౪. కాళుదాయిత్థేరఅపదానం

౪౮. ‘‘పదుముత్తరబుద్ధస్స, లోకజేట్ఠస్స తాదినో;

అద్ధానం పటిపన్నస్స, చరతో చారికం తదా.

౪౯. ‘‘సుఫుల్లం పదుమం గయ్హ, ఉప్పలం మల్లికఞ్చహం;

పరమన్నం గహేత్వాన, అదాసిం సత్థునో అహం.

౫౦. ‘‘పరిభుఞ్జి మహావీరో, పరమన్నం సుభోజనం;

తఞ్చ పుప్ఫం గహేత్వాన, జనస్స సమ్పదస్సయి.

౫౧. ‘‘ఇట్ఠం కన్తం [కన్తయిదం (స్యా.)], పియం లోకే, జలజం పుప్ఫముత్తమం;

సుదుక్కరం కతం తేన, యో మే పుప్ఫం అదాసిదం.

౫౨. ‘‘యో పుప్ఫమభిరోపేసి, పరమన్నఞ్చదాసి మే;

తమహం కిత్తయిస్సామి, సుణాథ మమ భాసతో.

౫౩. ‘‘‘దస అట్ఠ చక్ఖత్తుం [దస చట్ఠక్ఖత్తుం (సీ.), దసమట్ఠక్ఖత్తుం (స్యా.)] సో, దేవరజ్జం కరిస్సతి;

ఉప్పలం పదుమఞ్చాపి, మల్లికఞ్చ తదుత్తరి.

౫౪. ‘‘‘అస్స పుఞ్ఞవిపాకేన, దిబ్బగన్ధసమాయుతం;

ఆకాసే ఛదనం కత్వా, ధారయిస్సతి తావదే.

౫౫. ‘‘‘పఞ్చవీసతిక్ఖత్తుఞ్చ, చక్కవత్తీ భవిస్సతి;

పథబ్యా రజ్జం పఞ్చసతం, వసుధం ఆవసిస్సతి.

౫౬. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన [నామేన (సీ. స్యా. క.)], సత్థా లోకే భవిస్సతి.

౫౭. ‘‘‘సకకమ్మాభిరద్ధో సో, సుక్కమూలేన చోదితో;

సక్యానం నన్దిజననో, ఞాతిబన్ధు భవిస్సతి.

౫౮. ‘‘‘సో పచ్ఛా పబ్బజిత్వాన, సుక్కమూలేన చోదితో;

సబ్బాసవే పరిఞ్ఞాయ, నిబ్బాయిస్సతినాసవో.

౫౯. ‘‘‘పటిసమ్భిదమనుప్పత్తం, కతకిచ్చమనాసవం;

గోతమో లోకబన్ధు తం [సో (సీ.)], ఏతదగ్గే ఠపేస్సతి.

౬౦. ‘‘‘పధానపహితత్తో సో, ఉపసన్తో నిరూపధి;

ఉదాయీ నామ నామేన, హేస్సతి సత్థు సావకో’.

౬౧. ‘‘రాగో దోసో చ మోహో చ, మానో మక్ఖో చ ధంసితో;

సబ్బాసవే పరిఞ్ఞాయ, విహరామి అనాసవో.

౬౨. ‘‘తోసయిఞ్చాపి సమ్బుద్ధం, ఆతాపీ నిపకో అహం;

పసాదితో [పమోదితో (సీ.)] చ సమ్బుద్ధో, ఏతదగ్గే ఠపేసి మం.

౬౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కాళుదాయీ థేరో ఇమా గాథాయో అభాసిత్థాతి;

కాళుదాయీథేరస్సాపదానం చతుత్థం.