౧౦. అజితత్థేరఅపదానం

౪౮౪. ‘‘పదుముత్తరో నామ జినో, సబ్బధమ్మాన పారగూ;

అజ్ఝోగాహేత్వా హిమవన్తం, నిసీది లోకనాయకో.

౪౮౫. ‘‘నాహం అద్దక్ఖిం [పస్సామి (?)] సమ్బుద్ధం, నపి సద్దం సుణోమహం;

మమ భక్ఖం గవేసన్తో, ఆహిణ్డామి వనే అహం [తదా (సీ.)].

౪౮౬. ‘‘తత్థద్దస్సాసిం సమ్బుద్ధం, ద్వత్తింసవరలక్ఖణం;

దిస్వాన విత్తిమాపజ్జిం [చిత్తమాపజ్జి (సీ.), చిత్తమాపజ్జిం (స్యా.)], సత్తో కో నామయం భవే.

౪౮౭. ‘‘లక్ఖణాని విలోకేత్వా, మమ విజ్జం అనుస్సరిం;

సుతఞ్హి మేతం వుడ్ఢానం, పణ్డితానం సుభాసితం.

౪౮౮. ‘‘తేసం యథా తం వచనం, అయం బుద్ధో భవిస్సతి;

యంనూనాహం సక్కరేయ్యం, గతిం మే సోధయిస్సతి.

౪౮౯. ‘‘ఖిప్పం అస్సమమాగన్త్వా, మధుతేలం గహిం అహం;

కోలమ్బకం గహేత్వాన, ఉపగచ్ఛిం వినాయకం [నరాసభం (సీ.)].

౪౯౦. ‘‘తిదణ్డకే గహేత్వాన, అబ్భోకాసే ఠపేసహం;

పదీపం పజ్జలిత్వాన, అట్ఠక్ఖత్తుం అవన్దహం.

౪౯౧. ‘‘సత్తరత్తిన్దివం బుద్ధో, నిసీది పురిసుత్తమో;

తతో రత్యా వివసానే, వుట్ఠాసి లోకనాయకో.

౪౯౨. ‘‘పసన్నచిత్తో సుమనో, సబ్బరత్తిన్దివం అహం;

దీపం బుద్ధస్స పాదాసిం, పసన్నో సేహి పాణిభి.

౪౯౩. ‘‘సబ్బే వనా గన్ధమయా, పబ్బతే గన్ధమాదనే;

బుద్ధస్స ఆనుభావేన, ఆగచ్ఛుం బుద్ధసన్తికం [ఉపగచ్ఛుం తదా జినం (సీ.)].

౪౯౪. ‘‘యే కేచి పుప్ఫగన్ధాసే, పుప్ఫితా ధరణీరుహా;

బుద్ధస్స ఆనుభావేన, సబ్బే సన్నిపతుం తదా.

౪౯౫. ‘‘యావతా హిమవన్తమ్హి, నాగా చ గరుళా ఉభో;

ధమ్మఞ్చ సోతుకామా తే, ఆగచ్ఛుం బుద్ధసన్తికం.

౪౯౬. ‘‘దేవలో నామ సమణో, బుద్ధస్స అగ్గసావకో;

వసీసతసహస్సేహి, బుద్ధసన్తికుపాగమి.

౪౯౭. ‘‘పదుముత్తరో లోకవిదూ, ఆహుతీనం పటిగ్గహో;

భిక్ఖుసఙ్ఘే నిసీదిత్వా, ఇమా గాథా అభాసథ.

౪౯౮. ‘‘‘యో మే దీపం పదీపేసి, పసన్నో సేహి పాణిభి;

తమహం కిత్తయిస్సామి, సుణాథ మమ భాసతో.

౪౯౯. ‘‘‘సట్ఠి కప్పసహస్సాని, దేవలోకే రమిస్సతి;

సహస్సక్ఖత్తుం రాజా చ, చక్కవత్తీ భవిస్సతి.

సోళసమం భాణవారం.

౫౦౦. ‘‘‘ఛత్తిసక్ఖత్తుం దేవిన్దో, దేవరజ్జం కరిస్సతి;

పథవియం సత్తసతం, విపులం రజ్జం కరిస్సతి.

౫౦౧. ‘‘‘పదేసరజ్జం విపులం, గణనాతో అసఙ్ఖియం;

ఇమినా దీపదానేన, దిబ్బచక్ఖు భవిస్సతి.

౫౦౨. ‘‘‘సమన్తతో అట్ఠకోసం [అడ్ఢకోసం (సీ. స్యా.)], పస్సిస్సతి అయం సదా;

దేవలోకా చవన్తస్స, నిబ్బత్తన్తస్స జన్తునో.

