౨. సాగతత్థేరఅపదానం

౧౭. ‘‘సోభితో నామ నామేన, అహోసిం బ్రాహ్మణో తదా;

పురక్ఖతో ససిస్సేహి, ఆరామం అగమాసహం.

౧౮. ‘‘భగవా తమ్హి సమయే, భిక్ఖుసఙ్ఘపురక్ఖతో;

ఆరామద్వారా నిక్ఖమ్మ, అట్ఠాసి పురిసుత్తమో.

౧౯. ‘‘తమద్దసాసిం సమ్బుద్ధం, దన్తం దన్తపురక్ఖతం;

సకం చిత్తం పసాదేత్వా, సన్థవిం లోకనాయకం.

౨౦. ‘‘యే కేచి పాదపా సబ్బే, మహియా తే విరూహరే;

బుద్ధిమన్తో తథా సత్తా, రుహన్తి జినసాసనే.

౨౧. ‘‘సత్థవాహోసి సప్పఞ్ఞో, మహేసి బహుకే జనే;

విపథా ఉద్ధరిత్వాన, పథం ఆచిక్ఖసే తువం.

౨౨. ‘‘దన్తో దన్తపరికిణ్ణో [పురక్ఖతో (స్యా.)], ఝాయీ ఝానరతేహి చ;

ఆతాపీ పహితత్తేహి, ఉపసన్తేహి తాదిభి.

౨౩. ‘‘అలఙ్కతో పరిసాహి, పుఞ్ఞఞాణేహి సోభతి;

పభా నిద్ధావతే తుయ్హం, సూరియోదయనే యథా.

౨౪. ‘‘పసన్నచిత్తం దిస్వాన, మహేసీ పదుముత్తరో;

భిక్ఖుసఙ్ఘే ఠితో సత్థా, ఇమా గాథా అభాసథ.

౨౫. ‘‘‘యో సో హాసం జనేత్వాన, మమం కిత్తేసి బ్రాహ్మణో;

కప్పానం సతసహస్సం, దేవలోకే రమిస్సతి.

౨౬. ‘‘‘తుసితా హి చవిత్వాన, సుక్కమూలేన చోదితో;

గోతమస్స భగవతో, సాసనే పబ్బజిస్సతి.

౨౭. ‘‘‘తేన కమ్మేన సుకతేన, అరహత్తం [తుట్ఠహట్ఠం (స్యా. క.)] లభిస్సతి;

సాగతో నామ నామేన, హేస్సతి సత్థు సావకో’.

౨౮. ‘‘పబ్బజిత్వాన కాయేన, పాపకమ్మం వివజ్జయిం;

వచీదుచ్చరితం హిత్వా, ఆజీవం పరిసోధయిం.

౨౯. ‘‘ఏవం విహరమానోహం, తేజోధాతూసు కోవిదో;

సబ్బాసవే పరిఞ్ఞాయ, విహరామి అనాసవో.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సాగతో థేరో ఇమా గాథాయో అభాసిత్థాతి.

సాగతత్థేరస్సాపదానం దుతియం.