వేదజాతో కతఞ్జలీ;
ఆచిక్ఖి మే ధమ్మరాజం, సోకసల్లవినోదనం.
౨౬౫. ‘‘‘ఉదేన్తంవ మహామేఘం, నీలం అఞ్జనసన్నిభం;
సాగరం వియ దిస్సన్తం, పస్ససేతం మహావనం.
౨౬౬. ‘‘‘ఏత్థ సో వసతే బుద్ధో, అదన్తదమకో ముని;
వినయన్తో చ వేనేయ్యే, బోధేన్తో బోధిపక్ఖియే.
౨౬౭. ‘‘‘పిపాసితోవ ఉదకం, భోజనంవ జిఘచ్ఛితో;
గావీ యథా వచ్ఛగిద్ధా, ఏవాహం విచినిం జినం.
౨౬౮. ‘‘‘ఆచారఉపచారఞ్ఞూ, ధమ్మానుచ్ఛవిసంవరం;
సిక్ఖాపేమి సకే సిస్సే, గచ్ఛన్తే జినసన్తికం.
౨౬౯. ‘‘‘దురాసదా భగవన్తో, సీహావ ఏకచారినో;
పదే పదం నిక్ఖిపన్తా, ఆగచ్ఛేయ్యాథ మాణవా.
౨౭౦. ‘‘‘ఆసీవిసో యథా ఘోరో, మిగరాజావ కేసరీ;
మత్తోవ కుఞ్జరో దన్తీ, ఏవం బుద్ధా దురాసదా.
౨౭౧. ‘‘‘ఉక్కాసితఞ్చ ఖిపితం, అజ్ఝుపేక్ఖియ మాణవా;
పదే పదం నిక్ఖిపన్తా, ఉపేథ బుద్ధసన్తికం.
౨౭౨. ‘‘‘పటిసల్లానగరుకా, అప్పసద్దా దురాసదా;
దురూపసఙ్కమా బుద్ధా, గరూ హోన్తి సదేవకే.
౨౭౩. ‘‘‘యదాహం పఞ్హం పుచ్ఛామి, పటిసమ్మోదయామి వా;
అప్పసద్దా తదా హోథ, మునిభూతావ తిట్ఠథ.
౨౭౪. ‘‘‘యం సో దేసేతి సమ్బుద్ధో [సద్ధమ్మం (సీ. స్యా.)], ఖేమం నిబ్బానపత్తియా;
తమేవత్థం నిసామేథ, సద్ధమ్మసవనం సుఖం’.
౨౭౫. ‘‘ఉపసఙ్కమ్మ సమ్బుద్ధం, సమ్మోదిం మునినా అహం;
తం కథం వీతిసారేత్వా, లక్ఖణే ఉపధారయిం.
౨౭౬. ‘‘లక్ఖణే ద్వే చ కఙ్ఖామి, పస్సామి తింసలక్ఖణే;
కోసోహితవత్థగుయ్హం, ఇద్ధియా దస్సయీ ముని.
౨౭౭. ‘‘జివ్హం నిన్నామయిత్వాన, కణ్ణసోతే చ నాసికే;
పటిమసి నలాటన్తం, కేవలం ఛాదయీ జినో.
౨౭౮. ‘‘తస్సాహం లక్ఖణే దిస్వా, పరిపుణ్ణే సబ్యఞ్జనే;
బుద్ధోతి నిట్ఠం గన్త్వాన, సహ సిస్సేహి పబ్బజిం.
౨౭౯. ‘‘సతేహి తీహి సహితో, పబ్బజిం అనగారియం;
అద్ధమాసే అసమ్పత్తే, సబ్బే పత్తామ్హ నిబ్బుతిం.
౨౮౦. ‘‘ఏకతో కమ్మం కత్వాన, పుఞ్ఞక్ఖేత్తే అనుత్తరే;
ఏకతో సంసరిత్వాన, ఏకతో వినివత్తయుం.
౨౮౧. ‘‘గోపానసియో దత్వాన, పూగధమ్మే వసిం అహం;
తేన కమ్మేన సుకతేన, అట్ఠ హేతూ లభామహం.