౧౦. కప్పరుక్ఖియత్థేరఅపదానం

౧౦౮. ‘‘సిద్ధత్థస్స భగవతో, థూపసేట్ఠస్స సమ్ముఖా;

విచిత్తదుస్సే లగేత్వా [లగ్గేత్వా (సీ. స్యా.)], కప్పరుక్ఖం ఠపేసహం.

౧౦౯. ‘‘యం యం యోనుపపజ్జామి, దేవత్తం అథ మానుసం;

సోభయన్తో మమ ద్వారం, కప్పరుక్ఖో పతిట్ఠతి.

౧౧౦. ‘‘అహఞ్చ పరిసా చేవ, యే కేచి మమ వస్సితా [నిస్సితా (సీ.)];

తమ్హా దుస్సం గహేత్వాన, నివాసేమ మయం సదా [తదా (స్యా.)].

౧౧౧. ‘‘చతున్నవుతితో కప్పే, యం రుక్ఖం ఠపయిం అహం;

దుగ్గతిం నాభిజానామి, కప్పరుక్ఖస్సిదం ఫలం.

౧౧౨. ‘‘ఇతో చ సత్తమే కప్పే, సుచేళా అట్ఠ ఖత్తియా;

సత్తరతనసమ్పన్నా, చక్కవత్తీ మహబ్బలా.

౧౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కప్పరుక్ఖియో థేరో ఇమా గాథాయో అభాసిత్థాతి.

కప్పరుక్ఖియత్థేరస్సాపదానం దసమం.

కుణ్డధానవగ్గో చతుత్థో.