౧. కుణ్డధానత్థేరఅపదానం

౧. ‘‘సత్తాహం పటిసల్లీనం, సయమ్భుం అగ్గపుగ్గలం;

పసన్నచిత్తో సుమనో, బుద్ధసేట్ఠం ఉపట్ఠహిం.

౨. ‘‘వుట్ఠితం కాలమఞ్ఞాయ, పదుముత్తరం మహామునిం;

మహన్తిం కదలీకణ్ణిం, గహేత్వా ఉపగచ్ఛహం.

౩. ‘‘పటిగ్గహేత్వా [పటిగ్గహేసి (స్యా. క.)] భగవా, సబ్బఞ్ఞూ [తం ఫలం (సీ.)] లోకనాయకో;

మమ చిత్తం పసాదేన్తో, పరిభుఞ్జి మహాముని.

౪. ‘‘పరిభుఞ్జిత్వా సమ్బుద్ధో, సత్థవాహో అనుత్తరో;

సకాసనే నిసీదిత్వా, ఇమా గాథా అభాసథ.

౫. ‘‘‘యే చ సన్తి సమితారో [యే వసన్తి సమేతారో (సీ.)], యక్ఖా ఇమమ్హి పబ్బతే;

అరఞ్ఞే భూతభబ్యాని [భూతగణా సబ్బే (స్యా.)], సుణన్తు వచనం మమ’.

౬. ‘‘యో సో బుద్ధం ఉపట్ఠాసి, మిగరాజంవ కేసరిం [మిగరాజావ కేసరీ (సీ.)];

తమహం కిత్తయిస్సామి, సుణాథ మమ భాసతో.

౭. ‘‘‘ఏకాదసఞ్చక్ఖత్తుం, సో [సోయమేకాదసక్ఖత్తుం (సీ.)] దేవరాజా భవిస్సతి;

చతుతింసతిక్ఖత్తుఞ్చ, చక్కవత్తీ భవిస్సతి.

౮. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౯. ‘‘‘అక్కోసిత్వాన సమణే, సీలవన్తే అనాసవే;

పాపకమ్మవిపాకేన, నామధేయ్యం లభిస్సతి [భవిస్సతి (క.)].

౧౦. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

కుణ్డధానోతి నామేన, సావకో సో భవిస్సతి’.

౧౧. ‘‘పవివేకమనుయుత్తో, ఝాయీ ఝానరతో అహం;

తోసయిత్వాన సత్థారం, విహరామి అనాసవో.

౧౨. ‘‘సావకేహి [సావకగ్గేహి (సీ.)] పరివుతో, భిక్ఖుసఙ్ఘపురక్ఖతో;

భిక్ఖుసఙ్ఘే నిసీదిత్వా, సలాకం గాహయీ జినో.

౧౩. ‘‘ఏకంసం చీవరం కత్వా, వన్దిత్వా లోకనాయకం;

వదతం వరస్స పురతో, పఠమం అగ్గహేసహం.

౧౪. ‘‘తేన కమ్మేన భగవా, దససహస్సీకమ్పకో;

భిక్ఖుసఙ్ఘే నిసీదిత్వా, అగ్గట్ఠానే ఠపేసి మం.

౧౫. ‘‘వీరియం మే ధురధోరయ్హం, యోగక్ఖేమాధివాహనం;

ధారేమి అన్తిమం దేహం, సమ్మాసమ్బుద్ధసాసనే.

౧౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా కుణ్డధానో థేరో ఇమా గాథాయో అభాసిత్థాతి.

కుణ్డధానత్థేరస్సాపదానం పఠమం.