౫. మోఘరాజత్థేరఅపదానం

౬౪. ‘‘అత్థదస్సీ తు భగవా, సయమ్భూ అపరాజితో;

భిక్ఖుసఙ్ఘపరిబ్యూళ్హో, రథియం పటిపజ్జథ.

౬౫. ‘‘సిస్సేహి సమ్పరివుతో, ఘరమ్హా అభినిక్ఖమిం;

నిక్ఖమిత్వానహం తత్థ, అద్దసం లోకనాయకం.

౬౬. ‘‘అభివాదియ సమ్బుద్ధం, సిరే కత్వాన అఞ్జలిం;

సకం చిత్తం పసాదేత్వా, సన్థవిం లోకనాయకం.

౬౭. ‘‘యావతా రూపినో సత్తా, అరూపీ వా అసఞ్ఞినో;

సబ్బే తే తవ ఞాణమ్హి, అన్తో హోన్తి సమోగధా.

౬౮. ‘‘సుఖుమచ్ఛికజాలేన, ఉదకం యో పరిక్ఖిపే;

యే కేచి ఉదకే పాణా, అన్తోజాలే భవన్తి తే.

౬౯. ‘‘యేసఞ్చ చేతనా అత్థి, రూపినో చ అరూపినో;

సబ్బే తే తవ ఞాణమ్హి, అన్తో హోన్తి సమోగధా.

౭౦. ‘‘సముద్ధరసిమం లోకం, అన్ధకారసమాకులం;

తవ ధమ్మం సుణిత్వాన, కఙ్ఖాసోతం తరన్తి తే.

౭౧. ‘‘అవిజ్జానివుతే లోకే, అన్ధకారేన ఓత్థటే;

తవ ఞాణమ్హి జోతన్తే, అన్ధకారా పధంసితా.

౭౨. ‘‘తువం చక్ఖూసి సబ్బేసం, మహాతమపనూదనో;

తవ ధమ్మం సుణిత్వాన, నిబ్బాయతి బహుజ్జనో.

౭౩. ‘‘పుటకం పూరయిత్వాన [పీఠరం (సీ.), పుతరం (స్యా.)], మధుఖుద్దమనేళకం;

ఉభో హత్థేహి పగ్గయ్హ, ఉపనేసిం మహేసినో.

౭౪. ‘‘పటిగ్గణ్హి మహావీరో, సహత్థేన మహా ఇసీ;

భుఞ్జిత్వా తఞ్చ సబ్బఞ్ఞూ, వేహాసం నభముగ్గమి.

౭౫. ‘‘అన్తలిక్ఖే ఠితో సత్థా, అత్థదస్సీ నరాసభో;

మమ చిత్తం పసాదేన్తో, ఇమా గాథా అభాసథ.

౭౬. ‘‘‘యేనిదం థవితం ఞాణం, బుద్ధసేట్ఠో చ థోమితో;

తేన చిత్తప్పసాదేన, దుగ్గతిం సో న గచ్ఛతి.

౭౭. ‘‘‘చతుద్దసఞ్చక్ఖత్తుం [చతుసట్ఠిఞ్చ (స్యా.)] సో, దేవరజ్జం కరిస్సతి;

పథబ్యా రజ్జం అట్ఠసతం, వసుధం ఆవసిస్సతి.

౭౮. ‘‘‘పఞ్చేవ సతక్ఖత్తుఞ్చ [అథ పఞ్చసతక్ఖత్తుం (సీ.)], చక్కవత్తీ భవిస్సతి;

పదేసరజ్జం అసఙ్ఖేయ్యం, మహియా కారయిస్సతి.

౭౯. ‘‘‘అజ్ఝాయకో మన్తధరో, తిణ్ణం వేదాన పారగూ;

గోతమస్స భగవతో, సాసనే పబ్బజిస్సతి.

౮౦. ‘‘‘గమ్భీరం నిపుణం అత్థం, ఞాణేన విచినిస్సతి;

మోఘరాజాతి నామేన, హేస్సతి సత్థు సావకో.

౮౧. ‘‘‘తీహి విజ్జాహి సమ్పన్నం, కతకిచ్చమనాసవం;

గోతమో సత్థవాహగ్గో, ఏతదగ్గే ఠపేస్సతి’.

౮౨. ‘‘హిత్వా మానుసకం యోగం, ఛేత్వాన భవబన్ధనం;

సబ్బాసవే పరిఞ్ఞాయ, విహరామి అనాసవో.

౮౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మోఘరాజో థేరో ఇమా గాథాయో అభాసిత్థాతి;

మోఘరాజత్థేరస్సాపదానం పఞ్చమం.