౫౦౩. ‘‘‘దివా వా యది వా రత్తిం, పదీపం ధారయిస్సతి;

జాయమానస్స సత్తస్స, పుఞ్ఞకమ్మసమఙ్గినో.

౫౦౪. ‘‘‘యావతా నగరం ఆసి, తావతా జోతయిస్సతి;

ఉపపజ్జతి యం యోనిం, దేవత్తం అథ మానుసం.

౫౦౫. ‘‘‘అస్సేవ దీపదానస్స, [అట్ఠదీపఫలేన హి; ఉపట్ఠిస్సన్తిమం జన్తుం (స్యా.), అట్ఠ దీపా ఫలేన హి; న జహిస్సన్తి’మం జన్తుం (?)] అట్ఠదీపఫలేన హి;

న జయిస్సన్తిమం జన్తూ [అట్ఠదీపఫలేన హి; ఉపట్ఠిస్సన్తిమం జన్తుం (స్యా.), అట్ఠ దీపా ఫలేన హి; న జహిస్సన్తి’మం జన్తుం (?)], దీపదానస్సిదం ఫలం.

౫౦౬. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౫౦౭. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, నిబ్బాయిస్సతినాసవో.

౫౦౮. ‘‘‘తోసయిత్వాన సమ్బుద్ధం, గోతమం సక్యపుఙ్గవం;

అజితో నామ నామేన, హేస్సతి సత్థు సావకో’.

౫౦౯. ‘‘సట్ఠి కప్పసహస్సాని, దేవలోకే రమిం అహం;

తత్రాపి మే దీపసతం, జోతతే నిచ్చకాలికం [సబ్బకాలికం (సీ.)].

౫౧౦. ‘‘దేవలోకే మనుస్సే వా, నిద్ధావన్తి పభా మమ;

బుద్ధసేట్ఠం సరిత్వాన, భియ్యో హాసం జనేసహం.

౫౧౧. ‘‘తుసితాహం చవిత్వాన, ఓక్కమిం మాతుకుచ్ఛియం;

జాయమానస్స సన్తస్స, ఆలోకో విపులో అహు.

౫౧౨. ‘‘అగారా అభినిక్ఖమ్మ, పబ్బజిం అనగారియం;

బావరిం ఉపసఙ్కమ్మ, సిస్సత్తం అజ్ఝుపాగమిం.

౫౧౩. ‘‘హిమవన్తే వసన్తోహం, అస్సోసిం లోకనాయకం;

ఉత్తమత్థం గవేసన్తో, ఉపగచ్ఛిం వినాయకం.

౫౧౪. ‘‘దన్తో బుద్ధో దమేతావీ, ఓఘతిణ్ణో నిరూపధి;

నిబ్బానం కథయీ బుద్ధో, సబ్బదుక్ఖప్పమోచనం.

౫౧౫. ‘‘తం మే ఆగమనం సిద్ధం, తోసితోహం మహామునిం;

తిస్సో విజ్జా అనుప్పత్తా, కతం బుద్ధస్స సాసనం.

౫౧౬. ‘‘సతసహస్సితో కప్పే, యం దీపమదదిం తదా;

దుగ్గతిం నాభిజానామి, దీపదానస్సిదం ఫలం.

౫౧౭. ‘‘కిలేసా ఝాపితా మయ్హం…పే… విహరామి అనాసవో.

౫౧౮. ‘‘స్వాగతం వత మే ఆసి…పే… కతం బుద్ధస్స సాసనం.

౫౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అజితో థేరో ఇమా గాథాయో అభాసిత్థాతి.

అజితత్థేరస్సాపదానం దసమం.

పిలిన్దవచ్ఛవగ్గో చత్తాలీసమో.

తస్సుద్దానం –

పిలిన్దవచ్ఛో సేలో చ, సబ్బకిత్తీ మధుందదో;

కూటాగారీ బాకులో చ, గిరి సళలసవ్హయో.

సబ్బదో అజితో చేవ, గాథాయో గణితా ఇహ;

సతాని పఞ్చ గాథానం, వీసతి చ తదుత్తరీతి.

అథ వగ్గుద్దానం –

పదుమారక్ఖదో చేవ, ఉమా గన్ధోదకేన చ;

ఏకపద్మ సద్దసఞ్ఞీ, మన్దారం బోధివన్దకో.

అవటఞ్చ పిలిన్ది [ఏవమేవ దిస్సతి] చ, గాథాయో గణితా ఇహ;

చతుసత్తతి గాథాయో, ఏకాదస సతాని చ.

పదుమవగ్గదసకం.